സ്വന്തം ലേഖകൻ: ഖത്തറിലെ സര്‍വ്വകലാശാലകളില്‍ നിന്ന് പഠിച്ചിറങ്ങുന്ന മികച്ച പ്രവാസി വിദ്യാര്‍ഥികള്‍ക്ക് രാജ്യത്തെ സ്വകാര്യ മേഖലാ കമ്പനികളില്‍ അനുയോജ്യമായ ജോലി ലഭ്യമാക്കുക എന്ന ലക്ഷ്യത്തോടെ തൊഴില്‍ മന്ത്രാലയം നടപ്പിലാക്കുന്ന സംരംഭമായ ‘ഉഖൂല്‍’ പ്ലാറ്റ്ഫോം ഉടന്‍ ആരംഭിക്കും. പുതുതായി ബിരുദം നേടിയ വിദ്യാര്‍ത്ഥികള്‍ക്ക് അവരുടെ കഴിവുകള്‍ക്കും തൊഴില്‍ അഭിലാഷങ്ങള്‍ക്കും അനുയോജ്യമായ ജോലികള്‍ കണ്ടെത്തി നല്‍കുന്നതിനുള്ള റിക്രൂട്ട്മെന്റ് പ്രക്രിയ കാര്യക്ഷമമാക്കുന്ന പ്ലാറ്റ്ഫോം വിവിധ ഘട്ടങ്ങളായാണ് നടപ്പിലാക്കുകയെന്നും അതിന്റെ ഒന്നാംഘട്ടം താമസിയാതെ ആരംഭിക്കുമെന്നും പ്രവാസി തൊഴില്‍ കാര്യ അസിസ്റ്റന്റ് അണ്ടര്‍സെക്രട്ടറി ഓഫീസിലെ പ്രോജക്ട് ഡിപ്പാര്‍ട്ട്മെന്റ് ഡയറക്ടര്‍ മുനീറ അല്‍ ശുറൈം അറിയിച്ചു. പ്ലാറ്റ്ഫോം ലോഞ്ച് ചെയ്യുന്ന തീയതി ഉടന്‍ പ്രഖ്യാപിക്കും.
ഖത്തര്‍ സര്‍വകലാശാലകളില്‍ പഠിക്കുന്ന ഭൂരിഭാഗം പ്രവാസി വിദ്യാര്‍ത്ഥികളും ജനിച്ച് വളര്‍ന്നത് ഖത്തറിലാണ്. അതുകൊണ്ടുതന്നെ പ്രാദേശിക സംസ്‌കാരം, പാരമ്പര്യം, ഖത്തര്‍ നിയമങ്ങള്‍ എന്നിവ അവര്‍ക്ക് പരിചിതമാണ്. വിദേശത്ത് നിന്ന് റിക്രൂട്ട് ചെയ്യപ്പെടുന്ന ജീവനക്കാരെക്കാള്‍ മികച്ച രീതിയില്‍ പ്രാദേശിക സമൂഹവുമായി ചേര്‍ന്നു പോവാന്‍ ഇവര്‍ക്ക് എളുപ്പത്തില്‍ സാധിക്കും. അതുകൊണ്ടുതന്നെയാണ് ഈ വിദ്യാര്‍ഥികളെ ഖത്തര്‍ തൊഴില്‍ കമ്പോളത്തിലേക്ക് എത്തിക്കാനുള്ള പദ്ധതിക്ക് തുടക്കമിടുന്നതെന്നും അവര്‍ അറിയിച്ചു.
പ്രവാസി ബിരുദധാരികള്‍, സ്വകാര്യ കമ്പനികള്‍, സര്‍വകലാശാലകള്‍ എന്നിവരെ ഉള്‍പ്പെടുത്തിക്കൊണ്ടാണ് ഇത് രൂപകല്‍പ്പന ചെയ്യുക. പ്രാദേശിക സര്‍വ്വകലാശാലകളില്‍ നിന്ന് ബിരുദം നേടുന്ന പ്രവാസി വിദ്യാര്‍ത്ഥികള്‍ക്ക് അവരുടെ യൂണിവേഴ്‌സിറ്റി ഐഡികള്‍ ഉപയോഗിച്ച് വ്യക്തിഗത പ്രൊഫൈലുകള്‍ സൃഷ്ടിക്കാനും പ്ലാറ്റ്ഫോമിലെ എഐ ടൂളുകള്‍ ഉപയോഗിച്ച് നൈപുണ്യത്തെ അടിസ്ഥാനമാക്കിയുള്ള റെസ്യൂമെകള്‍ സൃഷ്ടിക്കാനും ഖത്തറിന്റെ സ്വകാര്യ മേഖലയില്‍ അവരുടെ കഴിവുകളുമായി പൊരുത്തപ്പെടുന്ന തൊഴിലവസരങ്ങള്‍ തിരയാനും പ്ലാറ്റ്ഫോമിലൂടെ നേരിട്ട് ജോലിക്ക് അപേക്ഷിക്കാനും കഴിയും.
പ്ലാറ്റ്ഫോമിലെ വ്യക്തിത്വ പരിശോധന അവര്‍ക്ക് ഏറ്റവും അനുയോജ്യമായ തൊഴില്‍ പാതകള്‍ തിരിച്ചറിയാന്‍ സഹായിക്കും. കമ്പനികളുമായി ബന്ധപ്പെടാനും പ്ലാറ്റ്ഫോമിലെ പഠന കേന്ദ്രത്തില്‍ പുതിയ കഴിവുകള്‍ പഠിക്കാനും ഓണ്‍ലൈന്‍ അഭിമുഖങ്ങളും ചര്‍ച്ചകളും നടത്താനും ഇതിലൂടെ സാധിക്കും.
പ്രവാസി വിദ്യാര്‍ഥികള്‍ക്ക് ആവശ്യമായ നൈപുണ്യ പരിശീലനം നല്‍കാനും അവരുടെ കഴിവിനും അഭിരുചിക്കും അനുസൃതമായ ജോലി തെരഞ്ഞെടുക്കാനും ഉള്‍പ്പെടെ സഹായിക്കുന്ന രീതിയില്‍ ആര്‍ട്ടിഫിഷ്യല്‍ ഇന്റലിജന്‍സ് സാങ്കേതികവിദ്യയുടെ സഹായത്തോടെ പ്രവര്‍ത്തിക്കുന്നതാണ് പുതിയ പ്ലാറ്റ്ഫോം. ഐഡന്റിറ്റി വെരിഫിക്കേഷന്‍ സംവിധാനം, തൊഴിലുകള്‍ പോസ്റ്റ് ചെയ്യാനുള്ള സൗകര്യം, തൊഴിലവസരങ്ങളും അനുയോജ്യരായ ഉദ്യോഗാര്‍ഥികളെയും തിരയുന്നതിനുള്ള സെര്‍ച്ച് ഫംഗ്ഷനുകള്‍, അഡ്മിനിസ്ട്രേറ്റര്‍മാര്‍ക്കുള്ള വിപുലമായ ഡാഷ്‌ബോര്‍ഡ് തുടങ്ങിയവ സൗകര്യങ്ങള്‍ പ്ലാറ്റ്‌ഫോമില്‍ ലഭ്യമാണ്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല