കൊച്ചി: സ്വര്‍ണ വിലയില്‍ മുന്നേറ്റം തുടരുന്നു. രാവിലെ 21,000 രൂപയിലെത്തി പുതിയ റെക്കോഡിട്ട പവന്‍വില, ഉച്ചയോടെ വീണ്ടും കൂടി. ഉച്ചയ്ക്ക് 200 രൂപ കൂടി വര്‍ധിച്ച് 21,200 രൂപയിലെത്തി റെക്കോഡ് തിരുത്തി. ഇതോടെ ഒറ്റദിവസം കൊണ്ട് 280 രൂപ ഉയര്‍ന്നു. ഗ്രാമിന് ആദ്യം 10 രൂപയും പിന്നീട് 25 രൂപയും വര്‍ധിച്ച് 2,650 രൂപയിലെത്തി.
സ്വര്‍ണവില 20,000 കടന്നത് കഴിഞ്ഞദിവസമാണ്. സാമ്പത്തിക മാന്ദ്യഭീതി കൂടുന്നതിനാല്‍ വില ഇനിയും കൂടുമെന്നാണ് വിദഗ്ധരുടെ വിലയിരുത്തല്‍.
രാജ്യാന്തര വിപണിയിലെ വിലയിലുണ്ടായ വര്‍ധനവാണ് അഭ്യന്തര വിപണിയിലെയും ഉയര്‍ച്ചക്ക് കാരണം. മാന്ദ്യഭീതി പടരുന്ന സാഹചര്യത്തില്‍ സുരക്ഷിത നിക്ഷേപമെന്ന കാരണത്താല്‍ ആളുകള്‍ സ്വര്‍ണം വാങ്ങിക്കൂട്ടുന്നതാണ് വില ഉയരാന്‍ കാരണം.
2009 നവംബര്‍ 21നാണ് സ്വര്‍ണവില 13,000രൂപ കടന്നത്. പിന്നീട് കുടിയും കുറഞ്ഞും നീങ്ങിയ വില 2010 ഏപ്രില്‍ മുതലാണ് കാര്യമായ കയറ്റത്തിന്റെ പാതയിലെത്തിയത്.
ഓഹരിവിപണിയിലെ ചാഞ്ചാട്ടവും ക്രൂഡോയില്‍ വില ഇടിയുന്നതും ആളുകളെ സ്വര്‍ണത്തിലേക്ക് കൂടുതല്‍ അടുപ്പിക്കുകയാണ്. വില തല്‍ക്കാലം താഴോട്ടുപോകാന്‍ സാധ്യതയില്ലെന്നാണ് വിദഗ്ധര്‍ ചൂണ്ടിക്കാട്ടുന്നത്.
യൂറോപ്യന്‍ രാജ്യങ്ങളുടെ കടബാധ്യത സംബന്ധിച്ച ആശങ്കകള്‍ വീണ്ടും സജീവമായതാണ് സ്വര്‍ണത്തിന് ഡിമാന്‍ഡ് ഉയര്‍ത്തുന്നത്. കഴിഞ്ഞ ദിവസം ജര്‍മ്മനിയിലും സാമ്പത്തിക മേഖല തളര്‍ച്ചയിലാണെന്ന് റിപ്പോര്‍ട്ടുകള്‍ പുറത്ത് വന്നിരുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല