സ്വന്തം ലേഖകൻ: തൊഴിലുടമകളുമായി നിയമപരമായ പ്രശ്‌നങ്ങളുള്ള പ്രവാസികള്‍ക്ക് അഭയകേന്ദ്രം സ്ഥാപിക്കുമെന്ന് കുവൈത്ത് പബ്ലിക് അതോറിറ്റി ഫോര്‍ മാന്‍പവര്‍ (പിഎഎം). നിലവിലെ വനിതാ അഭയകേന്ദ്രത്തിന്റെ മാതൃകയില്‍ പ്രവാസികളായ പുരുഷന്‍മാരെ താമസിപ്പിക്കുന്നതിനാണ് അഭയകേന്ദ്രം ആരംഭിക്കുന്നതെന്ന് കുവൈത്ത് ന്യൂസ് ഏജന്‍സി (കുന) റിപ്പോര്‍ട്ട് ചെയ്തു.
ലോക മാനുഷിക ദിനത്തോടനുബന്ധിച്ചാണ് പ്രവാസി തൊഴിലാളി സംരക്ഷണ ചുമതലയുള്ള ഡെപ്യൂട്ടി ഡയറക്ടര്‍ ജനറല്‍ ഡോ. ഫഹദ് അല്‍ മുറാദ് ഈ തീരുമാനം പ്രഖ്യാപിച്ചത്. സ്‌പോണ്‍സര്‍മാരെ ഉപേക്ഷിക്കാന്‍ തീരുമാനിക്കുന്ന പ്രവാസി സ്ത്രീകള്‍ക്ക് നിലവില്‍ നല്‍കുന്ന അഭയകേന്ദ്രത്തിന് സമാനമായിരിക്കും ഈ പുതിയ അഭയകേന്ദ്രം. കുവൈത്തിലെ വനിതാ അഭയകേന്ദ്രം താമസക്കാര്‍ക്ക് മാനസികവും സാമൂഹികവും നിയമപരവും ആരോഗ്യപരവുമായ സേവനങ്ങള്‍ നല്‍കിവരുനന്നുണ്ട്.
തൊഴിലുടമക്കെതിരെ കേസ് നല്‍കുന്ന ഘട്ടങ്ങളില്‍ തൊഴിലാളികള്‍ അനുഭവിക്കുന്ന പ്രധാനപ്രശ്‌നമാണ് താമസകേന്ദ്രം. കമ്പനികളുടെയും സ്ഥാപനങ്ങളുടെയും ഉടമസ്ഥതയിലുള്ള താമസസ്ഥലത്ത് ഈ സമയത്ത് കഴിയാന്‍ സാധിച്ചെന്നു വരില്ല. പല കമ്പനികളും ഇവിടെ നിന്ന് പുറത്താക്കുന്ന സാഹചര്യവും ഉണ്ടാവാറുണ്ട്. മറ്റൊരിടത്ത് ജോലി ലഭിക്കുകയോ പ്രവാസി സുഹൃത്തുക്കളും മറ്റും സഹായിക്കാനില്ലാതെ വരികയോ ചെയ്യുന്ന ഘട്ടത്തില്‍ വലിയ അനുഗ്രഹമാണ് അഭയകേന്ദ്രങ്ങള്‍.
തൊഴിലിടങ്ങളില്‍ നിന്ന് പല കാരണങ്ങളാല്‍ ഒളിച്ചോടുന്ന തൊഴിലാളികള്‍ക്കും അഭയകേന്ദ്രം തുണയാവും. വനിതകള്‍ക്ക് കുവൈത്തില്‍ 2014 മുതല്‍ അഭയകേന്ദ്രം പ്രവര്‍ത്തിക്കുന്നുണ്ട്. 13,000ത്തിലധികം സ്ത്രീ തൊഴിലാളികള്‍ക്ക് ഇതിന്റെ പ്രയോജനം ലഭിക്കുകയും ചെയ്തു. ഈ വര്‍ഷം 960 സ്ത്രീ തൊഴിലാളികളും അമ്മമാര്‍ക്കൊപ്പമുള്ള എട്ട് കുട്ടികളും അഭയകേന്ദ്രത്തിലെത്തി.
സൗദി അറേബ്യയിലെ ദമ്മാമില്‍ വര്‍ഷങ്ങളായി വനിതാ അഭയകേന്ദ്രം പ്രവര്‍ത്തിക്കുന്നുണ്ട്. ഒളിച്ചോടുന്ന വീട്ടുവേലക്കാരികളെ താമസിപ്പിക്കുന്നതിനും ശമ്പള കുടിശ്ശിക പോലുള്ള വിഷയങ്ങള്‍ പരിഹരിക്കുന്നതിനും സ്വന്തം നാട്ടിലേക്ക് മടങ്ങുന്നതിനും നിയമനടപടികള്‍ പൂര്‍ത്തിയാക്കുന്നതുവരെ തങ്ങാന്‍ ഈ കേന്ദ്രം ഏറെ ഉപകാരപ്രദമാണ്.
കുവൈത്ത് നിയമങ്ങള്‍ക്കനുസൃതമായി അവരുടെ അവകാശങ്ങളെയും കടമകളെയും കുറിച്ച് പ്രവാസികളെ ബോധവത്കരിക്കുന്നതിന് കുവൈത്ത് ഹ്യൂമന്‍ റൈറ്റ്‌സ് സൊസൈറ്റിയും കുവൈത്ത് പബ്ലിക് അതോറിറ്റി ഫോര്‍ മാന്‍പവറും കരാര്‍ ഒപ്പിട്ടതായും ഹ്യൂമന്‍ റൈറ്റ്‌സ് സൊസൈറ്റി ബോര്‍ഡ് ചെയര്‍മാന്‍ ഖാലിദ് അല്‍ അജ്മി വാര്‍ത്താ ഏജന്‍സിയോട് വെളിപ്പെടുത്തി.
കുവൈത്തിലെ പ്രവാസികള്‍ക്ക് അവധിക്കോ പ്രവാസം അവസാനിപ്പിച്ചോ നാട്ടിലേക്ക് മടങ്ങണമെങ്കില്‍ ഇവിടെ രജിസ്റ്റര്‍ ചെയ്ത എല്ലാ ട്രാഫിക് പിഴകളും നിയമലംഘനങ്ങളും തീര്‍പ്പാക്കേണ്ടതുണ്ടെന്ന് രണ്ടു ദിവസം മുമ്പ് അധികൃതര്‍ അറിയിച്ചിരുന്നു. ഓഗസ്റ്റ് 19 ശനിയാഴ്ച മുതലാണ് ഇത് പ്രാബല്യത്തിലായത്. ഫൈനല്‍ എക്‌സിറ്റ് അല്ലെങ്കില്‍ പോലും രാജ്യംവിടുന്നതിന് മുമ്പ് പിഴ സംഖ്യ മുഴുവന്‍ നല്‍കണമെന്ന് കുവൈത്ത് ആഭ്യന്തര മന്ത്രാലയം വ്യക്തമാക്കി. സൗദിയില്‍ ഈ നിയമം നേരത്തേ തന്നെ പ്രാബല്യത്തിലുണ്ട്.
കുവൈത്ത് അന്താരാഷ്ട്ര വിമാനത്താവളത്തിലും തുറമുഖങ്ങളിലും പിഴത്തുക അടയ്ക്കുന്നതിന് സൗകര്യമുണ്ട്. സഹേല്‍ മൊബൈല്‍ ആപ്ലിക്കേഷന്‍ പോലുള്ള നിരവധി ഉപയോക്തൃ സൗഹൃദ രീതികളിലൂടെയും ആഭ്യന്തര മന്ത്രാലയത്തിന്റെ ഇലക്ട്രോണിക് പോര്‍ട്ടല്‍ വഴിയും ട്രാഫിക് ഓഫീസുകളിലെത്തിയും പിഴ ഒടുക്കാവുന്നതാണ്. വിദേശികള്‍ അവധിക്ക് പോയി മടങ്ങിവരാത്ത സാഹചര്യങ്ങളില്‍ ട്രാഫിക് പിഴ ലഭിക്കാതെ പോകുന്നത് ഒഴിവാക്കാനാണ് അവധിയില്‍ പോവുകയാണെങ്കിലും മുഴുവന്‍ തുകയും നല്‍കണമെന്ന നിയമം കൊണ്ടുവന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല