സ്വന്തം ലേഖകന്‍: 9/11 സംഭവത്തിന് ഉത്തരവാദി അമേരിക്ക തന്നെ, ഒബാമ പാമ്പുകളുടെ രാജാവ്, 9/11 ആക്രമണത്തിന്റെ സൂത്രധാരന്‍ ഒബാമക്ക് എഴുതിയ കത്തിലെ രഹസ്യ വിവരങ്ങള്‍ പുറത്തായി. സെപ്തംബര്‍ 11 ആക്രമണത്തിന്റെ സൂത്രധാരനും ഇപ്പോള്‍ ഗ്വാണ്ടനാമോയില്‍ ജയില്‍പ്പുള്ളിയുമായ ഖാലിദ് ഷെയ്ഖ് മൊഹമ്മദ് മുന്‍ അമേരിക്കന്‍ പ്രസിഡന്റ് ബാരക് ഒബാമയ്ക്ക് അയച്ച കത്താണ് പുറത്തായത്. നിരപരാധികളായ അനേകം നിഷ്‌ക്കളങ്കരെ കൊന്നൊടുക്കിയ അമേരിക്കന്‍ വിദേശനയത്തിനുള്ള തിരിച്ചടിയായിരുന്നില്ലേ 9/11 എന്ന് ഖാലിദ് കത്തില്‍ ചോദിക്കുന്നു.
18 പേജുകള്‍ നീളുന്ന കത്ത് ആരംഭിക്കുന്നത് ഒബാമയെ ‘പാമ്പുകളുടെ തലവന്‍’ എന്നും ‘അതിക്രമങ്ങളുടെയും അടിച്ചമര്‍ത്തലിന്റെയും രാഷ്ട്രത്തിന്റെ പ്രസിഡന്റ് ‘ എന്നും അഭിസംബോധന ചെയ്താണ്. കത്തില്‍ 2015 ജനുവരി മാസം എന്നാണു രേഖപ്പെടുത്തിയിരിക്കുന്നത്. ഒബാമ പദവി ഒഴിയുന്നതിനു ദിവസങ്ങള്‍ക്കു മുന്‍പാണു സൈനിക കോടതിയുടെ ഉത്തരവനുസരിച്ച് ഗ്വാണ്ടനാമോ ജയിലധികൃതര്‍ കത്ത് വൈറ്റ് ഹൗസിനു കൈമാറിയത്. ക്യൂബയിലെ ഗ്വാണ്ടനാമോ തടവറയില്‍നിന്നാണ് ഇതെഴുതുന്നതെന്നും കത്തില്‍ പറയുന്നുണ്ട്.
വധശിക്ഷയെയോ ജീവപര്യന്തത്തെയോ തെല്ലും ഭയമില്ലെന്നു പറയുന്ന കത്തിനോടൊപ്പം ‘മരണത്തെ കുറിച്ചുള്ള സത്യം’ എന്ന പേരില്‍ 50 പേജുള്ള കൈയെഴുത്തുരേഖയും ചേര്‍ത്തിട്ടുണ്ട്. കത്ത് ഒബാമ പ്രസിഡന്റ് സ്ഥാനം ഒഴിയുന്നതിന് രണ്ടു ദിവസം മുമ്പാണ് കിട്ടിയത്. 9/11 അമേരിക്കക്ക് എതിരെയുള്ള യുദ്ധാരംഭം ആയിരുന്നില്ല. ന്യൂയോര്‍ക്കിലെ ഇരട്ട ഗോപുരം തകര്‍ത്ത സംഭവത്തില്‍ വിമാനം തട്ടിയെടുക്കുമ്പോള്‍ ദൈവം തങ്ങളുടെ കൂടെ ആയിരുന്നെന്നും നാഴികയ്ക്ക് 40 വട്ടവും ജനാധിപത്യവും സ്വാതന്ത്ര്യവും പറയുന്ന നിങ്ങളുടെ വല്യേട്ടന്‍ മനോഭാവത്തെ അത് വെളിച്ചത്തു കൊണ്ടുവന്നെന്നും ഖാലിദ് എഴുതുന്നു.
ഇറാഖ്, ഇറാന്‍, വിയറ്റ്‌നാം, ഹിരോഷിമ എന്നിവിടങ്ങളില്‍ അമേരിക്ക നടത്തിയ ആക്രമണങ്ങളെയും ഫലസ്തീന്‍ ജനതക്കു നേരെയുള്ള ഇസ്രാഈല്‍ നരഹത്യക്കു നല്‍കുന്ന പിന്തുണയെയും ഖാലിദ് കത്തില്‍ എടുത്തുപറയുന്നുണ്ട്. ഇതിനുള്ള മറുപടിയാണ് ആക്രമണമെന്നും കൂട്ടിച്ചേര്‍ക്കുന്നു. കുവൈത്തില്‍ ജനിച്ച പാകിസ്താന്‍ പൗരനായ ഖാലിദ് മൂന്നുവര്‍ഷം നോര്‍ത്ത് കരോലിനയില്‍ ജീവിച്ചിട്ടുണ്ട്. 1986ല്‍ എന്‍ജിനീയറിങ്ങില്‍ ബിരുദം നേടിയിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല