സ്വന്തം ലേഖകൻ: രാജ്യത്തെ വിദേശികളുടെ ജനസംഖ്യ നിയന്ത്രിക്കുന്നക എന്ന ലക്ഷ്യത്തോടെ സ്വദേശിവല്‍ക്കരണം ശക്തമാക്കുന്നതിന്റെ ഭാഗമായി കുവൈത്ത് അധ്യാപകരെ മാത്രം നിയമിച്ചാല്‍ മതിയെന്ന തീരുമാനം നടപ്പിലായില്ല. യോഗ്യരായ അധ്യാപകരം കിട്ടാത്തതാണ് കാരണം. പുതിയ സാഹചര്യത്തില്‍ 2023 -2024 അധ്യയന വര്‍ഷത്തേക്ക് വിദേശ രാജ്യങ്ങളില്‍ നിന്നുള്ള മികച്ച അധ്യാപക പ്രതിഭകളെ നിയമിക്കുന്നതിന് വിദ്യാഭ്യാസ മന്ത്രാലയത്തിന് കുവൈത്ത് സിവില്‍ സര്‍വീസ് കമ്മീഷന്‍ പച്ചക്കൊടി കാട്ടി. അല്‍ ജരീദ പത്രമാണ് ഇക്കാര്യം റിപ്പോര്‍ട്ട് ചെയ്തത്.
ഇതിന്റെ അടിസ്ഥാനത്തില്‍ വിദ്യാഭ്യാസ മന്ത്രാലയം അതിന്റെ റിക്രൂട്ട്മെന്റ് ഡ്രൈവ് ആരംഭിച്ചതായും പത്രം വ്യക്തമാക്കി. വിദേശ അധ്യാപകരില്‍ നിന്നുള്ള അപേക്ഷകള്‍ മന്ത്രാലയത്തിന്റെ വെബ്സൈറ്റ് വഴി സ്വീകരിക്കാന്‍ തുടങ്ങിയതായും മന്ത്രാലയം പ്രതിനിധികളെ ഉദ്ധരിച്ച് പത്രം റിപ്പോര്‍ട്ട് ചെയ്തു. പൊതുവിദ്യാഭ്യാസ സ്ഥാപനങ്ങളിലെ അധ്യാപകരായി ജോലി നോക്കുന്നതിനുള്ള പ്രാദേശിക കരാറുകള്‍ക്കായി ഉയര്‍ന്ന യോഗ്യതയുള്ള കുവൈത്ത് ഇതര അധ്യാപകരെ തേടുന്നതായി മന്ത്രാലയം അറിയിച്ചു.
ഇംഗ്ലീഷ്, ഫ്രഞ്ച്, മാത്തമാറ്റിക്‌സ്, സയന്‍സ്, ഫിസിക്‌സ്, കെമിസ്ട്രി, ബയോളജി, ജിയോളജി, ഫിലോസഫി, അറബിക്, കംപ്യൂട്ടര്‍ സയന്‍സ് എന്നീ തസ്തികളിലാണ് വിദേശികളായ പുരുഷ അധ്യാപകരെ മന്ത്രാലയം ക്ഷണിച്ചാരിക്കുന്നത്. കുവൈത്തികള്‍ അല്ലാത്തവരെ വിവാഹം കഴിച്ച കുവൈത്തിലെ സ്ത്രീകളുടെ മക്കള്‍, കുവൈത്തിലെ കോളേജ് ഓഫ് എജ്യുക്കേഷന്‍, രാജ്യത്തെ പൊതു, സ്വകാര്യ സര്‍വ്വകലാശാലകള്‍ എന്നിവിടങ്ങളില്‍ നിന്നുള്ള ബിരുദധാരികള്‍ എന്നിവര്‍ക്കും മുന്‍ഗണന നല്‍കും.
സര്‍വ്വകലാശാലകളില്‍ നിന്ന് ബിരുദം നേടിയവരും കുവൈത്തികളല്ലാത്തവരെ വിവാഹം കഴിച്ച കുവൈത്ത് സ്ത്രീകളുടെ മക്കള്‍ക്കും മാത്രമേ വനിതാ വിഭാഗത്തില്‍ അപേക്ഷിക്കാന്‍ അര്‍ഹതയുള്ളൂ എന്നും മന്ത്രാലയം വ്യക്തമാക്കി. നേരത്തേ സ്വദേശിവല്‍ക്കരണം നടപ്പിലാക്കുന്നതിന്റെ ഭാഗമായി വിദേശികളായ അധ്യാപകര്‍ ഉള്‍പ്പെടെയുള്ളവരെ റിക്രൂട്ട് ചെയ്യുന്നതിന് കുവൈത്ത് സിവില്‍ സര്‍വീസ് കമ്മീഷന്‍ നിരോധനം ഏര്‍പ്പെടുത്തിയിരുന്നു. എന്നാല്‍ ചില സ്‌പെഷ്യലൈസേഷനുകളില്‍ കുവൈത്ത് സ്വദേശികളായ അധ്യാപകരെ ലഭിക്കാത്തതോടെയാണ് വിദേശികളില്‍ നിന്ന് റിക്രൂട്ട്മെന്റ് നടത്താന്‍ കമ്മീഷന്‍ അനുവാദം നല്‍കിയിരിക്കുന്നത്.
അതിനിടെ, രാജ്യത്ത് പുതിയ മേഖലകളില്‍ സ്വദേശിവത്ക്കരണം ശക്തമാക്കാനുള്ള പുതിയ തീരുമാനവുമായി കുവൈത്ത് ഭരണകൂടം രംഗത്തെത്തി. ഈ മേഖലകളിലെ പ്രവാസി ജീവനക്കാരുടെ തൊഴില്‍ കരാറുകള്‍ അവസാനിപ്പിക്കാന്‍ വാണിജ്യ വ്യവസായ മന്ത്രാലയം അണ്ടര്‍ സെക്രട്ടറി മുഹമ്മദ് അല്‍ അന്‍സി നിര്‍ദ്ദേശം നല്‍കിയതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. വ്യവസായ- വാണിജ്യ വകുപ്പ് മന്ത്രി മാസിന്‍ അല്‍ നഹ്ദയുടെ നിര്‍ദേശ പ്രകാരമാണ് നടപടി.
ടൈപ്പിസ്റ്റ്, വിദേശ വ്യാപാരം, നിയമകാര്യങ്ങള്‍, ടെക്‌നിക്കല്‍ സപ്പോര്‍ട്ട്, ആസൂത്രണ മേഖല, ഉപഭോക്തൃ സംരക്ഷണ മേഖല, സാമ്പത്തിക കാര്യങ്ങള്‍, കോര്‍പ്പറേറ്റ് മേഖല തുടങ്ങിയ ജോലികളില്‍ പ്രവര്‍ത്തിക്കുന്ന വിദേശികളെ പിരിച്ചുവിടാനാണ് നിര്‍ദ്ദേശം നല്‍കിയിരിക്കുന്നത്. ഇതുമായി ബന്ധപ്പെട്ട് ഇവര്‍ക്ക് നോട്ടീസ് നല്‍കുകയും ചെയ്തു. നോട്ടീസ് പ്രകാരം ജൂണ്‍ 29 ന് ഇവരുടെ പ്രവൃത്തി കരാര്‍ അവസാനിക്കുമെന്നും അല്‍ റായ് പത്രം റിപ്പോര്‍ട്ട് ചെയ്തു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല