സ്വന്തം ലേഖകൻ: കുവൈത്തില്‍ പ്രവാസികളുടെ ഡ്രൈവിംഗ് ലൈസന്‍സുകള്‍ സൂക്ഷ്മ പരിശോധനയ്ക്ക് വിധേയമാക്കുന്നതിനുള്ള നടപടികള്‍ ആരംഭിച്ച് ഒരാഴ്ച പിന്നിട്ടപ്പോഴേക്കും അനധികൃതമായി കൈവശം വയ്ക്കുന്ന 3000ത്തിലേറെ ലൈസന്‍സുകള്‍ കണ്ടെത്തിയതായി അധികൃതര്‍ അറിയിച്ചു. ജനറല്‍ ട്രാഫിക് വകുപ്പ് ഉദ്യോഗസ്ഥരെ ഉദ്ധരിച്ച് പ്രാദേശിക മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്. രാജ്യത്തെ ലക്ഷക്കണക്കിന് പ്രവാസികള്‍ അനധികൃതമായി ഡ്രൈവിംഗ് ലൈസന്‍സ് കൈവശം വയ്ക്കുന്നുവെന്ന ആരോപണത്തെ തുടര്‍ന്ന് കഴിഞ്ഞ ആഴ്ചയാണ് പ്രവാസികളുടെ ലൈസന്‍സുകള്‍ പരിശോധനയ്ക്ക് വിധേയമാക്കുന്ന നടപടികള്‍ ആരംഭിച്ചത്.
പ്രാഥമിക പരിശോധനയില്‍ നിയമ വിരുദ്ധമായി കണ്ടെത്തിയ ലൈസന്‍സുകള്‍ താല്‍ക്കാലികമായി ബ്ലോക്ക് ചെയ്തതായി അധികൃതര്‍ അറിയിച്ചു. ലൈസന്‍സ് ഉടമകളെ വിളിച്ചുവരുത്തുന്നതാണ് അടുത്ത നടപടി. ഉടമകളുമായി ബന്ധപ്പെട്ട് ആവശ്യമായ രേഖകള്‍ പരിശോധിച്ച ശേഷം ലൈസന്‍സുകള്‍ അനധികൃതമാണെന്ന് ബോധ്യപ്പെടുന്ന പക്ഷം അവ എന്നെന്നേക്കുമായി കാന്‍സല്‍ ചെയ്യും. പുനഃപരിശോധനയില്‍ നിയമവിധേയമാണെന്ന് കണ്ടെത്തുന്നവയുടെ ബ്ലോക്ക് നീക്കുകയും ചെയ്യും.
ഉപപ്രധാനമന്ത്രിയും ആഭ്യന്തര മന്ത്രിയുമായ ശെയ്ഖ് തലാല്‍ അല്‍ ഖാലിദിന്റെ നിര്‍ദ്ദേശപ്രകാരമാണ് പ്രവാസികളുടെ ഡ്രൈവിംഗ് ലൈസന്‍സുകളുടെ പരിശോധന ആരംഭിച്ചത്. ആഭ്യന്തര മന്ത്രാലയം അണ്ടര്‍ സെക്രട്ടറി (ട്രാഫിക് വിഭാഗം) മേജര്‍ ജനറല്‍ ജമാല്‍ അല്‍ സായിഗ്, ജനറല്‍ ട്രാഫിക് ഡിപ്പാര്‍ട്ട്‌മെന്റ് ഡയറക്ടര്‍ ജനറല്‍ മേജര്‍ ജനറല്‍ യൂസുഫ് അല്‍ ഖദ്ദ എന്നിവരുടെ നേതൃത്വത്തിലാണ് പ്രവാസികളുടെ ലൈസന്‍സുമായി ബന്ധപ്പെട്ട പരിശോധന നടക്കുന്നത്.
അതേസമയം, അനധികൃതമായി കണ്ടെത്തിയ ഡ്രൈവിംഗ് ലൈസന്‍സുകള്‍ വ്യാജമായി നേടിയെടുത്തതല്ലെന്ന് അധികൃതര്‍ അറിയിച്ചു. മറിച്ച് അവ നിയമ വിധേയമായി നേടിയെടുത്തവ തന്നെയാണ്. എന്നാല്‍ പിന്നീട് ജോലി മാറ്റം കാരണമോ, വീസ മാറിയത് മൂലമോ, ശമ്പളത്തിലുണ്ടായ കുറവ് കാരണമോ ഡ്രൈവിംഗ് ലൈസന്‍സിന് വേണ്ട മാനദണ്ഡങ്ങള്‍ പാലിക്കുന്നതില്‍ പരാജയപ്പെട്ടവരാണ് ഇവരിലേറെയും. 600 ദിനാര്‍ മിനിമം ശമ്പളം, സര്‍വകലാശാലാ ബിരുദം, രണ്ട് വര്‍ഷത്തില്‍ കുറയാതെ കുവൈത്തില്‍ സ്ഥിര താമസം എന്നിവയാണ് വിദേശികള്‍ക്ക് ഡ്രൈവിംഗ് ലൈസന്‍സ് ലഭിക്കുന്നതിനുള്ള പ്രധാന മാനദണ്ഡങ്ങള്‍.
ഡ്രൈവര്‍, പിആര്‍ഒ തസ്തികകളില്‍ ജോലി ചെയ്യുന്നവര്‍ക്ക് ഈ വ്യവസ്ഥകളില്‍ ഇളവുണ്ട്. എന്നാല്‍, ഇവര്‍ ഈ തസ്തികകളില്‍ നിന്ന് മാറുകയോ ശമ്പളം 600 ദിനാറില്‍ കുറയുന്ന ജോലിയിലേക്ക് മാറുകയോ ചെയ്താല്‍ നേരത്തേ ലഭിച്ച ലൈസന്‍സിന് അര്‍ഹത ഇല്ലാതാവും. ഇത്തരം സന്ദര്‍ഭങ്ങളില്‍ ലൈസന്‍സ് തിരിച്ചു നല്‍കണമെന്നാണ് വ്യവസ്ഥ. ഇങ്ങനെ വിവിധ കാരണങ്ങളാല്‍ ലൈസന്‍സിനുള്ള അര്‍ഹതാ പരിധിക്ക് പുറത്തായവരുടെ ലൈസന്‍സുകളാണ് ഇപ്പോള്‍ പരിശോധനയിലൂടെ കണ്ടെത്തി ബ്ലോക്ക് ചെയ്തിരിക്കുന്നത്.
കഴിഞ്ഞ ആഴ്ച തുടങ്ങിയ പരിശോധന രണ്ട് മാസത്തിനകം തീര്‍ക്കാനാണ് അധികൃതര്‍ ആലോചിക്കുന്നത്. ഇതിനു ശേഷം അനധികൃതമെന്ന് കണ്ടെത്തി ബ്ലോക്ക് ചെയ്ത ഡ്രൈവിംഗ് ലൈസന്‍സുകളുടെ ഉടമകളെ ട്രാഫിക് വിഭാഗം വിളിച്ചുവരുത്തുകുയം അവരുടെ പക്കലുള്ള ലൈസന്‍സുകള്‍ തിരികെ വാങ്ങുകയും ചെയ്യും. എന്നാല്‍ അധികൃതര്‍ക്ക് മുമ്പാകെ ഹാജരായി ലൈസന്‍സ് തിരികെ നല്‍കാത്തവര്‍ക്കെതിരേ നിയമ നടപടികള്‍ സ്വീകരിക്കുമെന്നും അധികൃതര്‍ അറിയിച്ചു. ഇവരുടെ കുവൈത്ത് ഐഡി കാര്‍ഡിലും സഹല്‍ ആപ്ലിക്കേഷനിലും ഇക്കാര്യം വ്യക്തമാവും. ഡ്രൈവിംഗ് ലൈസന്‍സ് തിരികെ സമര്‍പ്പിക്കുന്നതു വരെ ആഭ്യന്തര മന്ത്രാലയവുമായി ബന്ധപ്പെട്ട ഒരു ഇടപാടും നടത്താന്‍ ഇവര്‍ക്ക് സാധിക്കുകയുമില്ല.
അതേസമയം, ഡ്രൈവിംഗ് ലൈസന്‍സ് അധികൃതര്‍ക്കു മുമ്പില്‍ സറണ്ടര്‍ ചെയ്യാതെ അവ ഉപയോഗിച്ച് വാഹനമോടിക്കുന്നവര്‍ക്കെതിരേ കര്‍ശന നടപടികള്‍ സ്വീകരിക്കുമെന്നും അധികൃതര്‍ മുന്നറിയിപ്പ് നല്‍കി. ഇങ്ങനെ പിടികൂടപ്പെടുന്നവരെ അറസ്റ്റ് ചെയ്യുകയും നിയമനടപടികള്‍ക്കു ശേഷം നാടുകടത്തുകയും ചെയ്യും. അവര്‍ ഓടിച്ച വാഹനം കണ്ടുകെട്ടുകയും ചെയ്യുമെന്നും അധികൃതര്‍ അറിയിച്ചു.
കുവൈത്തില്‍ രണ്ടര ലക്ഷത്തോളം വിദേശികളുടെ ഡ്രൈവിംഗ് ലൈസന്‍സുകള്‍ അനധികൃതമാണെന്ന് നേരത്തേ റിപ്പോര്‍ട്ടുകളുണ്ടായിരുന്നു. ഇതിന്റെ അടിസ്ഥാനത്തിലാണ് അധികൃതര്‍ പരിശോധന ആരംഭിച്ചിരിക്കുന്നത്. രാജ്യത്ത് നിലവില്‍ ഏഴ് ലക്ഷത്തിലധികം വിദേശികള്‍ക്ക് കുവൈത്ത് ഡ്രൈവിംഗ് ലൈസന്‍സ് നല്‍കിയിട്ടുള്ളതായി മുതിര്‍ന്ന ആഭ്യന്തര മന്ത്രാലയം ഉദ്യോഗസ്ഥരെ ഉദ്ധരിച്ച് അല്‍ ജരീദ പത്രം റിപ്പോര്‍ട്ട് ചെയ്തു. ജനറല്‍ അഡ്മിനിസ്ട്രേഷന്‍ ഓഫ് എക്പാട്രിയറ്റ്സ് വിഭാഗത്തിന്റെ ഇന്‍ഫര്‍മേഷന്‍ സിസ്റ്റത്തില്‍ രജിസ്റ്റര്‍ ചെയ്തിരിക്കുന്ന ലൈസന്‍സുകളുടെ എണ്ണമാണ് ഇത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല