സ്വന്തം ലേഖകൻ: റമസാന്‍ പ്രമാണിച്ച് ബഹ്റൈനില്‍ ഔദ്യോഗിക ജോലി സമയത്തില്‍ മാറ്റംവരുത്തി. സര്‍ക്കാര്‍ ഓഫിസുകള്‍ രാവിലെ എട്ടു മുതല്‍ ഉച്ചയ്ക്ക് രണ്ടു വരെയാണ് പ്രവര്‍ത്തിക്കുകയെന്ന് സിവില്‍ സര്‍വീസ് ബ്യൂറോ (സിഎസ്ബി) അറിയിച്ചു.
കിരീടാവകാശിയും പ്രധാനമന്ത്രിയുമായ സല്‍മാന്‍ ബിന്‍ ഹമദ് അല്‍ ഖലീഫ രാജകുമാരനാണ് വ്രതമാസം പരിഗണിച്ച് ജോലി സമയം ക്രമീകരിക്കാന്‍ നിര്‍ദേശം നല്‍കിയത്. ജോലി സമയത്തില്‍ ആറിലൊന്നിന്റെ കുറവുണ്ടാവും. ആഴ്ചയില്‍ 36 മണിക്കൂറില്‍ നിന്ന് 30 മണിക്കൂറായി ജോലി കുറയുമെന്ന് സിഎസ്ബി പ്രസിഡന്റ് ഷെയ്ഖ് ദൈജ് ബിന്‍ സല്‍മാന്‍ ബിന്‍ ദൈജ് അല്‍ ഖലീഫ പറഞ്ഞു.
കൂടുതല്‍ സമയം ജോലി ചെയ്യുന്ന ജീവനക്കാരുടെ ജോലി സമയം ആഴ്ചയില്‍ 40 മണിക്കൂറില്‍ നിന്ന് 33.5 മണിക്കൂറായി കുറയ്ക്കും. ഇവര്‍ക്കുള്ള ജോലി സമയം ഞായര്‍ മുതല്‍ ബുധന്‍ വരെ പ്രവൃത്തി സമയം രാവിലെ 8:00 മുതല്‍ ഉച്ചയ്ക്ക് 2:45 വരെയും വ്യാഴാഴ്ച രാവിലെ 8:00 മുതല്‍ 2:30 വരെയും ആയിരിക്കും.
ചില സര്‍ക്കാര്‍ ഏജന്‍സികള്‍ക്ക് സിഎസ്ബി അംഗീകരിച്ച പ്രത്യേക പ്രവൃത്തി സമയവും ഇതേ നിരക്കില്‍ കുറച്ചിട്ടുണ്ട്. തൊഴിലിന്റെ സ്വഭാവവും ആവശ്യകതകളും അനുസരിച്ച് ഓരോ ദിവസത്തെയും ഔദ്യോഗിക പ്രവൃത്തി സമയം ഈ ഏജന്‍സികള്‍ക്ക് നിശ്ചയിക്കാവുന്നതാണ്. പ്രത്യേക നിയന്ത്രണങ്ങള്‍ക്ക് വിധേയരായ സര്‍ക്കാര്‍ ജീവനക്കാരും ഇതില്‍ ഉള്‍പ്പെടുന്നു.
യുഎഇ, ഒമാന്‍, ഖത്തര്‍, സൗദി അറേബ്യ തുടങ്ങിയ രാജ്യങ്ങളും റമസാന്‍ മാസത്തിലെ ജോലി സമയം ക്രമീകരിച്ചിട്ടുണ്ട്. രാവിലെ ഒമ്പതിന് ആരംഭിച്ച് ഉച്ചയ്ക്ക് 2.30 വരെയാണ് പരമാവധി ജോലി സമയം. ദൈനംനിദ ജോലി സമയത്തില്‍ ചുരുങ്ങിയത് രണ്ടു മണിക്കൂര്‍ ഇളവ് ഈ രാജ്യങ്ങളിലെ തൊഴില്‍ മന്ത്രാലയങ്ങള്‍ പ്രഖ്യാപിച്ചിട്ടുണ്ട്. ചില രാജ്യങ്ങളില്‍ തൊഴില്‍ സമയത്തിലെ ഇളവ് സ്വകാര്യ മേഖലകള്‍ക്കും ബാധകമാണ്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല