സൗദിയിലേക്ക് പുതിയ സര്‍വീസുകള്‍ പ്രഖ്യാപിച്ച് എയര്‍ ഇന്ത്യ എക്‌സ്പ്രസ്; യാത്രാദുരിതത്തിന് ആശ്വാസം

സ്വന്തം ലേഖകൻ: പ്രവാസികൾക്ക് ആശ്വാസമാകുന്ന തീരുമാനം ആണ് എയര്‍ ഇന്ത്യ എക്‌സ്പ്രസ് പുറത്തുവിട്ടിരിക്കുന്നത്. സൗദി അറേബ്യയിലെ റിയാദിലേക്ക് കേരളത്തിൽ നിന്നും പുതിയ സർവീസ് ആണ് എയർ ഇന്ത്യ എക്സ്പ്രസ് പ്രഖ്യാപിച്ചിരിക്കുന്നത്. പ്രവാസികൾ നിരന്തരം ആവശ്യങ്ങൾ ഉന്നയിച്ചതിനെ തുടർന്നാണ് ഇത്തരത്തിലൊരു പ്രഖ്യാപനം എയർ ഇന്ത്യ എക്സ്പ്രസ് നടത്തിയത്.

എയര്‍ ഇന്ത്യ എക്സ്പ്രസ് സര്‍വീസുകള്‍ തുടങ്ങുന്നത് തിരുവനന്തപുരത്ത് നിന്നാണ് എന്ന് തിരുവനന്തപുരം ഇന്റര്‍നാഷണല്‍ എയര്‍പോര്‍ട്ട് ലിമിറ്റഡ്(ടിയാല്‍) അറിയിച്ചു. തിരുവനന്തപുരത്ത് നിന്നും റിയാദിലേക്കാണ് സർവീസ് ആരംഭിച്ചിരിക്കുന്നത്. ഓണത്തിന് നാട്ടിൽ നിന്നും പോകുന്നവർക്ക് വലിയ ആശ്വാസമാകുന്ന പ്രഖ്യാപനമാണ് ഇപ്പോൾ എത്തിയിരിക്കുന്നത്. സെപ്റ്റംബര്‍ 9ന് തിരുവനന്തപുരത്ത് നിന്ന് റിയാദിലേക്ക് വിമാന സര്‍വീസ് ആരംഭിച്ചെന്ന് ടിയാല്‍ പുറത്തിറക്കിയ പ്രസ്ഥാവനയിൽ പറയുന്നു.

എയര്‍ ഇന്ത്യ എക്‌സ്പ്രസിന്റെ IX 521 എന്ന വിമാനം ആണ് സർവീസ് നടത്തുക. എല്ലാ തിങ്കളാഴ്ചയും രാത്രി 7. 55 ന് തിരുവനന്തപുരത്ത് നിന്നും വിമാനം പുറപ്പെടും. രാത്രി 10. 40 ന് റിയാദിലെത്തും. പിന്നീട് അതേദിവസം രാത്രി 11.20 ന് റിയാദില്‍ നിന്ന് പുറപ്പെട്ട് ചൊവ്വാഴ്ച രാവിലെ 7.30 ന് തിരുവനന്തപുരത്തെത്തും. തെക്കൻ കേരളത്തിലെ പ്രവാസികൾക്ക് വലിയ ആശ്വാസമാകുന്ന ഒരു തീരുമാനം ആണ് എത്തിയിരിക്കുന്നത്. നിരവധി കാലത്തെ പ്രവാസികളുടെ ആവശ്യമായിരുന്നു നേരിട്ടുള്ള വിമാന സർവീസ്. ഇതുവരെ കണക്ഷൻ വിമാനത്തെ ആശ്രയിച്ചാണ് പലരും സൗദിയിലേക്ക് പോയിരുന്നത്.

അതേസമയം, എയര്‍ഇന്ത്യ എക്‌സ്പ്രസിന്‍റെ പുതുക്കിയ ബാഗേജ് നയത്തില്‍ മാറ്റം ആവശ്യപ്പെട്ട് പ്രവാസി ലീഗല്‍ സെല്‍ പ്രസ്ഥാവന പുറത്തിറക്കി. കേന്ദ്ര വ്യോമയാന മന്ത്രി കെ. റാം മോഹന്‍ നായിഡുവിന് പ്രവാസി ലീഗല്‍ സെല്‍ ഇതുമായി ബന്ധപ്പെട്ട നിവേദനം സമർപ്പിച്ചു.

ഗൾഫിലേക്ക് പോകുന്ന പ്രവാസികൾക്ക് എയർ ഇന്ത്യ ബാഗെജ് നിരക്കില്‍ ചെറിയ മാറ്റം എയർഇന്ത്യ എക്സ്പ്രസ് എയർ ഇന്ത്യ കൊണ്ടുവന്നിരുന്നു. ഇത് യാത്രക്കാർക്ക് വലിയ ബുദ്ധിമട്ട് ഉണ്ടാക്കി. ഹാന്‍ഡ് ക്യാരിയായി കൊണ്ടുപോകുന്ന ലാപ്ടോപ്പിന് പോലും എയര്‍ഇന്ത്യ എക്‌സ്പ്രസ് ഒഴിവു നല്‍കുന്നില്ല. ഇതെല്ലാം തൂക്കത്തിൽ കണക്കുവെക്കുന്നത് വലിയ ബുദ്ധിമുട്ടാണ് പ്രവാസികൾക്ക് ഉണ്ടാക്കിയത് . എയർ ഇന്ത്യ എക്സ്പ്രസിന്റെ പുതിയ നയത്തിൽ മാറ്റം വരണം എന്നത് കാണിച്ചാണ് പരാതി നൽകിയിരിക്കുന്നത്.