സ്വന്തം ലേഖകൻ: 2025ല്‍ പറന്നുയരാന്‍ ഒരുങ്ങുന്ന സൗദി അറേബ്യയുടെ പുതിയ വിമാന കമ്പനിയായ റിയാദ് എയര്‍ റിക്രൂട്ട്‌മെന്റ് നടപടികള്‍ ആരംഭിച്ചു. ഇതിന്റെ ആദ്യപടിയായി പൈലറ്റുമാരില്‍ നിന്ന് അപേക്ഷ ക്ഷണിച്ചു. സൗദി പബ്ലിക് ഇന്‍വെസ്റ്റ്‌മെന്റ് ഫണ്ട് (പിഐഎഫ്) ആണ് എയര്‍ലൈനിനു പിന്നില്‍.
തങ്ങളുടെ ടീമില്‍ ചേരുന്നതിനുള്ള ആദ്യ പൈലറ്റുമാരെ തിരയുകയാണെന്നും എയര്‍ലൈന്‍ ആരംഭിക്കുന്നത് വരെ പരിശീലനം നല്‍കി ജോലിയില്‍ പ്രവേശിക്കാന്‍ അവസരം നല്‍കുമെന്നും റിയാദ് എയര്‍ ചീഫ് ഓപ്പറേറ്റിംഗ് ഓഫീസര്‍ പീറ്റര്‍ ബെല്ല്യൂ പറഞ്ഞു.
ബോയിംഗ് 787-9 അല്ലെങ്കില്‍ ബോയിംഗ് 777 വിമാനങ്ങള്‍ പറത്തി പരിചയമുള്ളവര്‍ക്കാണ് അവസരം. ഓണ്‍ലൈനില്‍ വിശദവിവരങ്ങളും അപേക്ഷ നല്‍കാനുള്ള മാര്‍ഗങ്ങളും നല്‍കിയിട്ടുണ്ടെന്നും അടുത്ത രണ്ടാഴ്ചയ്ക്കുള്ളില്‍ ഉദ്യോഗാര്‍ത്ഥികളുമായി ബന്ധപ്പെടുമെന്നും അദ്ദേഹം അറിയിച്ചു.
റിയാദ് എയര്‍ കഴിഞ്ഞ ഏപ്രിലില്‍ മള്‍ട്ടിബില്യണ്‍ ഡോളര്‍ ഇടപാടിലൂടെ 72 ബോയിംഗ് 787-9 ഡ്രീംലൈനര്‍ വിമാനങ്ങള്‍ ഓര്‍ഡര്‍ ചെയ്തിരുന്നു. 2030ഓടെ 787 ഡ്രീം ലൈനറുകളുടെ എണ്ണം 121 ആയി ഉയര്‍ത്താനാണ് നീക്കം. ബോയിങ്ങിന്റെ ചരിത്രത്തിലെ അഞ്ചാമത്തെ ഏറ്റവും വലിയ വാണിജ്യ ഓര്‍ഡറായിരിക്കും ഇത്.
2030ഓടെ മൊത്തത്തില്‍, 330 ദശലക്ഷം യാത്രക്കാര്‍ക്ക് സേവനം നല്‍കാനും 100 ദശലക്ഷം സന്ദര്‍ശകരെ ആകര്‍ഷിക്കാനുള്ള രാജ്യത്തിന്റെ ലക്ഷ്യത്തെ പിന്തുണയ്ക്കുന്നതിനാണ് പബ്ലിക് ഇന്‍വെസ്റ്റ്‌മെന്റ് ഫണ്ട് പരിശ്രമിക്കുന്നത്. പൈലറ്റുമാര്‍ക്കുള്ള അഭിമുഖം 2023 സെപ്റ്റംബറില്‍ ആരംഭിക്കും.
2024 ജനുവരിയില്‍ മുതലാണ് ജീവനക്കാരുടെ ഔപചാരിക തൊഴില്‍ പ്രവേശനം ആരംഭിക്കുക. അടുത്ത മൂന്ന് വര്‍ഷത്തിനുള്ളില്‍ 700 പൈലറ്റുമാരെ നിയമിക്കും. കൊറോണ പകര്‍ച്ചവ്യാധിക്ക് ശേഷം ലോകമെമ്പാടുമുള്ള എയര്‍ലൈന്‍ ഇന്‍ഡസ്ട്രി ശക്തമായി തിരിച്ചുവരുന്നതിന്റെ സൂചനകള്‍ എല്ലായിടത്തും പ്രകടമാണ്.
കഴിഞ്ഞ മെയ് മാസത്തില്‍ ഫ്‌ളൈ ദുബായ് ഈ വര്‍ഷം ആയിരത്തിലധികം ജീവനക്കാരെ നിയമിക്കുമെന്ന് പ്രഖ്യാപിച്ചിരുന്നു. ലോകത്തിലെ പ്രമുഖ വിമാന കമ്പനികളിലൊന്നായ എമിറേറ്റ്‌സ് നൂറു കണക്കിന് ജീവനക്കാരെ റിക്രൂട്ട് ചെയ്യാന്‍ രണ്ടു ദിവസം മുമ്പ് തീരുമാനിച്ചിരുന്നു.
ക്യാബിന്‍ ക്രൂ, പൈലറ്റുമാര്‍, കസ്റ്റമര്‍ സര്‍വീസ് സ്റ്റാഫ്, എഞ്ചിനീയര്‍മാര്‍ എന്നിവരെ നിയമിക്കുന്നതിനുള്ള ഒരു വലിയ റിക്രൂട്ട്‌മെന്റ് ഡ്രൈവാണ് ദുബായിലെ എമിറേറ്റ്‌സ് ഗ്രൂപ്പ് പ്രഖ്യാപിച്ചത്. ഗ്രൂപ്പിന്റെ രണ്ട് സ്ഥാപനങ്ങളായ എമിറേറ്റ്‌സ് എയര്‍ലൈന്‍സിനും എയര്‍പോര്‍ട്ട് സര്‍വീസ് പ്രൊവൈഡറായ ഡിനാറ്റയ്ക്കും വേണ്ടിയാണ് പുതിയ ജീവനക്കാരെ റിക്രൂട്ട് ചെയ്യുന്നത്.
എമിറേറ്റ്‌സ് കമ്പനിയുടെ ശൃംഖല വികസിപ്പിക്കുന്നതിനനുസരിച്ച് പിന്നീട് പുതിയ ജീവനക്കാരെ റിക്രൂട്ട് ചെയ്യാനും തീരുമാനിച്ചിട്ടുണ്ട്. അടുത്ത വര്‍ഷം എയര്‍ബസ് എ-350, ബോയിംഗ് 777എക്‌സ് എന്നീ ഗണത്തില്‍പെട്ട പുതിയ വിമാനങ്ങള്‍ എമിറേറ്റ്‌സ് വാങ്ങുന്നുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല