അലക്‌സ് വര്‍ഗീസ്: മാഞ്ചസ്റ്റര്‍ മലയാളി കള്‍ച്ചറല്‍ അസോസിയേഷന്റെ അംഗത്വ മാസാചരണം കഴിഞ്ഞ ദിവസം നടന്ന ലളിതമായ ചടങ്ങില്‍ ഉദ്ഘാടനം ചെയ്തു. അസോസിയേഷന്റെ പരിധിയിലുള്ള സ്ഥലത്തേക്ക് താമസം മാറ്റിയ ലിജി അനീഷിന് അംഗത്വം നല്കിയാണ് അംഗത്വ മാസാചരണം ആരംഭിച്ചത്. എം.എം.സി.എ ഉപാദ്ധ്യക്ഷന്‍ ശ്രീ. ഹരികുമാര്‍. പി.കെ. അംഗത്വ അപേക്ഷ സ്വീകരിച്ചാണ് ഉദ്ഘാടനം നിര്‍വഹിച്ചത്. എം.എം.സി.എ പ്രസിഡന്റ് ശ്രീ. ജോബി മാത്യു അദ്ധ്യക്ഷനായിരുന്നു. അലക്‌സ് വര്‍ഗ്ഗീസ്, സിബി മാത്യു, ആഷന്‍ പോള്‍, ജനീഷ് കുരുവിള, ഷീ സോബി, സാബു പുന്നൂസ്, ഹരികുമാര്‍.കെ.വി., മോനച്ചന്‍ ആന്റണി തുടങ്ങിയവര്‍ തദവസരത്തില്‍ സന്നിഹിതരായിരുന്നു. ഒക്ടോബര്‍ മാസം പുതിയ അംഗങ്ങളെ ചേര്‍ക്കലും, സജീവമല്ലാത്ത അംഗങ്ങളെ സംഘടനാപ്രവര്‍ത്തനങ്ങളിലേക്ക് തിരികെ കൊണ്ട് വരുവുമാനുമുള്ള പുതിയ കമ്മിറ്റിയുടെ തീരുമാനപ്രകാരമാണ് ഇത്തരത്തിലുള്ള പ്രവര്‍ത്തനങ്ങളുമായി മുന്നോട്ട് പോകുന്നത്.
എം.എം.സി.എ യുടെ നവംബര്‍ മാസത്തെ പ്രധാന പരിപാടി നവംബര്‍ 14 ശനിയാഴ്ച നടക്കുന്ന ”ശിശുദിനാഘോഷം 2015 ” ആണ്.”ശിശുദിനാഘോഷം 2015 ” വന്‍ വിജയമാക്കുവാന്‍ എല്ലാ അംഗങ്ങളുടെയും സഹായ സഹകരണങ്ങള്‍ കമ്മിറ്റിക്കുവേണ്ടി സെക്രട്ടറി അലക്‌സ് വര്‍ഗ്ഗീസ് അഭ്യര്‍ത്ഥിച്ചു. എം.എം.സി.എ യുടെ ക്രിസ്തുമസ്സ് പുതുവത്സര ആഘോഷങ്ങള്‍ ഡിസംബര്‍ 30 ന് (ബുധന്‍) ആയിരിക്കുമെന്നും അറിയിക്കുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല