സ്വന്തം ലേഖകൻ: യുഎസ് സേറ്റേറ്റ് സെക്രട്ടറി ആന്റണി ബ്ലിങ്കന്‍ സൗദി, ഇസ്രായേല്‍ സന്ദര്‍ശനം പൂര്‍ത്തിയാക്കി അമേരിക്കയില്‍ തിരികെ എത്തിയതിനു പിന്നാലെ സൗദി- യുഎസ് ബന്ധം പുതിയ വഴിത്തിരിവിലേക്കെന്ന് സൂചന. ഇസ്രായേലും സൗദി അറേബ്യയും തമ്മില്‍ സൗഹൃദ കരാര്‍ യാഥാര്‍ഥ്യമാവാതെ തന്നെ സൗദിയുമായി സുരക്ഷാ- ആണവ കരാറുകളില്‍ ഒപ്പുവയ്ക്കാന്‍ അമേരിക്ക തയ്യാറെടുക്കുന്നതായാണ് പുതിയ റിപ്പോര്‍ട്ടുകള്‍.
ഇസ്രായേലുമായുള്ള ബന്ധം സാധാരണ നിലയിലാക്കാന്‍ സൗദി അറേബ്യ സന്നദ്ധമായാല്‍ മാത്രമേ അവര്‍ക്ക് സുരക്ഷാ പാക്കേജ് തയ്യാറാക്കി നല്‍കാന്‍ സാധിക്കൂ എന്നതായിരുന്നു ഇതുവരെയുള്ള അമേരിക്കയുടെ നിലപാട്. ഇതുമായി ബന്ധപ്പെട്ട ചര്‍ച്ചകള്‍ വര്‍ഷങ്ങളായി തുടര്‍ന്നു വരികയുമായിരുന്നു. എന്നാല്‍ കഴിഞ്ഞ വര്‍ഷം ഒക്ടോബര്‍ ഏഴിനുണ്ടായ ഹമാസ് ആക്രമണത്തെ തുടര്‍ന്ന് പൊട്ടിപ്പുറപ്പെട്ട ഗാസ-ഇസ്രായേല്‍ യുദ്ധത്തിന്റെ പശ്ചാത്തലത്തില്‍ ഇസ്രായേലുമായി സൗദി സൗഹൃദ കരാറില്‍ ഏര്‍പ്പെടുകയെന്നത് അസംഭവ്യമാണെന്ന വിലയിരുത്തലിന്റെ അടിസ്ഥാനത്തിലാണ് അമേരിക്കയുടെ നിലപാട് മാറ്റമെന്നാണ് സൂചന.
ഗാസയ്‌ക്കെതിരായ യുദ്ധം നിലവിലെ രീതിയില്‍ തുടരുന്ന കാലത്തോളം ഇസ്രായേലുമായി ഒരു കരാറിന് ഒരുക്കമല്ലെന്ന നിലപാട് ആന്റണി ബ്ലിങ്കനുമായുള്ള കൂടിക്കാഴ്ചയില്‍ സൗദി അധികൃതര്‍ വ്യക്തമാക്കിയ സാഹചര്യത്തിലാണ് മാറിച്ചിന്തിക്കാന്‍ അമേരിക്കയെ പ്രേരിപ്പിച്ചതെന്നാണ് വിലയിരുത്തല്‍. ലക്ഷക്കണക്കിന് പലസ്തീനി അഭയാര്‍ഥികള്‍ തിങ്ങിപ്പാര്‍ക്കുന്ന റഫയ്‌ക്കെതിരേ കരയാക്രമണം നടത്തുമെന്ന തന്റെ നിലപാടില്‍ മാറ്റം വരുത്താന്‍ ഇസ്രായേല്‍ പ്രധാനമന്ത്രി ബെഞ്ചമിന്റെ നെതന്യാഹു തയ്യാറാവാത്ത സാഹചര്യത്തില്‍ പ്രത്യേകിച്ചും. അതോടൊപ്പം സ്വതന്ത്ര പലസ്തീന്‍ രാഷ്ട്രം രൂപീകരിക്കുന്നതിലേക്കുള്ള ചുവടുവയ്പ്പുകളും കരാറിന്റെ ഭാഗമായി എടുക്കണമെന്നും സൗദി വ്യവസ്ഥ ചെയ്തിരുന്നു.
യുഎസ്- സൗദി പാക്കേജുമായി ബന്ധപ്പെട്ട വിഷയത്തില്‍ ഒരു കരാറില്‍ എത്തിച്ചേരുന്നതിന്റെ വക്കിലാണ് ഇരു രാഷ്ട്രങ്ങളുമെന്ന് യുഎസ് സ്റ്റേറ്റ് ഡിപ്പാര്‍ട്ട്മെന്റ് വക്താവ് മാത്യു മില്ലര്‍ ഇന്നലെ പറഞ്ഞതിന്റെ വെളിച്ചത്തിലാണ് പുതിയ വിലയിരുത്തല്‍. പാക്കേജുമായി ബന്ധപ്പെട്ട വിശദാംശങ്ങള്‍ വളരെ ചുരുങ്ങിയ സമയത്തിനുള്ളില്‍ തയ്യാറാകുമെന്നും അദ്ദേഹം പറഞ്ഞു. ഗാസ- ഇസ്രായേല്‍ സംഘര്‍ഷം തുടങ്ങിയതിന് ശേഷം ഏഴാം തവണ മേഖലയില്‍ സന്ദര്‍ശനം നടത്തിയ യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കന്‍, കഴിഞ്ഞ ദിവസം സൗദി കിരീടാവകാശി മുഹമ്മദ് ബിന്‍ സല്‍മാനുമായും ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായും കൂടിക്കാഴ്ച നടത്തിയ ശേഷമാണ് അമേരിക്കയില്‍ തിരികെ എത്തിയത്. ഇതേത്തുടര്‍ന്നാണ് സൗദി- യുഎസ് പാക്കേജിനെ കുറിച്ചുള്ള മാത്യു മില്ലറുടെ പ്രസ്താവന ഉണ്ടായിരിക്കുന്നത്.
അതേസമയം, ഇസ്രായേലുമായുള്ള ബന്ധത്തിന്റെ കാര്യത്തില്‍ തീരുമാനമായിട്ടില്ലെങ്കിലും സൗദിയുമായി കരാറിലേര്‍പ്പെടാന്‍ അമേരിക്കയെ പ്രേരിപ്പിച്ച പ്രധാന ഘടകങ്ങളിലൊന്ന് മിഡിലീസ്റ്റില്‍ ചുവടുറപ്പിക്കാനുള്ള ചൈനയുടെ ശ്രമങ്ങളാണെന്നും വിലയിരുത്തപ്പെടുന്നുണ്ട്. സൗദിക്ക് സുരക്ഷാ പാക്കേജ് അനുവദിക്കുന്നതിനു പകരമായി സൗദി അറേബ്യ ചൈനയുടെ ആയുധങ്ങള്‍ വാങ്ങുന്നത് നിര്‍ത്തണമെന്ന വ്യവസ്ഥ ബൈഡന് ഭരണകൂടം മുന്നോട്ടുവയ്ക്കുമെന്നാണ് ഇതുമായി ബന്ധപ്പെട്ട വൃത്തങ്ങള്‍ നല്‍കുന്ന സചൂന. അതിനു പുറമെ, ചൈനയുമായുള്ള സാമ്പത്തിക സഹകരണം പരിമിതപ്പെടുത്തണമെന്നതും കരാറിന്റെ ഭാഗമാക്കും.
ഇതിനു പകരമായി അമേരിക്കയുടെ പക്കലുള്ള അത്യാധുനിക ആയുധങ്ങള്‍ സൗദിക്ക് നല്‍കും. അതോടൊപ്പം സൗദിയുമായി സമഗ്രമായ സുരക്ഷാ കരാറില്‍ ഒപ്പുവയ്ക്കുകയും ചെയ്യും. യുഎസ്- സൗദി സുരക്ഷാ ഉടമ്പടിയില്‍ ആര്‍ട്ടിഫിഷ്യല്‍ ഇന്റലിജന്‍സ് ഉള്‍പ്പെടെയുള്ള അതിനൂതന സാങ്കേതികവിദ്യകള്‍ റിയാദുമായി പങ്കുവയ്ക്കുന്നതും ഉള്‍പ്പെടുമെന്ന് പ്രതീക്ഷിക്കുന്നതായി ഈ വിഷയങ്ങള്‍ സജീവമായി പിന്തുടരുന്ന കേന്ദ്രങ്ങളെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തു. അതോടൊപ്പം സിവിലിയന്‍ ആണവ മേഖലയില്‍ ഇരു രാജ്യങ്ങളും തമ്മില്‍ സഹകരണം ഉറപ്പുവരുത്തുകയും ചെയ്യും.
ഗാസ – ഇസ്രായേല്‍ യുദ്ധം ആരംഭിക്കുന്നതിനു മുമ്പ് നടന്ന ചര്‍ച്ചകളില്‍ സൗദിയും ഇസ്രായേലും യുഎസ്സും ഉള്‍പ്പെട്ട ഒരു കരാര്‍ എന്നതിലായിരുന്നു ഊന്നല്‍. ലോകത്തിലെ ഏറ്റവും വലിയ എണ്ണ കയറ്റുമതി രാജ്യമായ സൗദിയുമായുള്ള കരാര്‍ മറ്റ് അറബ്, മുസ്ലീം രാജ്യങ്ങളുമായി ബന്ധം സ്ഥാപിക്കുന്നതിനും സൗദിയെ യുഎസ്സുമായി ബന്ധിപ്പിക്കുന്നതിനും വഴിയൊരുക്കുമെന്നായിരുന്നു അന്ന് നെതന്യാഹുവിന്റെ കണക്കുകൂട്ടല്‍.
സൗദി- ഇസ്രായേല്‍ സമാധാന കരാര്‍ പ്രസിഡന്റ് തെരഞ്ഞെടുപ്പിനെ നേരിടുന്ന ഈ ഘട്ടത്തില്‍ ജോ ബൈഡന് വലിയ നേട്ടമാവുമെന്നും വിലയിരുത്തപ്പെട്ടിരുന്നു. എന്നാല്‍ ഗസ സംഘര്‍ഷം ആരംഭിച്ചതോടെ കാര്യങ്ങള്‍ കീഴ്‌മേല്‍ മറിയുകയായിരുന്നു. സൗഹൃദ കരാറിന് സൗദി മുന്നോട്ടു വയ്ക്കുന്ന രണ്ട് ഉപാധികളാണ് ഗസ സംഘര്‍ഷം അവസാനിപ്പിക്കലും സ്വതന്ത്ര ഫലസ്തീന്‍ രാഷ്ട്രം രൂപീകരിക്കലും. എന്നാല്‍ നിലവിലെ സാഹചര്യത്തില്‍ ഇത്തരമൊരു തീരുമാനം കൈക്കൊണ്ടാല്‍ അത് ഇസ്രായേലിലെ തീവ്രവലതുപക്ഷ പിന്തുണയുള്ള സര്‍ക്കാരിന്റെ തകര്‍ച്ചയ്ക്ക് കാരണമാവുമെന്നാണ് നെതന്യാഹുവിന്റെ ഭയം. ഈ സമ്മര്‍ദ്ദം അതിജീവിക്കാന്‍ ഇസ്രായേല്‍ പ്രധാനമന്ത്രിക്ക് കഴിയില്ലെന്ന വിലയിരുത്തലിലാണ് യുഎസ് ഭരണകൂടവും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല