സ്വന്തം ലേഖകൻ: കിങ് ഫഹദ് കോസ്വേ സൗദിയിലേക്കും ബഹ്‌റൈനിലേക്കും യാത്ര ചെയ്യുന്നവര്‍ ആവശ്യമായ രേഖകള്‍ കൈയില്‍ കരുതണമെന്ന് അധികൃതര്‍ വ്യക്തമാക്കി. ഈദ് അല്‍ അദ്ഹ പ്രമാണിത് കോസ് വേ വഴി സഞ്ചരിക്കുന്ന യാത്രക്കാരുടെ എണ്ണം വലിയ തോതില്‍ വര്‍ധിച്ച സാഹചര്യത്തിലാണ് കിങ് ഫഹദ് കോസ്വേ അതോറിറ്റി (കെഎഫ്സിഎ) ഇതുമായി ബന്ധപ്പെട്ട നിര്‍ദ്ദേശം നല്‍കിയത്.
ആവശ്യമായ രേഖകളില്ലാതെ യാത്ര ചെയ്യുന്നത് ഗതാഗതത്തിന്റെ ഒഴുക്കിനെ തടസ്സപ്പെടുത്താന്‍ ഇടയുണ്ടെന്ന് എന്നതിനാലാണ് ഈ മുന്നറിയിപ്പ്. ബഹ്റൈന്‍ പൗരന്മാര്‍ മൂന്ന് മാസത്തില്‍ കുറയാത്ത സാധുതയുള്ള അവരുടെ യഥാര്‍ത്ഥ ഐഡി കാര്‍ഡുകള്‍ കൈവശം വയ്ക്കണമെന്നതാണ് നിബന്ധനകളിലൊന്ന്. അല്ലെങ്കില്‍ മൂന്ന് മാസത്തില്‍ കുറയാത്ത സാധുതയുള്ള പാസ്പോര്‍ട്ട് കൈയിലുണ്ടാവണമെന്ന് കെഎഫ്സിഎ പ്രസ്താവനയില്‍ പറഞ്ഞു.
ബഹ്റൈന്‍ പൗരന്മാരെ അനുഗമിക്കുന്ന ഗാര്‍ഹിക തൊഴിലാളികള്‍ക്ക് സാധുവായ റസിഡന്‍സ് പെര്‍മിറ്റുകളും സാധുവായ പാസ്പോര്‍ട്ടുകളും എക്സിറ്റ്, റീ-എന്‍ട്രി വീസകളും ഉണ്ടായിരിക്കണം. കൂടാതെ സൗദി അറേബ്യയില്‍ പ്രവേശിക്കുന്നതിനുള്ള മെഡിക്കല്‍ ഇന്‍ഷുറന്‍സ് രേഖകളും ആവശ്യമാണ്.
ബഹ്റൈനും സൗദി അറേബ്യക്കും ഇടയില്‍ യാത്ര ചെയ്യാന്‍ ആഗ്രഹിക്കുന്ന പ്രവാസികള്‍ സാധുതയുള്ള റസിഡന്‍സ് പെര്‍മിറ്റും ആറ് മാസത്തില്‍ കുറയാത്ത കാലാവധിയുള്ള പാസ്പോര്‍ട്ടും കൈവശം വയ്ക്കണം. അതോടൊപ്പം എക്സിറ്റ്, റീ-എന്‍ട്രി വീസയും അനിവാര്യമാണ്. എല്ലാ യാത്രക്കാരും കോസ്വേ മുറിച്ചുകടക്കുമ്പോള്‍ അവര്‍ സഞ്ചരിക്കുന്ന വാഹനത്തിന്റെ രേഖകള്‍ കൈവശം വയ്ക്കണം.
വാഹനത്തിന്റെ ഡ്രൈവര്‍ക്കുള്ള സാധുവായ ഡ്രൈവിംഗ് ലൈസന്‍സ്, സാധുവായ വാഹന ഉടമസ്ഥാവകാശ സര്‍ട്ടിഫിക്കറ്റ്, അല്ലെങ്കില്‍ യോഗ്യതയുള്ള അധികാരികള്‍ സാക്ഷ്യപ്പെടുത്തിയ വാഹനത്തിന്റെ യഥാര്‍ത്ഥ ഉടമയില്‍ നിന്നുള്ള അംഗീകാര സര്‍ട്ടിഫിക്കറ്റ് എന്നിവ ഇതില്‍ ഉള്‍പ്പെടും. ‘ജിസ്ര്‍’ ആപ്ലിക്കേഷനിലൂടെ നല്‍കുന്ന ഇലക്ട്രോണിക് പേയ്മെന്റ് സേവനങ്ങളില്‍ നിന്ന് പ്രയോജനം നേടുന്നതിന് പുറമേ, കാത്തിരിപ്പ് ഒഴിവാക്കാന്‍ വാഹനത്തിന്റെ മുന്‍കൂര്‍ ഇന്‍ഷുറന്‍സ് ഉണ്ടായിരിക്കേണ്ടതിന്റെ പ്രാധാന്യവും പ്രസ്താവന ഊന്നിപ്പറഞ്ഞു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല