സ്വന്തം ലേഖകന്‍: സ്‌പൈഡര്‍മാന്‍ ഹോംകമിംഗിന് കിടിലന്‍ മലയാളം ട്രെയിലര്‍, മലയാളികള്‍ക്ക് സോണി പിക്‌ച്ചേഴ്‌സിന്റെ സമ്മാനം. ചിത്രത്തിന്റെ നിര്‍മാതാക്കളായ സോണി പിക്‌ചേഴ്‌സാണ് ട്രെയിലര്‍ പുറത്തിറക്കിയത്. സ്‌പൈഡര്‍മാന്‍ പ്രധാന കഥാപാത്രമായെത്തുന്ന സ്‌പൈഡര്‍മാന്‍ ഹോംകമിംഗില്‍ സൂപ്പര്‍ ഹീറോ കഥാപാത്രങ്ങളായ അയണ്‍മാനും ക്യാപ്റ്റന്‍ അമേരിക്കയും അതിഥി താരങ്ങളായി പ്രത്യക്ഷപ്പെടും.
മലയാളത്തിനുപുറമെ തെലുങ്ക്, തമിഴ് പതിപ്പുകളുടെ ട്രെയ്‌ലറുകളും സോണി പുറത്തിറക്കിയിട്ടുണ്ട്. സാധാരണ ഇംഗ്ലീഷ് ഡബ്ബ് സിനിമകളുടെ അത്രയും മോശമല്ല ചിത്രത്തിന്റെ ട്രെയിലര്‍ എങ്കിലും മലയാളത്തില്‍ കാണുന്നത് കുട്ടികള്‍ക്കാവും കൂടുതല്‍ ഇഷ്ടപ്പെടുക. കേരളത്തിലെ ഇംഗ്ലീഷ് സിനിമാ ആരാധകര്‍ക്ക് ഇംഗ്ലീഷ് സിനിമ ഇംഗ്ലീഷില്‍ത്തന്നെ കാണാനാണ് താല്‍പര്യമെന്നിരിക്കെ സ്‌പൈഡര്‍മാന്‍ മലയാള പരീക്ഷണത്തെ മലയാളികള്‍ എങ്ങനെ സ്വീകരിക്കുമെന്നത് കൗതുകമുണര്‍ത്തുന്ന കാര്യമാണ്.
ജോണ്‍ വാട്ട്‌സ് സംവിധാനം ചെയ്യുന്ന ചിത്രത്തിന്‍ കേന്ദ്ര കഥാപാത്രമായ സ്‌പൈഡര്‍മാനായി പ്രത്യക്ഷപ്പെടുന്നത് ടോം ഹോളണ്ടാണ്. കെവിന്‍ ഫെയ്ജും ആമി പാസ്‌കലും ചേര്‍ന്ന് നിര്‍മിക്കുന്ന ചിത്രത്തിന്റെ സംഗീതം മൈക്കല്‍ ഗിയാച്ചിനോ നിര്‍വഹിക്കുന്നു. കൊളംബിയ പിക്‌ച്ചേഴ്‌സും മാര്‍വലും എല്‍ സ്റ്റാര്‍ ക്യാപ്പിറ്റലും ചേര്‍ന്ന് ജൂലൈ 7ന് ചിത്രം പ്രദര്‍ശനത്തിനെത്തിക്കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല