സ്വന്തം ലേഖകൻ: സ്കോട്ട്ലാൻഡിൽ വ്യാപകമായ നാശനഷ്‌ടം വരുത്തിക്കഴിഞ്ഞ ബാബെറ്റ് കൊടുങ്കാറ്റ്, യുകെയിലുടനീളം പേമാരിയും ശക്തമായ കാറ്റുമായി കടന്നുവരുന്നു. സ്കോട്ട്ലൻഡിന്റെ കിഴക്കൻ ഭാഗങ്ങളിൽ ഒരാഴ്ചയ്ക്കുള്ളിൽ രണ്ടാമത്തെ റെഡ് അലെർട്ട് കാലാവസ്ഥാ മുന്നറിയിപ്പ് പ്രാബല്യത്തിൽ വന്നു. ആളുകൾക്ക് ജീവഹാനിവരെ സംഭവിക്കാൻ സാധ്യതയുള്ളതാണ് റെഡ് അലെർട്ട്.
ബാബെറ്റ് കൊടുങ്കാറ്റ് ആദ്യമായി വീശിയടിച്ച വ്യാഴാഴ്ച മുതൽ ഇതുവരെ മൂന്ന് പേർ മരിച്ചു. രാജ്യത്തുടനീളമുള്ള നൂറുകണക്കിന് പ്രളയബാധിതർ താത്കാലിക താമസസ്ഥലങ്ങളിൽ കഴിയുന്നു. ഹൈലാൻഡ്‌സ്, വടക്ക് കിഴക്ക്, സ്കോട്ട്ലൻഡിന്റെ മധ്യ ഭാഗങ്ങൾ, ഇംഗ്ലണ്ടിന്റെ വടക്ക്, ഈസ്റ്റ്, വെസ്റ്റ് മിഡ്‌ലാൻഡ്‌സ്, യോർക്ക്‌ഷെയറിന്റെ ചില ഭാഗങ്ങൾ എന്നിവിടങ്ങളിൽ ശനിയാഴ്ച മഴയ്ക്കുള്ള മുന്നറിയിപ്പുകൾ നിലവിലുണ്ട്.
സ്കോട്ട്ലൻഡ്, ഇംഗ്ലണ്ട്, വെയിൽസ് എന്നിവിടങ്ങളിൽ മഴയ്ക്കും കാറ്റിനുമുള്ള യെല്ലോ മുന്നറിയിപ്പുകളും കാലാവസ്ഥ നിരീക്ഷണ വിഭാഗമായ മെറ്റ് ഓഫീസ് പുറപ്പെടുവിച്ചു. സ്കോട്ട്ലാൻഡിൽ പുതിയ റെഡ് കാലാവസ്ഥ മുന്നറിയിപ്പ് വെള്ളിയാഴ്ച അർദ്ധരാത്രി മുതൽ ശനിയാഴ്ച വരെ പ്രാബല്യത്തിലുണ്ടാകും. റെഡ് അലർട്ട് ഏരിയയിൽ യാത്ര ചെയ്യരുതെന്നും ആംബർ മുന്നറിയിപ്പ് നൽകുന്ന സ്ഥലങ്ങളിലും യാത്രകൾ ഒഴിവാക്കണമെന്നും പോലീസ് നിർദ്ദേശിച്ചു.
കൊടുങ്കാറ്റിൽ ഒരു വിമാനം റൺവേയിൽ നിന്ന് തെന്നിമാറിയതിനെ തുടർന്ന് വെള്ളിയാഴ്ച ലീഡ്സ് ബ്രാഡ്‌ഫോർഡ് വിമാനത്താവളം അടച്ചു . ശനിയാഴ്ചരാവിലെ 10:00 മണിക്ക് വിമാനത്താവളം തുറക്കാനാകുമെന്ന് വിമാനത്താവള അധികൃതർ പ്രതീക്ഷിക്കുന്നു. രാജ്യവ്യാപകമായി റോഡ്, റെയിൽ, വ്യോമയാന സർവീസുകൾ തടസ്സപ്പെടുകയോ, വലിയതോതിൽ യാത്രകൾക്ക് കാലതാമസം വരികയോ ചെയ്യും. മുന്നറിയിപ്പുള്ള പ്രദേശങ്ങളിലെ ഡ്രൈവർമാർക്ക് ജാഗ്രതാ നിർദ്ദേശം നൽകിയിട്ടുണ്ട്. കഴിവതും യാത്രകൾ ഒഴിവാക്കണം.
വെള്ളിയാഴ്ച ഷ്രോപ്‌ഷെയറിലെ ക്ലിയോബറി മോർട്ടിമർ പട്ടണത്തിലെ വെള്ളപ്പൊക്കത്തിൽ കുടുങ്ങി 60 വയസുള്ള ഒരാൾ ഉൾപ്പെടെ മൂന്ന് പേർ മരിച്ചു. ഫോർഫാറിന് സമീപം വാൻ മരത്തിലിടിച്ച് 56 കാരനായ ഒരാൾ മരിച്ചു , ലീയിലെ വെള്ളത്തിലേക്ക് ഒഴുകി 67 കാരിയായ സ്ത്രീ മരിച്ചു. നൂറുകണക്കിന് ആളുകൾ അടിയന്തര വസതികളിൽ അഭയം പ്രാപിച്ചിട്ടുണ്ട്. അംഗസ്, അബർഡീൻഷെയർ എന്നിവിടങ്ങളിൽ പലരും സഫോക്കിലെ ഡെബെൻഹാമിലെ ഗ്രാമീണ ഗ്രാമത്തിൽ 50 പേരും അഭയാർത്ഥി ക്യാമ്പുകളിൽ കഴിയുന്നു.
സ്കോട്ട്ലൻഡിൽ, നിരവധി റോഡുകളും പാലങ്ങളും തകർന്നു. ആംഗസിൽ ഡസൻ കണക്കിന് വീടുകളെ രക്ഷിക്കേണ്ടിവന്നു. അവിടെ അതിരാവിലെ വെള്ളപ്പൊക്ക പ്രതിരോധം തകർന്നിരുന്നു – നദികളുടെ അളവ് സാധാരണയേക്കാൾ 4.4 മീറ്റർ (14 അടി) ഉയർന്ന് കരകവിഞ്ഞു. ഇംഗ്ലണ്ടിലുടനീളം, വെള്ളിയാഴ്ച വൈകുന്നേരം 280-ലധികം വെള്ളപ്പൊക്ക മുന്നറിയിപ്പുകളും 240 അലേർട്ടുകളും പുറപ്പെടുവിച്ചിട്ടുണ്ട്. വെള്ളിയാഴ്ച രാത്രിയോടെ ഏകദേശം 13,000 വീടുകളിൽ വൈദ്യുതിയില്ലാതായി.
ബാബെറ്റ് കൊടുങ്കാറ്റ് യുകെയില്‍ വീശിയടിച്ചതിനെ തുടര്‍ന്നുണ്ടായ പ്രതികൂല കാലാവസ്ഥയെ തുടര്‍ന്ന് ലാന്‍ഡ് ചെയ്യാന്‍ വന്ന ഒരു ഹോളിഡേ ജെറ്റ് റണ്‍വേയില്‍ നിന്ന് തെന്നിമാറി. കോര്‍ഫുവില്‍ നിന്നുള്ള TUI വിമാനം വെള്ളിയാഴ്ച ഉച്ചയ്ക്ക് ലീഡ്സ് ബ്രാഡ്ഫോര്‍ഡ് എയര്‍പോര്‍ട്ടില്‍ ലാന്‍ഡിംഗിനിടെ റണ്‍വേയില്‍ നിന്ന് നീങ്ങുകയായിരുന്നു.
എല്ലാ യാത്രക്കാരെയും സുരക്ഷിതമായി വിമാനത്തില്‍ നിന്ന് ഇറക്കിയതായും വിമാനത്താവളം അടച്ചതായും എല്‍ബിഎ അറിയിച്ചു. യാത്ര പുറപ്പെടുന്നതിന് മുമ്പ് എയര്‍ലൈനുകളുമായി ബന്ധപ്പെടണമെന്നും എല്‍ബിഎ അഭ്യര്‍ത്ഥിച്ചു.സംഭവത്തില്‍ ആളപായമോ തീപിടുത്തമോ ഉണ്ടായിട്ടില്ലെന്ന് വെസ്റ്റ് യോര്‍ക്ക്ഷയര്‍ ഫയര്‍ ആന്‍ഡ് റെസ്‌ക്യൂ സര്‍വീസ് അറിയിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല