സൗദിയിൽ വ്യവസായ സ്ഥാപ നങ്ങളിലെ വിദേശ തൊഴിലാളി കളുടെ ലെവി ഇളവ് അടുത്ത വർഷാവസാനം വരെ നീട്ടി

സ്വന്തം ലേഖകൻ: സൗദിയിലെ വ്യാവസായിക മേഖലയിൽ ജോലി ചെയ്യുന്ന പ്രവാസികളുടെ ഫീസ് ഒഴിവാക്കാനുള്ള തീരുമാനം അടുത്ത വർഷം ഡിസംബർ 31 വരെ നീട്ടാൻ സൗദി അറേബ്യ തീരുമാനിച്ചു. സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാന്റെ അധ്യക്ഷതയിൽ നടന്ന മന്ത്രിസഭയുടെ പ്രതിവാര സമ്മേളനമാണ് ഈ തീരുമാനം കൈക്കൊണ്ടത്.

വ്യാവസായിക മേഖലയിലെ പ്രവാസി തൊഴിലാളികൾക്കുള്ള ഫീസ് അഞ്ച് വർഷത്തേക്ക് ഒഴിവാക്കിയതിന്റെ കാലാവധി അവസാനിച്ച സാഹചര്യത്തിലാണ് മന്ത്രിസഭാ തീരുമാനം. സൗദി പൗരന്മാർക്ക് വ്യാവസായിക മേഖലയിൽ തൊഴിലവസരങ്ങൾ സൃഷ്ടിക്കാനുള്ള നീക്കത്തിന്റെ ഭാഗമായാണ് സൗദി സർക്കാർ മേഖലയിലെ പ്രവാസി തൊഴിലാളികൾക്ക് ഫീസ് ഏർപ്പെടുത്തിയത്. എന്നാൽ, 2019 ഒക്ടോബർ ഒന്നുമുതൽ അഞ്ച് വർഷത്തേക്ക് ഈ ഫീസ് സർക്കാർ ഒഴിവാക്കുകയായിരുന്നു.

വ്യവസായ മേഖലയിലെ നിക്ഷേപം പ്രോത്സാഹിപ്പിക്കുക, ഉൽപാദന ചെലവ് കുറക്കുക, കയറ്റുമതി വർധിപ്പിക്കുക തുടങ്ങിയ ലക്ഷ്യങ്ങളോടെയാണ് ഫീസ് ഇളവ് നൽകുന്ന പദ്ധതി തുടങ്ങിയത്. ഇതുപ്രകാരം അഞ്ച് വർഷത്തേക്ക് തൊഴിലാളികളുടെ ഫീസ് രാജ്യം വഹിക്കുമെന്നായിരുന്നു 2019ലെ പ്രഖ്യാപനം. സൗദി ഭരണാധികാരി പ്രഖ്യാപിച്ച ഈ തീരുമാനമാണ് വീണ്ടും നീട്ടിയത്. വ്യവസായ മേഖലയിലെ സ്ഥാപനങ്ങൾക്ക് 3000 കോടിയോളം റിയാലാണ് ലെവി ഇളവിലൂടെ ലാഭിക്കാനാകുക.

വ്യവസായ മേഖലയ്ക്കും ഇതര മേഖലകൾക്കും ആശ്വാസമുണ്ടാക്കിയ പ്രഖ്യാപനം തൊഴിൽ വിപണിയിലും ഉണർവ് സൃഷ്ടിച്ചിരുന്നു. മാനവേശേഷി സാമൂഹിക വികസന മന്താലയം, ധനകാര്യമന്ത്രാലയം എന്നിവയുടെ സഹകരണത്തോടെയാണ് പദ്ധതി നടപ്പാക്കുന്നത്. ആറരലക്ഷം വിദേശ തൊഴിലാളികൾക്കാണ് ഇതിന്റെ ആശ്വാസം ലഭിക്കുന്നത്. കഴിഞ്ഞ വർഷവും ഒരു വർഷത്തേക്ക് ഇളവ് നീട്ടുകയായിരുന്നു. 2025 ഡിസംബർ 31 വരെയാണ് ചൊവ്വാഴ്ച ജിദ്ദയിൽ ചേർന്ന മന്ത്രിസഭാ പ്രതിവാര യോഗം ഫീസ് ഇളവ് നീട്ടിനൽകിയിരിക്കുന്നത്.

നിലവിലെ പ്രാദേശികവും അന്തർദേശീയവുമായ സംഭവവികാസങ്ങളെക്കുറിച്ച് മന്ത്രിസഭാ യോഗം ചർച്ച ചെയ്യുകയും ഗാസയിൽ വെടിനിർത്തൽ സാധ്യമാക്കാനുള്ള ശ്രമങ്ങൾക്ക് രാജ്യത്തിന്റെ പിന്തുണ ആവർത്തിച്ച് പ്രഖ്യാപിക്കുകയും ചെയ്തതായി സൗദി ഹ്യൂമൻ റിസോഴ്സ്, സോഷ്യൽ ഡെവലപ്മെന്റ് മന്ത്രിയും മീഡിയ ആക്ടിങ് മന്ത്രിയുമായ എൻജി. അഹമ്മദ് അൽ റാജ്ഹി സൗദി പ്രസ് ഏജൻസിക്ക് നൽകിയ പ്രസ്താവനയിൽ പറഞ്ഞു.

മേഖലയിൽ സമാധാനം കൈവരിക്കുന്നതിനും പലസ്തീൻ ജനതയുടെ നിയമാനുസൃതമായ അവകാശങ്ങൾ പുനസ്ഥാപിക്കുന്നതിനും ഇസ്രായേൽ അധിനിവേശം അവസാനിപ്പിക്കേണ്ടതിന്റെ ആവശ്യകതയും യോഗം ആവർത്തിച്ചു.