സ്വന്തം ലേഖകൻ: സൗദിയുടെ സ്വപ്ന പദ്ധതിയായ നിയോമിന്റെ ഭാഗമായി നിര്‍മിക്കുന്ന ദി ലൈന്‍ ഭാവിയിലേക്കുള്ള നഗരമാണെന്ന് സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരന്‍. ഡിസ്‌കവറി ചാനലിന് നല്‍കിയ അഭിമുഖത്തിലാണ് ലോകത്തിന് തന്നെ വിസ്മയമായിത്തീരുന്ന അത്യാധുനിക നഗരമായ ദി ലൈനിന്റെ വിശേഷങ്ങള്‍ സൗദി കിരീടാവകാശി പങ്കുവച്ചത്.
രാജ്യത്തിന്റെ വടക്ക് ഭാഗത്ത് നിര്‍മാണം പുരോഗമിക്കുന്ന പ്രധാന വികസന പദ്ധതിയായ നിയോമിന്റെ ഭാഗമായി നിര്‍മിക്കുന്ന ദി ലൈന്‍ ഇരുപത്തി ഒന്നാം നൂറ്റാണ്ടില്‍ നഗരജീവിതം എങ്ങനെയായിരിക്കണമെന്നതിനെ കുറിച്ചുള്ള പുതിയ നിര്‍വചനം നല്‍കുന്നതായിരിക്കുമെന്ന് അദ്ദേഹം പറഞ്ഞു. ഭാവിയില്‍ പുതിയ നാഗരികത സൃഷ്ടിക്കാനാണ് രാജ്യം ആഗ്രഹിക്കുന്നത്.
നഗരങ്ങള്‍ കെട്ടിപ്പടുക്കുന്നതിനും പുതിയ ജീവിതമാര്‍ഗങ്ങള്‍ കണ്ടെത്തിനല്‍കുന്നതിനും പുതിയ വഴികള്‍ സൃഷ്ടിക്കുകയാണ് സൗദി അറേബ്യ. ഭാവിയിയിലെ തങ്ങളുടെ വര്‍ദ്ധിച്ചുവരുന്ന ആവശ്യം നിറവേറ്റും എന്നതിനാല്‍ സൗദി അറേബ്യയിലെ ജനങ്ങള്‍ ഈ പദ്ധതിയെ വളരെയധികം പ്രതീക്ഷയോടെയാണ് ഉറ്റുനോക്കുന്നതെന്നും ഇതുമായി ബന്ധപ്പെട്ട് ഡിസ്‌കവറി ചാനല്‍ തയ്യാറാക്കിയ ഡോക്യുമെന്ററക്കായി നല്‍കിയ അഭിമുഖത്തില്‍ അദ്ദേഹം പറഞ്ഞു.
റോഡുകളോ കാറുകളോ മലിനീകരണമോ ഇല്ലാത്ത സൗദി അറേബ്യയുടെ ഭാവി നഗരമാണ് നിയോമിലെ ദി ലൈന്‍. ചരിത്രത്തിലെ ഏറ്റവും വലിയ ഇന്‍ഫ്രാസ്ട്രക്ചര്‍ പ്രോജക്റ്റായി കണക്കാക്കപ്പെടുന്ന ഇത് നഗരജീവിതത്തില്‍ ഒരു വിപ്ലവം വാഗ്ദാനം ചെയ്യുന്നുവെന്നും അദ്ദേഹം അഭിപ്രായപ്പെട്ടു. ‘ഞങ്ങള്‍ക്ക് പണമുണ്ട്. ഞങ്ങള്‍ക്ക് ഭൂമിയുണ്ട്, ഞങ്ങള്‍ക്ക് സ്ഥിരതയുള്ള ഭരണകൂടമുണ്ട്, ഞങ്ങള്‍ക്ക് നല്ല അടിസ്ഥാന സൗകര്യങ്ങളുണ്ട്, ഞങ്ങള്‍ ഒരു ജി 20 രാജ്യമാണ്,’- പദ്ധതി നടപ്പിലാക്കാനുള്ള സൗദിയുടെ അനുകൂല ഘടകങ്ങളെ കുറിച്ച് അദ്ദേഹം പറഞ്ഞു.
2030 ഓടെ സൗദി അറേബ്യയിലെ ജനസംഖ്യ 33 ദശലക്ഷത്തില്‍ നിന്ന് 50-55 ദശലക്ഷമായി ഇരട്ടിയായി വര്‍ധിക്കുമെന്നാണ് കണക്കാക്കപ്പെടുന്നത്. അപ്പോഴേക്കും, രാജ്യത്തിന്റെ നിലവിലുള്ള അടിസ്ഥാന സൗകര്യങ്ങളുടെ മുഴുവന്‍ ശേഷിയും ഉപയോഗിക്കുന്ന തരത്തില്‍ ജനസംഖ്യ ഉയരും. ഒരു പുതിയ നഗരം സൃഷ്ടിക്കേണ്ടതിന്റെ പ്രധാന്യമാണ് ഇത് വ്യക്തമാക്കുന്നത്- അദ്ദേഹം പറഞ്ഞു.
ദി ലൈന്‍’ എന്ന നേര്‍ രേഖയിലെ നഗരം എന്ന ആശയം അതിശയിപ്പിക്കുന്നതായിരുന്നു, ഇത് വളരെ വലുതും വിപുലവുമാണ്. ലോകത്തിലെ ഏറ്റവും മികച്ച ഡിസൈനര്‍മാര്‍ക്കിടയില്‍ ഇതിന്റെ രൂപകല്‍പ്പനയെ കുറിച്ച് ഒരു മത്സരം നടത്തി. ഇവരെല്ലാം ഞങ്ങള്‍ക്ക് ലഭ്യമായ മോഡലുകള്‍ക്ക് അനുസൃതമായ നഗര മോഡലുകള്‍ നല്‍കി. എന്നാല്‍ പരമ്പരാഗതമായ വൃത്താകൃതിയിലുള്ള നഗര രൂപകല്‍പ്പനയ്ക്കു പകരം നേര്‍രേഖയില്‍ നഗരം നിര്‍മിക്കാമെന്ന ആശയമാണ് അംഗീകരിക്കപ്പെട്ടതെന്നും അദ്ദേഹം ദി ലൈന്‍ എന്ന ആശയം ഉരുത്തിരിഞ്ഞു വന്നതിനെ കുറിച്ച് അദ്ദേഹം പറഞ്ഞു.
നിയോമിലെ ലൈന്‍ ഉള്‍പ്പെടെയുള്ള രാജ്യത്തിന്റെ മെഗാപ്രോജക്റ്റുകളുടെ പ്രായോഗികതയെ കുറിച്ച് സംശയം പ്രടിപ്പിക്കുന്നവരും അത് നിര്‍മ്മിക്കാന്‍ കഴിയില്ലെന്ന് കരുതന്നവരും നിരവധിയുണ്ട്. എന്നാല്‍ അവരത് പറഞ്ഞുകൊണ്ടേയിരിക്കട്ടെ. ഞങ്ങള്‍ അത് നിര്‍മിക്കുകയും അത് സാധ്യമാണെന്ന് അവര്‍ക്കു മുമ്പില്‍ തെളിയിച്ചുകൊടുക്കുകയും ചെയ്യും- മുഹമ്മദ് ബിന്‍ സല്‍മാന്‍ രാജകുമാരന്‍ അഭിമുഖത്തില്‍ പറഞ്ഞു.
170 കിലോമീറ്റര്‍ ദൈര്‍ഘ്യമുള്ള നഗരമാണ് വിപ്ലവകരമായ ദ ലൈന്‍ പദ്ധതി. ഇവിടെ ഒരു കോടി ആളുകള്‍ക്ക് താമസിക്കാനാകുമെന്നാണ് പ്രതീക്ഷ. 500 ബില്യണ്‍ ഡോളര്‍ ചെലവില്‍ നിര്‍മിക്കുന്ന സൗദിയുടെ സ്വപ്ന പദ്ധതിയായ നിയോമിന്റെ പ്രധാന ഭാഗമായിരിക്കും ദി ലൈന്‍. കാറുകളും കാര്‍ബണ്‍ പുറന്തള്ളലും ഇല്ലാത്ത നഗരം പൂര്‍ണ്ണമായും ശുദ്ധ ഊര്‍ജ്ജത്തിലാണ് പ്രവര്‍ത്തിക്കുക. നഗരത്തിന്റെ പ്രവര്‍ത്തനങ്ങളില്‍ ആര്‍ട്ടിഫിഷ്യല്‍ ഇന്റലിജന്‍സിനായിരിക്കും പ്രാമുഖ്യമെന്നും അദ്ദേഹം അറിയിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല