സ്വന്തം ലേഖകൻ: വാഗ്നര്‍ കൂലിപ്പടയാളി ഗ്രൂപ്പിന്റെ തലവന്‍ യെവ്ജെനി പ്രഗോഷിന്‍ മരണപ്പെട്ടതായി സ്ഥിരീകരിച്ച് റഷ്യന്‍ അന്വേഷണ സംഘം. കഴിഞ്ഞ ബുധനാഴ്ചയുണ്ടായ വിമാനാപകടത്തില്‍ കൊല്ലപ്പെട്ട 10 പേരില്‍ പ്രഗോഷിനും ഉള്‍പ്പെട്ടതായി ജനിത പരിശോധനയില്‍ സ്ഥിരീകരിച്ചെന്ന് റഷ്യ അറിയിച്ചു.
മോസ്‌കോയുടെ വടക്കുപടിഞ്ഞാറൻ ട്വെർ മേഖലയിൽ തകർന്ന സ്വകാര്യ ജെറ്റിലെ 10 പേരുടെയും പേരുകൾ റഷ്യൻ വ്യോമയാന ഏജൻസി മുമ്പ് പ്രസിദ്ധീകരിച്ചിരുന്നു. വാഗ്നർ ഗ്രൂപ്പിനെ കണ്ടെത്താൻ സഹായിച്ച അദ്ദേഹത്തിന്റെ വലംകൈയായ ദിമിത്രി ഉറ്റ്കിനും, പ്രഗോഷിനും ഇതില്‍ ഉൾപ്പെടുന്നു.
ട്വെർ മേഖലയിലെ വിമാനാപകടത്തിന്റെ അന്വേഷണത്തിന്റെ ഭാഗമായി, തന്മാത്ര-ജനിതക പരിശോധനകൾ പൂർത്തിയായതായി റഷ്യയുടെ അന്വേഷണ സമിതി ടെലഗ്രാമിലൂടെ അറിയിച്ചു.
ഫലങ്ങളില്‍ നിന്ന് മരിച്ച 10 പേരെയും തിരിച്ചറിയാനായെന്നും ഫ്ലൈറ്റ് ഷീറ്റിൽ പറഞ്ഞിരിക്കുന്ന പട്ടികയുമായി പൊരുത്തപ്പെടുന്നുണ്ടെന്നും സമിതിയുടെ പ്രസ്താവനയില്‍ പറയുന്നു.
നേരത്തെ റഷ്യയുടെ സൈനിക മേധാവികള്‍ക്കെതിരെ പ്രഗോഷിന്റെ നേതൃത്വത്തിലുള്ള വാഗ്നര്‍ ഗ്രൂപ്പ് കലാപം നയിച്ചിരുന്നു. ഇതിന് രണ്ട് മാസത്തിന് ശേഷമാണ് അപകടം നടന്നിരിക്കുന്നത്. വാഗ്നര്‍ ഗ്രൂപ്പിന്റെ അന്നത്തെ നടപടി വഞ്ചനാപരം എന്നായിരുന്നു റഷ്യയുടെ പ്രസിഡന്റ് വ്ളാഡിമിര്‍ പുടിന്‍ വിശേഷിപ്പിച്ചത്.
എന്നാൽ പിന്നീട് റഷ്യന്‍ മേധാവികള്‍ പ്രഗോഷിനുമായി കൂടിക്കാഴ്ച നടത്തുകയും ഒത്തുതീര്‍പ്പില്‍ എത്തുകയുമായിരുന്നു. അപകടത്തിൽ മരിച്ചതായി കണ്ടെത്തിയവരുടെ കുടുംബങ്ങൾക്ക് പുടിന്‍ അനുശോചനം അറിയിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല