അപ്പച്ചന്‍ കണ്ണഞ്ചിറ (സ്റ്റീവനേജ്):വെസ്റ്റ് മിനിസ്റ്റര്‍ അതിരൂപതയിലെ സീറോ മലബാര്‍ കുര്‍ബ്ബാന കേന്ദ്രമായ സ്റ്റീവനേജില്‍ അമലോത്ഭവ മാതാവിന്റെ തിരുന്നാള്‍ ഭക്തി പുരസ്സരം ആഘോഷിക്കുന്നു.പരിശുദ്ധ അമ്മയുടെ ജനനത്തിരുന്നാളും, അതിനൊരുക്കമായി പൗരസ്ത്യസഭകള്‍ ആചരിക്കുന്ന എട്ടുനോമ്പും വന്നു ചേരുന്ന സെപ്റ്റംബര്‍ മാസത്തിലെ മൂന്നാം ശനിയാഴ്ചയിലെ പതിവ് മലയാളം കുര്‍ബ്ബാന പരിശുദ്ധ അമ്മയുടെ ദിനവും,തിരുന്നാളുമായി വിപുലവും,ഭക്തിനിര്‍ഭരവുമായിട്ടാവും ആഘോഷിക്കുക.
പരിശുദ്ധ കത്തോലിക്കാ സഭ വിശുദ്ധിയുടെ പ്രാര്‍ത്ഥനാദിനം ആയി ആചരിക്കുന്ന സെപ്തംബര്‍ 17 നു ശനിയാഴ്ച രാവിലെ 9:30 നു സ്റ്റീവനേജിലെ സെന്റ് ഹില്‍ഡാ ദേവാലയത്തില്‍ പരിശുദ്ധ ജപമാല സമര്‍പ്പണത്തോടെ തിരുന്നാള്‍ തിരുക്കര്‍മ്മങ്ങള്‍ ആരംഭിക്കും.ഫാ.വിന്‍സന്റ് ഡയിക്ക് കൊടിയേറ്റ് കര്‍മ്മം നിര്‍വ്വഹിക്കുന്നതായിരിക്കും.സെന്റ് ഹില്‍ഡാ ദേവാലയ വികാരി ഫാ.മൈക്കിള്‍ തിരുന്നാളിന് ആതിഥേയത്വം വഹിക്കുകയും പ്രാരംഭമായി ആശംശകള്‍ നേരുകയും ചെയ്യും.
സമൂഹ പ്രസുദേന്തി വാഴ്ച, മാതാവിന്റെ രൂപം വെഞ്ചരിക്കല്‍, ആഘോഷമായ സമൂഹ ബലി,വാഴ്വ്, പ്രദക്ഷിണം,നേര്‍ച്ച വെഞ്ചിരിപ്പ്,സമാപന ആശീര്‍വാദം തുടങ്ങിയ തിരുന്നാള്‍ തിരുക്കര്‍മ്മങ്ങള്‍ക്ക് ശേഷം സ്‌നേഹവിരുന്നും ഉണ്ടായിരിക്കുന്നതാണ്.’ക്യാറ്റകിസം ബൂസ്റ്റിങ്’ ക്ലാസ്സിന്റെ ഉദ്ഘാടനവും മാതാവിന്റെ തിരുന്നാളിനോടനുബന്ധിച്ചു നടത്തപ്പെടും.
ആഘോഷമായ തിരുന്നാള്‍ തിരുക്കര്‍മ്മങ്ങളില്‍ വെസ്റ്റ് മിന്‍സ്റ്റര്‍ അതിരൂപതയിലെ സീറോ മലബാര്‍ ചാപ്ലയിന്‍ ഫാ.സെബാസ്റ്റിയന്‍ ചാമക്കാലായില്‍ മുഖ്യ കാര്‍മ്മികത്വം വഹിക്കുന്നതാണ്.അയര്‍ലണ്ടിലെ വാട്ടര്‍ഫോര്‍ഡ് റീജിണല്‍ ഹോസ്പിറ്റല്‍ ചാപ്ലിനും,പ്രശസ്ത വചന ശുശ്രുഷകനുമായ ഫാ.സുനീഷ് മാത്യു തിരുന്നാള്‍ സന്ദേശം നല്‍കുന്നതായിരിക്കും.
സ്റ്റീവനേജില്‍ നടത്തപ്പെടുന്ന രണ്ടാമത് തിരുന്നാള്‍ ആഘോഷം കൂടുതല്‍ ഗംഭീരവും,ഭക്ത്യാദരവും ആക്കുവാനുള്ള ഒരുക്കങ്ങള്‍ പൂര്‍ത്തയായതായി തിരുന്നാള്‍ കമ്മിറ്റി അറിയിച്ചു.
പരിശുദ്ധ ദൈവമാതാവിന്റെ തിരുന്നാള്‍ ഓരോ കുടുംബത്തിനും അനുഗ്രഹത്തിന്റെ അവസരമാകുവാന്‍ പ്രാര്‍ത്ഥനയില്‍ ഒരുങ്ങിക്കൊണ്ട് തിരുനാളില്‍ പങ്കു ചേരുന്നതിലേക്ക് തിരുനാള്‍ കമ്മറ്റി ഏവരെയും സസ്‌നേഹം സ്വാഗതം ചെയ്യുന്നു.
കൂടുതല്‍ വിവരങ്ങള്‍ക്ക് ട്രസ്റ്റിമാരായ പ്രിന്‍സണ്‍ പാലാട്ടി (07429053226)
ടെറീന ഷിജി (07710176363) എന്നിവരുമായി ബന്ധപ്പെടുക.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല