സ്വന്തം ലേഖകൻ: രാജ്യത്ത് ഓണ്‍ലൈന്‍ തട്ടിപ്പുകള്‍ വ്യാപകാകുന്നതായുള്ള പോലീസിന്റെ മുന്നറിയിപ്പുകള്‍ക്കിടെ, ദുബായില്‍ ഓണ്‍ലൈനായി ബര്‍ഗറും ഫ്രൈകളും ഓര്‍ഡര്‍ ചെയ്ത പ്രവാസി യുവാവിന് നഷ്ടമായത് 4,848 ദിര്‍ഹം. കഴിഞ്ഞ ദിവസമുണ്ടായ ഈ ദുരനുഭവം പ്രവാസി തന്നെയാണ് സാമൂഹിക മാധ്യമ അക്കൗണ്ട് വഴി പുറത്തുവിട്ടത്.
ഒരു ജനപ്രിയ ഫാസ്റ്റ് ഫുഡ് ശൃംഖലയുടെ ആധികാരിക വെബ്സൈറ്റാണെന്ന് കരുതിയാണ് അതില്‍ നിന്ന് നിന്ന് ബര്‍ഗറുകള്‍, ഫ്രൈകള്‍, ശീതളപാനീയങ്ങള്‍, കളിപ്പാട്ടങ്ങള്‍ എന്നിവ യുവാവ് ഓര്‍ഡര്‍ ചെയ്തത്. വമ്പിച്ച ഡിസ്‌കൗണ്ട് ഓഫറുണ്ടായിരുന്നതിനാല്‍ ആകെ 37 ദിര്‍ഹം മാത്രമായിരുന്നു ബില്ലായി കാണിച്ചത്. എന്നാല്‍ തുക പേ ചെയ്തപ്പോള്‍ അക്കൗണ്ടില്‍ നിന്ന് പോയത് 4,848 ദിര്‍ഹം. എന്നു മാത്രമല്ല, ഓര്‍ഡര്‍ ചെയ്ത ഭക്ഷണമാവട്ടെ, വീട്ടില്‍ എത്തിയതുമില്ല.
ജൂണ്‍ 26നാണ് ഫാസ്റ്റ്ഫുഡ് റെസ്റ്റോറന്റിന്റേത് എന്ന രീതിയില്‍ ഒരു പോപ്പ്-അപ്പ് പരസ്യം ശ്രദ്ധയില്‍പ്പെടുന്നത്. മികച്ച ഡിസ്‌കൗണ്ട് ഓഫറുകള്‍ അടങ്ങിയ ലിങ്ക് യുവാവ് ക്ലിക്ക് ചെയ്തു. അന്ന് നടത്തുന്ന പര്‍ച്ചേസുകള്‍ക്ക് 50 ശതമാനം കിഴിവായിരുന്നു ഓഫര്‍. ഇത് ഒരു മികച്ച ഓഫറാണെന്ന് കരുതിയ യുവാവ് ഇത് പ്രയോജനപ്പെടുത്താന്‍ തീരുമാനിക്കുകയായിരുന്നു.
ബര്‍ഗര്‍ ഉള്‍പ്പെടെയുള്ള ഭക്ഷണസാധനങ്ങളും ടോയ്‌സും ഓര്‍ഡര്‍ ചെയ്‌തെങ്കിലും 37 ദിര്‍ഹം മാത്രമേ അടക്കേണ്ടിവന്നുള്ളൂ. ഈ തുക ക്ലിക്ക് ചെയ്ത ശേഷം മൊബൈലില്‍ വന്ന ഒടിപി നല്‍കിയപ്പോഴാണ് താന്‍ വഞ്ചിക്കപ്പെട്ടുവെന്ന് ഇദ്ദേഹം മനസ്സിലാക്കിയത്. കാരണം 37 ദിര്‍ഹമിന് പകരം അക്കൗണ്ടില്‍ നിന്ന് ഡെബിറ്റായത് 4,848 ദിര്‍ഹമായിരുന്നു. ഇത്രയും തുകയുടെ ഇടപാട് നടത്തിയതായി ബാങ്കില്‍ നിന്ന് ഒരു സന്ദേശവും ലഭിച്ചു.
ബാങ്ക് ബാലന്‍സ് പരിശോധിച്ചപ്പോള്‍ ഇത്രയും തുക അക്കൗണ്ടില്‍ നിന്ന് പോയതായി മനസ്സിലായി. എന്നാല്‍ ഓര്‍ഡര്‍ ചെയ്ത ഭക്ഷണം ഉള്‍പ്പെടെയുള്ള സാധനങ്ങള്‍ വീട്ടില്‍ എത്തിയതുമില്ലെന്നും യുവാവ് നിരാശയോടെ പറഞ്ഞു. ഇത്തരം തട്ടിപ്പുകള്‍ വ്യാപകമാണെന്നും ഓണ്‍ലൈന്‍ സ്ഥാപനങ്ങളുടെ ആപ്പുകള്‍ വഴിയല്ലാതെ പോപ്പ് അപ്പ് ലിങ്കുകള്‍ വഴി സാധനങ്ങള്‍ ഓര്‍ഡര്‍ ചെയ്യരുതെന്നും ദുബായ് പോലിസ് അറിയിച്ചു.
ഇത്തരം ലിങ്കുകള്‍ അക്കൗണ്ടുകള്‍ ഹാക്ക് ചെയ്യുന്നതിനുള്ള വൈറസുകള്‍ അടങ്ങിയിരിക്കാന്‍ സാധ്യതയുണ്ട്. എന്നു മാത്രമല്ല, സ്ഥാപനത്തിന്റെ അക്കൗണ്ടുകള്‍ വഴിയല്ല ഓര്‍ഡര്‍ നല്‍കിയത് എന്നതിനാല്‍ സ്ഥാപനവുമായി ബന്ധപ്പെടാനുള്ള അവസരവും ലഭിക്കില്ലെന്നും അധികൃതര്‍ വ്യക്തമാക്കി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല