സ്വന്തം ലേഖകൻ: കുവൈത്തില്‍ വച്ചുണ്ടായ ഒരു ഫിലിപ്പിനോ വീട്ടുജോലിക്കാരിയുടെ കൊലപാതകത്തെ തുടര്‍ന്ന് ഫിലിപ്പീന്‍സ് റിക്രൂട്ട്മെന്റ് നിരോധനം ഏര്‍പ്പെടുത്തിയ പശ്ചാത്തലത്തില്‍ ഈ വര്‍ഷം അര ലക്ഷത്തോളം ഫിലിപ്പിനോകള്‍ക്ക് ജോലി നഷ്ടമാവുമെന്ന് വിലയിരുത്തല്‍. 2023-ല്‍ തന്റെ രാജ്യത്തെ സ്ത്രീ തൊഴിലാളികളായ ഏകദേശം 47,000 പേര്‍ക്ക് കുവൈത്തില്‍ തൊഴിലവസരങ്ങള്‍ നഷ്ടപ്പെടുമെന്ന് ഫിലിപ്പീന്‍സ് സര്‍ക്കാര്‍ ഉദ്യോഗസ്ഥന്‍ വെളിപ്പെടുത്തി. ഈ തൊഴിലാളികളെ കുവൈത്തിലേക്ക് അയയ്ക്കുന്നത് താല്‍ക്കാലികമായി നിര്‍ത്തിവയ്ക്കാനുള്ള തീരുമാനത്തെത്തുടര്‍ന്നാണിത്.
കഴിഞ്ഞ വര്‍ഷം കുവൈത്തിലേക്ക് 47,000 പുതിയ ഗാര്‍ഹിക തൊഴിലാളികള്‍ റിക്രൂട്ട് ചെയ്യപ്പെട്ടിരുന്നു. ഈ വര്‍ഷം മുഴുവന്‍ കുവൈത്തിലേക്ക് തൊഴിലാളികളെ അയയ്ക്കുന്നത് താല്‍ക്കാലികമായി നിര്‍ത്തിവയ്ക്കാനുള്ള തീരുമാനം അത്രയും പേരുടെ തൊഴിലവസരങ്ങള്‍ നഷ്ടപ്പെടുത്തുമെന്ന് ഫിലിപ്പീന്‍സിലെ കുടിയേറ്റ തൊഴില്‍ മന്ത്രാലയം അണ്ടര്‍സെക്രട്ടറി ഹാന്‍സ് കക്ഡക് പറഞ്ഞു. ഫിലിപ്പീന്‍സ് മാധ്യമങ്ങളെ ഉദ്ധരിച്ച് അല്‍-റായ് ദിനപത്രമാണ് ഇക്കാര്യം റിപ്പോര്‍ട്ട് ചെയ്തത്.
അതേസമയം, ഗാര്‍ഹിക തൊഴിലാളികളെ റിക്രൂട്ട് ചെയ്യുന്നത് താല്‍ക്കാലികമായി നിര്‍ത്തിവയ്ക്കാനുള്ള തീരുമാനം പുതിയ ഗാര്‍ഹിക തൊഴിലാളികളെ സംരക്ഷിക്കാന്‍ ലക്ഷ്യമിടുകയെന്ന ലക്ഷ്യത്തോടെയാണ് നടപ്പിലാക്കിയതെന്നും തൊഴിലാളികളുടെ സംരക്ഷണത്തിനുള്ള ഗ്യാരന്റികള്‍ തൊഴില്‍ കരാറുകളില്‍ ഉള്‍പ്പെടുന്നുവെന്ന് സ്ഥിരീകരിക്കുന്നത് വരെ റിക്രൂട്ട്മെന്റ് നിരോധനം പ്രാബല്യത്തില്‍ തുടരുമെന്നും അദ്ദേഹം വ്യക്തമാക്കി. നല്ല ട്രാക്ക് റെക്കോഡുകളുള്ള റിക്രൂട്ട്മെന്റ് സ്ഥാപനങ്ങള്‍ വഴി മാത്രമേ ഫിലിപ്പിനോകളെ റിക്രൂട്ട് ചെയ്യാന്‍ അനുവദിക്കൂ എന്നും അദ്ദേഹം അറിയിച്ചു.
അതേസമയം, തൊഴില്‍ പ്രതിസന്ധി തുടരുമ്പോള്‍ തന്നെ ഫെബ്രുവരി 13, 14 തീയതികളില്‍ ഫിലിപ്പീന്‍സില്‍ നിന്നുള്ള ഭക്ഷ്യ കയറ്റുമതിക്കാരുടെ ഒരു പ്രതിനിധി സംഘം കുവൈത്ത് സന്ദര്‍ശിക്കുമെന്ന് ഫിലിപ്പൈന്‍ വ്യാപാര വ്യവസായ മന്ത്രാലയം പ്രഖ്യാപിച്ചു. കുവൈറ്റും ഗള്‍ഫ് സഹകരണ കൗണ്‍സില്‍ രാജ്യങ്ങളുമായുള്ള ഫിലിപ്പീന്‍സിന്റെ സാമ്പത്തിക ബന്ധത്തെ റിക്രൂട്ട്മെന്റ് നിരോധനം ബാധിക്കില്ലെന്നും മന്ത്രാലയം പ്രഖ്യാപിച്ചു. ഫെബ്രുവരി 25 വരെ തുടരുന്ന ഗള്‍ഫ് പര്യടനത്തിന്റെ ഭാഗമായാണ് പ്രതിനിധി സംഘം കുവൈത്ത് സന്ദര്‍ശിക്കുന്നത്.
അതിനിടെ, കുവൈത്തിലും മറ്റ് മിഡില്‍ ഈസ്റ്റേണ്‍ രാജ്യങ്ങളിലും പ്രയാസകരമായ സാഹചര്യങ്ങള്‍ നേരിടുന്നവര്‍ക്ക് നിയമപരവും വൈദ്യപരവും സാമ്പത്തികവുമായ പിന്തുണ നല്‍കാന്‍ രാജ്യത്തെ സര്‍ക്കാരിനോട് ഫിലിപ്പീന്‍സ് മൈഗ്രന്റ് ഇന്റര്‍നാഷണല്‍ എന്ന സംഘടന ആവശ്യപ്പെട്ടു. ഫിലിപ്പൈന്‍ കുടിയേറ്റ തൊഴില്‍ വകുപ്പിന്റെ കണക്കുകള്‍ പ്രകാരം, 2022ല്‍ കുവൈത്തില്‍ ഫിലിപ്പീന്‍സുകാര്‍ക്കെതിരെ 24,000 അതിക്രമ കേസുകളുണ്ടായി. 2016ല്‍ ഇത് 6,500 ആയിരുന്നുവെന്നും ദിവസം കഴിയുന്തോറും അവ കൂടിക്കൂടി വരികയാണെന്നും സംഘടനയുടെ തലവന്‍ ജോവാന കണ്‍സെപ്ഷന്‍ ഒരു പ്രസ്താവനയില്‍ അറിയിച്ചു.
ജനുവരി അവസാനത്തിലായിരുന്നു കുവൈത്തിലെ മരുഭൂമിയില്‍ കത്തിക്കരിഞ്ഞ നിലയില്‍ ഫിലിപ്പിനോ ഗാര്‍ഹിക തൊഴിലാളിയായ ജുലേബി റാണാറയുടെ മൃതദേഹം കണ്ടെത്തിയത്. സംഭവത്തില്‍ കുവൈത്ത് ബാലനെ പോവിസ് അറസ്റ്റ് ചെയ്തിരുന്നു. ഇവര്‍ ജോലി ചെയ്യുന്ന വീട്ടുകാരനാണ് ബാലന്‍. യുവതിയെ ബലാല്‍സംഗം ചെയ്ത ശേഷം കൊലപ്പെടുത്തിയതാണെന്നാണ് നിഗമനം. യുവതി ഗര്‍ഭിണിയാണെന്നാണ് പോസ്റ്റ്മോര്‍ട്ടം റിപ്പോര്‍ട്ട്.
ശരീരത്തിന്റെ വിവിധ ഭാഗങ്ങളില്‍ മര്‍ദ്ദനത്തിന്റെയും വെട്ടുകളുടെയും പാടുകളും ഉണ്ടായിരുന്നതായും റിപ്പോര്‍ട്ടുകളുണ്ടായിരുന്നു. ബലാല്‍സംഗത്തിലൂടെ ഗര്‍ഭിണിയായ വിവരം പുറത്തറിയാതിരിക്കാന്‍ യുവതിയെ കൊലപ്പെടുത്തുകയും അതിനു ശേഷം തിരിച്ചറിയാതിരിക്കാന്‍ മൃതദേഹം കത്തിക്കുകയും ചെയ്തതായാണ് പോലിസ് നല്‍കുന്ന വിവരം.
അതിനിടെ, ഫിലിപ്പീന്‍സ് സര്‍ക്കാര്‍ പ്രഖ്യാപിച്ച റിക്രൂട്ട്മെന്റ് നിരോധനത്തിന്റെ പശ്ചാത്തലത്തില്‍ തൊഴിലാളി പ്രതിസന്ധി പരിഹരിക്കാന്‍ ശ്രീലങ്കയില്‍ നിന്ന് ഗാര്‍ഹിക തൊഴിലാളികളെ കൊണ്ടുവരാന്‍ കുവൈത്ത് തീരുമാനിച്ചു. ഫിലിപ്പിനോകളെക്കാള്‍ ശ്രീലങങ്കന്‍ തൊഴിലാളികളെ കൊണ്ടുവരാനുള്ള ഫീസ് 200 ദിനാര്‍ കുറവാണ് എന്നതിനാലാണിത്.
അതേസമയം, റിക്രൂട്ട്മെന്റ് നിരോധനത്തിന് പുറമെ, പ്രതിദിനം രണ്ടോ മൂന്നോ ഫിലിപ്പീന്‍സ് സ്വദേശികള്‍ രാജ്യം വിടുന്നുണ്ടെന്ന് റിക്രൂട്ട്മെന്റ് ഓഫീസുകള്‍ അറിയിച്ചു. ഈ സാഹചര്യത്തിലാണ് പ്രതിസന്ധി പരിഹരിക്കാന്‍ ശ്രീലങ്കയില്‍ നിന്ന് കൂടുതല്‍ പേരെ റിക്രൂട്ട് ചെയ്യാന്‍ അധികൃതര്‍ തീരുമാനിച്ചത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല