സ്വന്തം ലേഖകൻ: ഫുട്‌ബോൾ ലോകം ആകാംക്ഷയോടെ കാത്തിരിക്കുന്ന ഫിഫ ഖത്തർ ലോകകപ്പ് തുടങ്ങുന്നതിന് ഇനി 200 ദിവസങ്ങൾ മാത്രം. ലോകകപ്പ് പര്യടനം നാളെ ഖത്തറിൽ ആരംഭിക്കും. മേയ് 5 മുതൽ 9 വരെ ആസ്പയർ പാർക്ക്, ലുസെയ്ൽ മറീന, സൂഖ് വാഖിഫ്, മിഷ്‌റെബ് ഡൗൺടൗൺ ദോഹ എന്നിവിടങ്ങളിൽ ട്രോഫി എത്തിച്ച് പ്രദർശനം നടത്തും. കപ്പ് ലോക പര്യയടനത്തിന് മുൻപ് ട്രോഫിക്ക് ദോഹ നൽകുന്ന യാത്രയപ്പ് പരിപാടിയാണ് ഇത്.
ലോക പര്യയടനം കഴിഞ്ഞ് നവംബർ 21ന് കപ്പ് അൽ ബെയ്തിൽ നടക്കുന്ന ലോകകപ്പ് ഉദ്ഘാടന ചടങ്ങിൽ തിരിച്ചെത്തിക്കും. അൽഖോറിലെ ട്രോഫിക്കൊപ്പം നിന്ന് ചിത്രങ്ങൾ എടുക്കാനുള്ള അവസരവും ലഭിക്കുമെന്ന് സംഘാടകരായ സുപ്രീം കമ്മിറ്റി ഫോർ ഡെലിവറി ആൻഡ് ലെഗസി ഡപ്യൂട്ടി ഡയറക്ടർ ജനറൽ ഖാലിദ് അൽ മൗലവി പറഞ്ഞു.
ട്രോഫി പര്യടന സ്ഥലങ്ങളിൽ ഫുട്‌ബോൾ രംഗത്തെ പ്രശസ്തരും പ്രത്യേക അതിഥികളും ദോഹയിൽ പങ്കെടുക്കും. കാണികൾക്കായി ഓരോ ഇടങ്ങളിലും പ്രത്യേക പരിപാടികൾ നടക്കും. ഖത്തറും ഇക്വഡോറും തമ്മിലുള്ള ലോകകപ്പ് ഉദ്ഘാടന മത്സര ടിക്കറ്റ് സ്വന്തമാക്കാനുള്ള ഒരു വലിയ അവസരം ആണ് ഈ പര്യടനത്തിലൂടെ ലഭിക്കുന്നത്. നാളെ മുതൽ ദിവസവും വൈകിട്ട് 6.00 മുതൽ രാത്രി 9.00 വരെയാണ് പൊതുജനങ്ങൾക്ക് ട്രോഫി കാണാനുള്ള അവസരം ഖത്തർ ഒരുക്കുന്നത്.
വെെകുന്നേരങ്ങളിലാണ് പൊതുജനങ്ങൾക്കുള്ള കപ്പ് പ്രദർശനം നടക്കുന്നത്. പകൽ സമയങ്ങളിൽ വിദ്യാഭ്യാസ മേഖലകളിലും ആരോഗ്യ മേഖലകളിലും വിവിധ ബിസിനസ് സ്ഥാപനങ്ങളിലും ട്രോഫി പര്യടനം നടത്തും. മേയ് 10ന് കത്താറയിൽ ട്രോഫിക്ക് പ്രത്യേക യാത്രയയപ്പ് പരിപാടിയും സംഘടിപ്പിച്ചിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല