സ്വന്തം ലേഖകൻ: വീസ അപേക്ഷകളുമായി ബന്ധപ്പെട്ട നടപടികള്‍ ചെയ്യുന്ന വിഎഫ്എസ് ഗ്ലോബലിന്റെ ഭാഗമാണെന്ന് അവകാശപ്പെടുന്ന ‘ഏജന്റുമാര്‍’ക്കെതിരേ യുഎഇ നിവാസികള്‍ക്ക് മുന്നറിയിപ്പ്. അപേക്ഷകര്‍ക്ക് വീസയുമായി ബന്ധപ്പെട്ട ഉപദേശങ്ങളോ സേവനങ്ങളോ നല്‍കുന്നതിന് ഒരു ഏജന്റുമാരെയും നിയമിച്ചിട്ടില്ലെന്ന് വിഎഫ്എസ് ഗ്ലോബല്‍ അറിയിച്ചു.
ട്രാവല്‍ കമ്പനികള്‍ക്കും ടൈപ്പിംഗ് ഓഫീസുകള്‍ക്കും ഫ്‌ളൈറ്റ് ബുക്കിംഗ്, ഇന്‍ഷുറന്‍സ് ഏജന്റുമാര്‍ക്കും നല്‍കുന്ന ഫീസുകള്‍ക്ക് കമ്പനി ഉത്തരവാദിയായിരിക്കില്ലെന്ന് വിഎഫ്എസ് ഗ്ലോബല്‍ വ്യക്തമാക്കി. വിഎഫ്എസ് ഗ്ലോബല്‍ വഴി ഡസന്‍ കണക്കിന് രാജ്യങ്ങളിലേക്ക് വീസക്ക് അപേക്ഷിക്കുന്ന യുഎഇ നിവാസികള്‍ക്കാണ് കമ്പനി മുന്നറിയിപ്പ് നല്‍കിയത്.
ഏജന്റുമാരെന്ന് അവകാശപ്പെടുന്നവരില്‍ നിന്ന് ഒരു തരത്തിലും സഹായം സ്വീകരിക്കരുത്. അപേക്ഷകര്‍ക്ക് വീസയുമായി ബന്ധപ്പെട്ട ഉപദേശങ്ങളോ സേവനങ്ങളോ നല്‍കുന്ന യുഎഇയിലെ ട്രാവല്‍ കമ്പനികള്‍, ടൈപ്പിംഗ് ഓഫീസുകള്‍, ഫ്‌ലൈറ്റ് ബുക്കിംഗിനുള്ള ഏജന്റുമാര്‍, ട്രാവല്‍ ഇന്‍ഷുറന്‍സ് എന്നിവയുമായി വിഎഫ്എസ് ഗ്ലോബലിന് യാതൊരു ബന്ധവുമില്ലെന്ന് കമ്പനി പ്രസ്താവനയില്‍ പറഞ്ഞു. ഏതെങ്കിലും ഏജന്റുമാരില്‍ നിന്ന് വീസയുമായി ബന്ധപ്പെട്ട് അപേക്ഷകര്‍ക്ക് ലഭിക്കുന്ന ഉപദേശത്തിനോ സേവനത്തിനോ വിഎഫ്എസ് ഗ്ലോബല്‍ ഉത്തരവാദിയായിരിക്കില്ല.
ഓസ്ട്രിയ, ബെല്‍ജിയം, ക്രൊയേഷ്യ, ചെക്ക് റിപ്പബ്ലിക്, ഡെന്‍മാര്‍ക്ക്, എസ്റ്റോണിയ, ഫിന്‍ലാന്‍ഡ്, ഫ്രാന്‍സ്, ജര്‍മ്മനി, ഗ്രീസ്, ഹംഗറി, ഇറ്റലി, ലാത്വിയ, ലിത്വാനിയ, മാള്‍ട്ട, നോര്‍വേ, പോര്‍ച്ചുഗല്‍, സ്ലൊവാക്യ, സ്വീഡന്‍, നെതര്‍ലാന്‍ഡ്, സ്വിറ്റ്‌സര്‍ലന്‍ഡ് എന്നിവിടങ്ങളിലേക്ക് വിഎഫ്എസ് ഗ്ലോബല്‍ ഷെഞ്ചന്‍ വീസ സേവനങ്ങള്‍ വാഗ്ദാനം ചെയ്യുന്നുണ്ട്.
അപേക്ഷകരെ ഏജന്റുമാരിലേക്കോ ട്രാവല്‍ കമ്പനികളിലേക്കോ ടൈപ്പിംഗ് ഓഫീസുകളിലേക്കോ പറഞ്ഞയക്കരുതെന്ന് തങ്ങളുടെ ജീവനക്കാര്‍ക്ക് നിര്‍ദ്ദേശം നല്‍കിയതായി കമ്പനി വ്യക്തമാക്കി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല