സ്വന്തം ലേഖകൻ: അര്‍ധവാര്‍ഷിക സ്വദേശിവല്‍ക്കരണ നിയമം പാലിക്കാത്ത സ്വകാര്യ സ്ഥാപനങ്ങള്‍ക്ക് ശനിയാഴ്ച മുതല്‍ പിഴ ചുമത്തുമെന്ന് യുഎഇ ഹ്യൂമന്‍ റിസോഴ്‌സസ് ആന്‍ഡ് എമിറേറ്റൈസേഷന്‍ മന്ത്രാലയം അറിയിച്ചു. അമ്പതോ അതിലധികമോ ജീവനക്കാരുള്ള സ്വകാര്യ മേഖലയിലെ കമ്പനികള്‍ വൈദഗ്ധ്യമുള്ള റോളുകളില്‍ ജോലി ചെയ്യുന്ന എമിറാത്തികളുടെ എണ്ണം 1% വര്‍ധിപ്പിക്കണമെന്നാണ് അര്‍ധവാര്‍ഷിക സ്വദേശിവല്‍ക്കരണ നിയമം.
സ്വദേശിവല്‍ക്കരണ തോത് പാലിക്കാത്ത സ്ഥാപനങ്ങള്‍ക്ക് ജൂലൈ 8 മുതല്‍ കുറവു വരുന്ന ഓരോ സ്വദേശി ജീവനക്കാരനും 42,000 ദിര്‍ഹം എന്ന തോതില്‍ പിഴ ചുമത്തും. സ്വകാര്യമേഖലാ കമ്പനികള്‍ക്ക് വൈദഗ്ധ്യമുള്ള റോളുകളില്‍ ജോലി ചെയ്യുന്ന എമിറാത്തികളുടെ എണ്ണത്തില്‍ 1 ശതമാനം വളര്‍ച്ച രേഖപ്പെടുത്താനുള്ള സമയപരിധി ജൂലൈ 7 വെള്ളിയാഴ്ചയാണെന്ന് മന്ത്രാലയം ആവര്‍ത്തിച്ചു.
വലിയ കമ്പനികളും സ്ഥാപനങ്ങളും എല്ലാ വര്‍ഷവും രണ്ടു ശതമാനം സ്വദേശികളെ ജോലിക്ക് എടുക്കണമെന്നാണ് നിയമം. 2026 വരെ കമ്പനികള്‍ ഇത് തുടരണം. രണ്ട് ശതമാനമെന്ന വാര്‍ഷിക ലക്ഷ്യം രണ്ടായി വിഭജിച്ച് അര്‍ധവാര്‍ഷികത്തില്‍ ഒരു ശതമാനം സ്വദേശിവല്‍ക്കരണ തോതും പാലിക്കേണ്ടതുണ്ട്. ഈ വര്‍ഷം, അറഫ ദിനവും വലിയ പെരുന്നാള്‍ അവധികളും കണക്കിലെടുത്ത് അര്‍ധ വാര്‍ഷിക സ്വദേശിവല്‍ക്കരണ ലക്ഷ്യങ്ങള്‍ കൈവരിക്കുന്നതിനുള്ള സമയപരിധി ജൂണ്‍ 30ല്‍ നിന്ന് ജൂലൈ 7 വരെ മന്ത്രാലയം നീട്ടുകയായിരുന്നു.
2022ലെ സ്വദേശിവല്‍ക്കരണ ലക്ഷ്യങ്ങള്‍ കൈവരിക്കുന്നതില്‍ പരാജയപ്പെട്ട സ്വകാര്യ കമ്പനികള്‍ക്ക് ഹ്യൂമന്‍ റിസോഴ്‌സസ് ആന്‍ഡ് എമിറേറ്റൈസേഷന്‍ മന്ത്രാലയം 400 ദശലക്ഷം ദിര്‍ഹം പിഴ ചുമത്തിയിരുന്നു. എല്ലാ വര്‍ഷവും, ടാര്‍ഗെറ്റ് പൂര്‍ത്തീകരിക്കാത്തതിന്റെ പിഴ ഒരു സ്വദേശിയുടെ കുറവിന് പ്രതിമാസം 1,000 ദിര്‍ഹം വീതം വര്‍ധിപ്പിക്കും. കഴിഞ്ഞ വര്‍ഷം 6,000 ദിര്‍ഹമായിരുന്നു പിഴ. ഈ വര്‍ഷം 7,000 ദിര്‍ഹമാണ്. ഇത് 2024ല്‍ 8,000 ദിര്‍ഹമായും 2025ല്‍ 9,000 ദിര്‍ഹമായും 2026ല്‍ 10,000 ദിര്‍ഹമായും ഉയരും.
സ്വദേശിവല്‍ക്കരണ ലക്ഷ്യങ്ങള്‍ ഇതുവരെ കൈവരിക്കാത്ത സ്ഥാപനങ്ങള്‍ സ്വദേശി ജോലിക്കാരെ കണ്ടെത്താന്‍ സഹായിക്കുന്ന നാഫിസ് പ്ലാറ്റ്‌ഫോം ഉപയോഗപ്പെടുത്തണമെന്ന് മന്ത്രാലയം ആവശ്യപ്പെട്ടു. ഈ വര്‍ഷത്തിന്റെ രണ്ടാം പകുതിയിലും നൈപുണ്യമുള്ള ജോലികളില്‍ ഒരു ശതമാനം സ്വദേശികളെ അമ്പതോ അതിലധികമോ ജീവനക്കാരുള്ള സ്വകാര്യമേഖലാ കമ്പനികള്‍ ജോലിക്ക് വയ്‌ക്കേണ്ടതുണ്ട്.
സ്വദേശിവല്‍ക്കരണ നിയമം നടപ്പാക്കിയതോടെ സ്വകാര്യ മേഖലാ സ്ഥാപനങ്ങളില്‍ ജോലി ചെയ്യുന്ന യുഎഇ പൗരന്മാരുടെ എണ്ണം വര്‍ധിച്ചിട്ടുണ്ട്. മെയ് മാസത്തില്‍ പുറത്തുവിട്ട കണക്കുകള്‍ പ്രകാരം, 66,000 ഇമാറാത്തികള്‍ ഇപ്പോള്‍ സ്വകാര്യമേഖലയില്‍ ജോലി ചെയ്യുന്നുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല