സ്വന്തം ലേഖകൻ: അയർലൻഡിലെ കോര്‍ക്കിന് സമീപം വില്‍ട്ടണില്‍ മലയാളി യുവതി കുത്തേറ്റ് മരിച്ചു. പാലക്കാട് സ്വദേശിനിയായ ദീപ (38) ആണ് കൊല്ലപ്പെട്ടത്. വിൽട്ടൺ കാര്‍ഡിനാള്‍ കോര്‍ട്ടിലെ വീട്ടില്‍ ഇന്നലെ വൈകുന്നേരം യുവതിയും ഭര്‍ത്താവും തമ്മിലുണ്ടായ വാക്കേറ്റത്തെ തുടര്‍ന്നാണ് സംഭവമെന്നാണ് പ്രാഥമിക വിവരം സൂചിപ്പിക്കുന്നത്. വെള്ളിയാഴ്ച രാത്രി 10 മണി കഴിഞ്ഞ് അപകട സൂചന ലഭിച്ചതിനെ തുടര്‍ന്ന് അത്യാഹിത വിഭാഗങ്ങള്‍ സംഭവ സ്ഥലത്തേക്ക് എത്തുകയായിരുന്നു. അപ്പോഴേക്കും യുവതിയുടെ മരണം സംഭവിച്ചു കഴിഞ്ഞു.
പാലക്കാട് സ്വദേശിനിയായ ഇവർ കോർക്കിൽ അക്കൗണ്ടന്റ് ആയി ജോലി ചെയ്യുകയായിരുന്നു എന്നാണ് പ്രാഥമിക വിവരം. ഇവര്‍ക്ക് അഞ്ച് വയസുള്ള മകനുണ്ട്. സാങ്കേതിക പരിശോധനകൾക്കായി സംഭവസ്ഥലം സീല്‍ ചെയ്തിട്ടുണ്ട്. സ്റ്റേറ്റ് പാത്തോളജിസ്റ്റിന്റെ ഓഫീസില്‍ നിന്നുള്ള സംഘം സ്ഥലത്തെത്തി പരിശോധനകള്‍ പൂര്‍ത്തിയാക്കിയ ശേഷം മൃതദേഹം കോര്‍ക്ക് യൂണിവേഴ്സിറ്റി ഹോസ്പിറ്റലിലേക്ക് മാറ്റി. സംഭവവുമായി ബന്ധപ്പെട്ട് സംഭവസ്ഥലത്ത് നിന്ന് അറസ്റ്റിലായ നാല്‍പ്പത്തിയൊന്ന് വയസ്സുകാരനായ ഭര്‍ത്താവ് റെജിനെ പോലീസ് കസ്റ്റഡിയിലെടുത്ത് ടോഗര്‍ ഗാര്‍ഡ സ്റ്റേഷനില്‍ ചോദ്യം ചെയ്യുന്നതിനായി എത്തിച്ചിട്ടുണ്ട്.
കൊല്ലപ്പെട്ട യുവതി ഏകദേശം ഒരു വർഷം മുൻപാണ് അയർലൻഡിൽ എത്തിയത്. നാല് മാസം മുൻപ് ഡിപെൻഡന്റ് വീസയിൽ എത്തിയ ഭർത്താവിന് ഇതുവരെ ജോലി ലഭ്യമായിട്ടില്ലന്നാണ് സൂചന. ആക്രമണത്തിൽ ഇവരുടെ മകന് പരിക്ക് പറ്റിയിട്ടില്ലന്നും സുരക്ഷിതനാണെന്നുമാണ് വിവരം. ഇവർ താമസിച്ചിരുന്ന കെട്ടിടത്തിന് സമീപം മലയാളികൾ ഉൾപ്പടെയുള്ള ധാരാളം ഇന്ത്യക്കാർ താമസിക്കുന്നുവെങ്കിലും ഇരുവർക്കും ആരുമായും കാര്യമായ ബന്ധം ഉണ്ടായിരുന്നില്ല. സംഭവ സ്ഥലവും പരിസര പ്രദേശങ്ങളും അന്വേഷണം നടക്കുന്നതിനാൽ പൊലീസ് നിയന്ത്രണത്തിലാണ്.
ഇന്ത്യക്കാർ ഉൾപ്പടെ ധാരാളം വിദേശീയർ താമസിക്കുന്ന പ്രദേശത്ത് നിന്നും ഇത്തരം ഒരു വാർത്ത കേൾക്കേണ്ടി വന്നത് വളരെ സങ്കടകരമാണെന്നും ഫിയാന ഫെയിൽ കൗൺസിലർ ഫെർഗൽ ഡെന്നിഹി പറഞ്ഞു. കൊലപാതകം സംബന്ധിച്ച് എന്തെങ്കിലും വിവരങ്ങൾ ലഭിക്കുന്നവർ ടോഗർ ഗാർഡ സ്റ്റേഷന്റെ (021) 494 7120 എന്ന നമ്പറിലോ ഗാർഡ കോൺഫിഡൻഷ്യൽ ലൈനായ 1800 666 111 എന്ന നമ്പരിലോ ബന്ധപ്പെടാൻ അറിയിപ്പ് നൽകിയിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല