സൗദിയിൽ ജീവിക്കുന്നവരുടെ ആയുർദൈർഘ്യം വർധിച്ചതായി റിപ്പോർട്ട്; കാരണം ആരോഗ്യ പരിഷ്കാരങ്ങൾ

സ്വന്തം ലേഖകൻ: കഴിഞ്ഞ കുറച്ചു വർഷങ്ങളായി സൗദിയിൽ നടപ്പിലാക്കിയ ആരോഗ്യ പരിഷ്കാരങ്ങളെ തുടർന്ന് ജനങ്ങളുടെ ശരാശരി ആയുസ്സ് വർധിച്ചതായി റിപ്പോർട്ട്. 77.6 വയസ്സായി ആയുസ്സ് ഉയർന്നുവെന്നാണ് പുറത്തുവരുന്ന റിപ്പോർട്ട്. ജനങ്ങൾക്ക് വ്യായാമം പ്രേത്സാഹിപ്പിക്കുന്നതിന് വേണ്ടിയുള്ള പദ്ധതികൾ, ആരോഗ്യകരമായ ഭക്ഷണ ശീലം, ഉപ്പ് പഞ്ചസാര തുടങ്ങിയവ പ്രേത്സാഹിപ്പിക്കുന്നിത് വേണ്ടിയുള്ള പദ്ധതികൾ ആണ് നടപ്പിലാക്കിയത്.

ഹെല്‍ത്ത് സെക്ടര്‍ ട്രാന്‍ഫോര്‍മേഷന്‍ പ്രോഗ്രാമാണ് ഇക്കാര്യങ്ങൾ അറിയിച്ചത്. ഭക്ഷണ ശീലവുമായി ബന്ധപ്പെടുത്തി നടത്തിയ പരിഷ്കരണങ്ങൾ എല്ലാം ഫലം കണ്ട് എന്നുവേണം മനസ്സിലാക്കാൻ. അതാണ് ഇത്തരത്തിലൊരു മാറ്റം വന്നതെന്നും വിഷയത്തിൽ അധികൃതർ വ്യക്തമാക്കി. സൗദി ഗസറ്റ് ആണ് വാർത്ത റിപ്പോർട്ട് ചെയ്യുന്നത്.

ഹൈഡ്രജൻ ചേർത്ത എണ്ണയ്ക്ക് നിയന്ത്രണം രാജ്യത്ത് ഏർപ്പെടുത്തിയത് വലിയ ഗുണം ചെയ്തു. സൗദിയിലെ ആശുപത്രി സേവനങ്ങളിൽ ജനം ഇപ്പോൾ തൃപ്തരാണ്. നിരവധി ആശുപത്രികളിൽ കൂടുതൽ ചികിത്സാ സൗകര്യങ്ങൾ ഏർപ്പെടുത്തി. ആശുപത്രിയിൽ മികച്ച സൗകര്യങ്ങൾ എത്തിയതോടെ കൂടുതൽ ആളുകൾ പല ചികിത്സക്കായി എത്തുന്നുണ്ട്. ആശുപത്രികളിൽ കിടത്തി ചികിത്സക്കായി എത്തുന്ന നൂറു രോഗികളിൽ 82.41 ശതമാനം രോഗികളും സംതൃപ്തരാണ്. ഒരു ലക്ഷം പേര്‍ക്ക് 733 നഴ്സുമാർ എന്നതാണ് സൗദിയിലെ നിലവിലുള്ള അനുപാതം. 2019ലെ കണക്കുവെച്ചു നോക്കുമ്പോൾ ഇത് 581.6 ആയിരുന്നു.

സ്വദേശികളെന്ന പോലെ പ്രവാസികൾക്കും നല്ല ചികിത്സയാണ് സൗദിയിൽ ലഭിക്കുന്നത്. നിരവധി മലയാളി നഴ്സുമാർ സൗദിയിലെ വിവിധ ആശുപത്രികളിൽ ജോലി ചെയ്യുന്നുണ്ട്. എന്നാൽ കഴിഞ്ഞ ദിവസം പുറത്തുവന്ന റിപ്പോർട്ടിൽ നഴ്സിങ്‌ മേഖലയിൽ ജോലി ചെയ്യുന്ന സ്വദേശി സ്ത്രീ, പുരുഷ ജോലിക്കാരുടെ എണ്ണത്തിൽ വലിയ വർധനവാണ് ഉണ്ടായിരിക്കുന്നത്. കഴിഞ്ഞ ഏഴ് വർഷത്തെ കണക്കുകൾ പരിശോധിക്കുമ്പോൾ നഴ്‌സുമാരുടെ എണ്ണത്തിൽ ഇരട്ടി വർധനവാണ് ഉണ്ടായിരിക്കുന്നത്.

2016ൽ നഴ്‌സുമാരായ സ്ത്രീ, പുരുഷന്മാരുടെ എണ്ണം ഏകദേശം 40,000 ആയിരുന്നു. എന്നാൽ 2023 ആയപ്പോഴേക്കും അത് 90,000 ആയി വർധിച്ചതായി കണക്കുകൾ പറയുന്നു. ആരോഗ്യ മന്ത്രാലയം ആണ് ഇതുമായി ബന്ധപ്പെട്ട അറിയിപ്പ് പുറത്തുവിട്ടിരിക്കുന്നത്. സൗദിയിലെ സർവകലാശാലകളിൽ വിദ്യാർഥികൾക്ക് വിവിധ തരത്തുലുള്ള വിദ്യാഭ്യാസ സഹായങ്ങൾ പ്രഖ്യാപിച്ചിരുന്നു. പല മേഖലയിലും കൂടുതൽ കോഴ്സുകൾ കൊണ്ടുവന്നിരുന്നു. അതെല്ലാം ഫലം കണ്ടെന്ന് വേണം ഇതിലൂടെ മനസ്സിലാക്കാൻ. മന്ത്രാലയത്തിന്റെ വിവിധ സംരംഭങ്ങൾ നഴ്സിങ് മേഖലയിൽ കൂടുത്‍ ഉണർന്ന് പ്രവർത്തിച്ചിരുന്നു.