സ്വന്തം ലേഖകൻ: ഹോംലാന്‍ഡ് സെക്യൂരിറ്റിയെക്കുറിച്ചുള്ള യുണൈറ്റഡ് സ്റ്റേറ്റ്‌സ് ഹൗസ് കമ്മിറ്റി – ഡിപ്പാര്‍ട്ട്‌മെന്റ് ഓഫ് ഹോംലാന്‍ഡ് സെക്യൂരിറ്റിയുടെ (ഡിഎച്ച്എസ്) മേല്‍നോട്ടം വഹിക്കുന്ന സ്റ്റാന്‍ഡിംഗ് കമ്മിറ്റി ഹോംലാന്‍ഡ് സെക്യൂരിറ്റി സെക്രട്ടറി അലജാന്‍ഡ്രോ മയോര്‍ക്കസിനെതിരായ രണ്ട് ഇംപീച്ച്മെന്റ് ആര്‍ട്ടിക്കിളുകള്‍ അംഗീകരിച്ചു. യുഎസിനെയും മെക്‌സിക്കോയെയും വേര്‍തിരിക്കുന്ന രാജ്യത്തിന്റെ തെക്കന്‍ അതിര്‍ത്തിയില്‍ യുഎസ് ഇമിഗ്രേഷന്‍ നയങ്ങള്‍ നടപ്പാക്കുന്നതില്‍ അദ്ദേഹം പരാജയപ്പെട്ടുവെന്ന് ആരോപിച്ചാണ് നടപടി.
കമ്മിറ്റിയിലെ 18 റിപ്പബ്ലിക്കന്‍ ഹൗസ് പ്രതിനിധികളും ഇംപീച്ച്മെന്റ് ആരോപണങ്ങള്‍ ശുപാര്‍ശ ചെയ്യാന്‍ വോട്ട് ചെയ്തപ്പോള്‍, 15 ഡെമോക്രാറ്റിക് ഹൗസ് പ്രതിനിധികള്‍ ഈ നീക്കത്തെ എതിര്‍ത്തു. കുടിയേറ്റത്തെച്ചൊല്ലി റിപ്പബ്ലിക്കന്‍മാരും ഡെമോക്രാറ്റുകളും തമ്മിലുള്ള പിരിമുറുക്കങ്ങള്‍ വര്‍ദ്ധിച്ചുവരികയാണ്. പ്രത്യേകിച്ച് 2024 ലെ പ്രസിഡന്റ് തിരഞ്ഞെടുപ്പിന് മുന്നോടിയായി.
സമീപ വര്‍ഷങ്ങളില്‍, പ്രത്യേകിച്ച് ജോ ബൈഡന്‍ പ്രസിഡന്റായതിനു ശേഷം മെക്‌സിക്കോ അതിര്‍ത്തിയിലൂടെ യുഎസിലേക്ക് പ്രവേശിക്കുന്ന കുടിയേറ്റക്കാരുടെ എണ്ണത്തില്‍ വര്‍ധനയുണ്ടായിട്ടുണ്ടെന്ന് വാഷിംഗ്ടണ്‍ പോസ്റ്റ് റിപ്പോര്‍ട്ട് പറയുന്നു. റിപ്പോര്‍ട്ട് അനുസരിച്ച്, ബൈഡന്‍ ഭരണകൂടം യുഎസ് കസ്റ്റംസ് ആന്‍ഡ് ബോര്‍ഡര്‍ പ്രൊട്ടക്ഷന്‍ 2.3 ദശലക്ഷത്തിലധികം കുടിയേറ്റക്കാരെ രാജ്യത്തേക്ക് കടത്തിവിട്ടു. ഇതില്‍ ഭൂരിപക്ഷവും കുടിയേറ്റ കുടുംബങ്ങളാണ്. ഒപ്പം ചില മുതിര്‍ന്നവരുടെ സംഘവും ഉള്‍പ്പെടുന്നു.
അതേസമയം, ഇതേ കാലയളവില്‍ 6 ദശലക്ഷത്തിലധികം കുടിയേറ്റക്കാരെ സിബിപി കസ്റ്റഡിയിലെടുത്തു. 2023 നവംബറില്‍ മാത്രം, തെക്കന്‍ അതിര്‍ത്തിയില്‍ ഏകദേശം 250,000 അനധികൃത കുടിയേറ്റെ ഉണ്ടായിരുന്നു. ന്യൂയോര്‍ക്ക് ടൈംസിന്റെ 2023 ലെ റിപ്പോര്‍ട്ട് അനുസരിച്ച്, യുഎസിനുള്ളില്‍ ഇപ്പോള്‍ ഏകദേശം 11 ദശലക്ഷം അനധികൃത കുടിയേറ്റക്കാരുണ്ട്, 1990 ല്‍ ഇവിടെ താമസിച്ചിരുന്നതിന്റെ മൂന്നിരട്ടിയോളം വരും ഇത്.
ഡെമോക്രാറ്റുകള്‍ ഭരിക്കുന്ന സംസ്ഥാനങ്ങളിലെ ന്യൂയോര്‍ക്ക്, ചിക്കാഗോ, ഡെന്‍വര്‍ തുടങ്ങിയ നഗരങ്ങളിലെ വിഭവങ്ങള്‍ക്ക് ക്ഷാമം വരാന്‍ കുടിയേറ്റക്കാരുടെ കുത്തൊഴുക്ക് കാരണമായി. റിപ്പബ്ലിക്കന്‍മാര്‍ ഭരിക്കു്‌ന ദക്ഷിണ സംസ്ഥാനങ്ങളില്‍ നിന്ന് കുടിയേറ്റക്കാരെ ഇവിടേക്ക് തള്ളിവിടുകയാണ് പതിവെന്ന് ദി ഇക്കണോമിസ്റ്റ് റിപ്പോര്‍ട്ട് ചെയ്തു. പുതിയതായി വരുന്നവരെ പാര്‍പ്പിക്കാനും താമസിപ്പിക്കാനും ഈ നഗരങ്ങളിലെ ഡെമോക്രാറ്റ് മേയര്‍മാര്‍ സ്ഥിരമായി കൂടുതല്‍ ഫെഡറല്‍ സഹായം അഭ്യര്‍ത്ഥിക്കുകന്നതും പതിവാണ്.
പ്രസിഡന്റ് ബൈഡന്റെ കുടിയേറ്റ നയങ്ങളാണ് കുടിയേറ്റക്കാരുടെ എണ്ണം വര്‍ധിക്കാന്‍ കാരണമെന്ന് റിപ്പബ്ലിക്കന്‍മാര്‍ കുറ്റപ്പെടുത്തുന്നു. 2020ലെ തന്റെ പ്രചാരണ വേളയില്‍, ട്രംപിന്റെ കുടിയേറ്റ വിരുദ്ധ സമീപനം പഴയപടിയാക്കുമെന്നും കൂടുതല്‍ മാനുഷികമായ നിലപാട് സ്വീകരിക്കുമെന്നും ബൈഡന്‍ വാഗ്ദാനം ചെയ്തിരുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല