വീണ്ടും ഇരുട്ടടി, റെയില്‍ സീസണ്‍ ചാര്‍ജും കുത്തനെ ഉയരും

യുകെയില്‍ റെയില്‍ സീസണ്‍ ടിക്കറ്റ് നിരക്കുകള്‍ കുത്തനെ ഉയര്‍ത്തുന്നു. വാര്‍ഷിക സീസണ്‍ ടിക്കറ്റിന് ആദ്യമായി 5,000 പൗണ്ടിനു മുകളിലേക്ക് നിരക്കുയരുകയാണ്.കാംപെയിന്‍ ഫോര്‍ ബെറ്റര്‍ ട്രാന്‍സ്‌പോര്‍ട്ടാണ് ടിക്കറ്റു നിരക്കിലെ ഈ വര്‍ദ്ധന വെളിച്ചത്തുകൊണ്ടുവന്നത്. യുകെയില്‍ മൊത്തത്തിലെടുത്താല്‍ നിരക്ക് വര്‍ദ്ധന 5.8 ശതമാനമാണ്. എന്നാല്‍, ലണ്ടന്‍ ട്യൂബിലും ബസ് സര്‍വീസിലും വര്‍ദ്ധന 6.8 ശതമാനം വരും.

ഇതേസമയം, കെന്‍ിലെ നിരക്കു വര്‍ദ്ധനയാണ് ഏറ്റവും ഞെട്ടിക്കുന്നത്. ഇവിടെ 13 ശതമാനം വരെ നിരക്കുയരും.

* ലണ്ടന്‍ -ടോണ്‍ബ്രിഡ്ജ് (കെന്റ്)- 12.7 ശതമാനം ഉയര്‍ന്ന് 5,192 പൗണ്ടാവും.

* പീറ്റര്‍ബറോ-ലണ്ടന്‍ – ഫസ്റ്റ് ക്യാപിറ്റല്‍ കണക്ട്- 5000 പൗണ്ടില്‍ നിന്ന് 5,320 പൗണ്ടാവും.

* ഈസ്റ്റ് കോസ്റ്റ് സര്‍വീസില്‍ നിരക്ക് 6,000 പൗണ്ടിലേക്ക് ഉയരും.

* യോര്‍ക്-ന്യൂകാസില്‍ റൂട്ടില്‍ വാര്‍ഷിക നിരക്ക് 5,000 പൗണ്ടിന് മുകളിലെത്തും.

എന്നാല്‍ , അസോസിയേഷന്‍ ഒഫ് ട്രെയിന്‍ ഓപ്പറേറ്റിംഗ് കമ്പനീസിന്റെ വക്താവ് പറയുന്നത്, ഈ നിരക്കുവര്‍ദ്ധന പോലും മൊത്തം പ്രവര്‍ത്തനച്ചെലവിന്റെ പകുതിപോലും മറികടക്കാന്‍ സഹായിക്കില്ലെന്നാണ്. സര്‍ക്കാരിന്റെ ചെലവുചുരുക്കല്‍ പദ്ധതികളും പണപ്പെരുപ്പവും റെയില്‍വേയുടെ താളംതെറ്റിക്കുന്നുവെന്നാണ് വക്താവിന്റെ പരാതി.

എന്നാല്‍ , ശമ്പളം വെട്ടിക്കുറയ്ക്കുകയും ജോലി സമയം കുറയ്ക്കപ്പെടുകയും ചെയ്തു ബുദ്ധിമുട്ടിലായ ആയിരങ്ങള്‍ക്ക് റെയില്‍വേയുടെ നടപടി ഇരുട്ടടിയായിരിക്കുകയാണെന്ന് കാംപെയിന്‍ ഫോര്‍ ബെറ്റര്‍ ട്രാന്‍സ്‌പോര്‍ട്ട് ചീഫ് എക്‌സിക്യൂട്ടീവ് സ്റ്റീഫന്‍ ജോസഫ് പറയുന്നു. യതാര്‍ത്ഥത്തില്‍ യാത്രക്കാരെ കൊള്ളയടിക്കുകയാണ് റെയില്‍ കമ്പനികളെന്നും അദ്ദേഹം ആരോപിച്ചു.