സ്വന്തം ലേഖകൻ: ദുബായിലെ പ്രധാന റോഡുകള്‍ വികസിപ്പിക്കുന്നതിനായി 16 ബില്യണ്‍ ദിര്‍ഹത്തിന്റെ 22 പ്രധാന പദ്ധതികളുമായി ദുബായ് റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റിയുടെ (ആര്‍ടിഎ). മെയിന്‍ റോഡ്സ് ഡെവലപ്മെന്റ് പ്ലാന്‍ 2024-2027 എന്ന പേരിലുള്ള മാസ്റ്റര്‍ പ്ലാന്‍ ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയും എക്സിക്യൂട്ടീവ് കൗണ്‍സില്‍ ചെയര്‍മാനുമായ ശെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം അവലോകനം ചെയ്തു.
ആര്‍ടിഎ ആസ്ഥാനം സന്ദര്‍ശിച്ചപ്പോഴായിരുന്നു അദ്ദേഹം പദ്ധതികള്‍ അവലോകനം ചെയ്തത്. ദുബായ് ട്രാമിന്റെ പത്താം വാര്‍ഷികത്തോടനുബന്ധിച്ച്, എമിറേറ്റിലുടനീളം എട്ട് സ്ഥലങ്ങളില്‍ പരിസ്ഥിതി സൗഹൃദ വൈദ്യുത ഗതാഗത സംവിധാനമായ ‘ട്രാക്ക്‌ലെസ് ട്രാം’ പദ്ധതി നടപ്പാക്കുന്നത് പഠിക്കാന്‍ ശെയ്ഖ് ഹംദാന്‍ ആര്‍ടിഎയോട് നിര്‍ദ്ദേശിച്ചു.
അടുത്ത വര്‍ഷം ആരംഭിക്കാനിരിക്കുന്ന ലത്തീഫ ബിന്‍ത് ഹംദാന്‍ സ്ട്രീറ്റ് വികസനം ഉള്‍പ്പെടെ 22 പദ്ധതികള്‍ ഉള്‍പ്പെടുന്ന ആര്‍ടിഎയുടെ റോഡ്സ് പ്രോജക്ട് പ്ലാനുകളെ കുറിച്ച് ശെയ്ഖ് ഹംദാന്‍ മുമ്പാകെ വിശദീകരിച്ചു. അല്‍ ഖൈല്‍ റോഡില്‍ നിന്ന് എമിറേറ്റ്‌സ് റോഡിലേക്ക് 12,200 മീറ്റര്‍ നീളത്തില്‍ റോഡുകളും 8,100 മീറ്റര്‍ പാലങ്ങളും ഉള്‍ക്കൊള്ളുന്ന പദ്ധതിയാണിത്. 10 ലക്ഷത്തിലധികം നിവാസികള്‍ക്ക് സേവനം നല്‍കുന്ന ഈ പദ്ധതി രണ്ട് ദിശകളിലുമായി മണിക്കൂറില്‍ ഏകദേശം 16,000 വാഹനങ്ങളുടെ ശേഷി കൂട്ടുകയും യാത്രാ സമയം 15 മുതല്‍ 20 ശതമാനം വരെ കുറയ്ക്കുകയും ചെയ്യും.
10,600 മീറ്റര്‍ റോഡുകള്‍, 3,300 മീറ്റര്‍ പാലങ്ങള്‍, ആകെ 1,500 മീറ്റര്‍ നീളമുള്ള മൂന്ന് തുരങ്കങ്ങള്‍ എന്നിവ ഉള്‍പ്പെടുന്ന മെയ്ദാന്‍ റോഡ് വികസന പദ്ധതിയും ഇതിന്റെ ഭാഗമായി നടപ്പിലാക്കും. ഇത് ഏകദേശം 10 ലക്ഷം ആളുകള്‍ക്ക് പ്രയോജനം ചെയ്യും. ഇരു ദിശകളിലുമായി മണിക്കൂറില്‍ 22,000 വാഹനങ്ങളുടെ ശേഷി കൂട്ടുമെന്നും ഉമ്മു സുഖീം സ്ട്രീറ്റില്‍ നിന്ന് മെയ്ദാന്‍ സ്ട്രീറ്റിലേക്കുള്ള യാത്രാ സമയം വെറും നാല് മിനിറ്റായി കുറയ്ക്കുമെന്നും പ്രതീക്ഷിക്കുന്നു.
അല്‍ മുസ്തഖ്ബാല്‍ സ്ട്രീറ്റിന്റെയും ട്രേഡ് സെന്റര്‍ റൗണ്ട് എബൗട്ടിന്റെയും വികസന പദ്ധതികള്‍ ശെയ്ഖ് ഹംദാന്‍ അവലോകനം ചെയ്തു. 6,200 മീറ്റര്‍ നീളമുള്ള പാലങ്ങളുടെയും തുരങ്കങ്ങളുടെയും നിര്‍മ്മാണം പദ്ധതിയില്‍ ഉള്‍പ്പെടുന്നു, ഇത് റോഡിന്റെ ശേഷി മണിക്കൂറില്‍ 9,000 മുതല്‍ 12,000 വരെ വാഹനങ്ങളായി വര്‍ദ്ധിപ്പിക്കും. ഇത് യാത്രാ സമയം എട്ട് മിനിറ്റില്‍ നിന്ന് മൂന്ന് മിനിറ്റ് 30 സെക്കന്‍ഡായി കുറയ്ക്കുകയും അര ദശലക്ഷത്തിലധികം താമസക്കാര്‍ക്കും സന്ദര്‍ശകര്‍ക്കും പ്രയോജനം ചെയ്യും.
ട്രേഡ് സെന്റര്‍ റൗണ്ട് എബൗട്ട് വികസന പദ്ധതിക്ക് ആര്‍ടിഎ കരാര്‍ നല്‍കിയിട്ടുണ്ട്, എല്ലാ ദിശകളിലേക്കും ഗതാഗതം സുഗമമാക്കുന്നതിന് 5,000 മീറ്റര്‍ നീളമുള്ള അഞ്ച് പാലങ്ങളുടെ നിര്‍മ്മാണം ഉള്‍പ്പെടുന്ന പദ്ധതിയാണിത്. ട്രാഫിക് സിഗ്‌നലുകളാല്‍ നിയന്ത്രിക്കപ്പെടുന്ന ഒരു ഉപരിതല ലെവല്‍ ഇന്റര്‍സെക്ഷനായി റൗണ്ട്എബൗട്ട് പരിവര്‍ത്തനം ചെയ്യും. ഇത് ട്രാഫിക് മെച്ചപ്പെടുത്തുകയും കാലതാമസം 12 മിനിറ്റില്‍ നിന്ന് 90 സെക്കന്‍ഡായി കുറയ്ക്കുകയും ചെയ്യും.
ഈ വര്‍ഷം അവസാനത്തോടെ അല്‍ മുസ്തഖ്ബാല്‍ സ്ട്രീറ്റ് വികസന പദ്ധതിയുടെ കരാറും ആര്‍ടിഎ നല്‍കും. ജുമൈറ സ്ട്രീറ്റ് കവല മുതല്‍ എമിറേറ്റ്‌സ് റോഡ് വരെയുള്ള 16,000 മീറ്റര്‍ നീളത്തില്‍ ഉമ്മു സുഖീം, അല്‍ ഖുദ്ര സ്ട്രീറ്റുകള്‍ എന്നിവയുടെ വികസന പദ്ധതികളെക്കുറിച്ചും ശെയ്ഖ് ഹംദാന്‍ അവലോകനം ചെയ്തു. 2,500 മീറ്റര്‍ പാലങ്ങളും 2,000 മീറ്റര്‍ തുരങ്കങ്ങളും ഉള്‍പ്പെടെ നാല് ഇന്റര്‍സെക്ഷനുകളുടെ വികസനം പദ്ധതിയില്‍ ഉള്‍പ്പെടുന്നു. ഇത് റോഡിന്റെ ശേഷി മണിക്കൂറില്‍ 8,400-ല്‍ നിന്ന് 12,600 ആയി വര്‍ദ്ധിപ്പിക്കുകയും യാത്രാ സമയം 46 മിനിറ്റില്‍ നിന്ന് 11 മിനിറ്റായി കുറയ്ക്കുകയും ചെയ്യും, ഇത് 800,000-ത്തിലധികം താമസക്കാര്‍ക്ക് പ്രയോജനം ചെയ്യും.
അല്‍ ഫയ് സ്ട്രീറ്റ് വികസന പദ്ധതിയെക്കുറിച്ചും ശെയ്ഖ് ഹംദാന്‍ ചര്‍ച്ച ചെയ്തു. അല്‍ ഖൈല്‍ റോഡ് ശെയ്ഖ് മുഹമ്മദ് ബിന്‍ സായിദ് റോഡുമായി ചേരുന്ന കവല മുതല്‍ തുടങ്ങി ശയ്ഖ് സായിദ് ബിന്‍ ഹംദാന്‍ അല്‍ നഹ്യാന്‍ സ്ട്രീറ്റിലൂടെ എമിറേറ്റ്‌സ് റോഡ് വരെ വ്യാപിച്ചുകിടക്കുന്ന ദുബായിലെ പ്രധാന ഇടനാഴികളിലൊന്നായ അല്‍ ഫയ് സ്ട്രീറ്റിന്റെ വികസനവും യോഗത്തില്‍ ചര്‍ച്ച ചെയ്തു. 12,900 മീറ്റര്‍ റോഡ് നിര്‍മാണവും അഞ്ച് കവലകളുടെ വികസനവും 13,500 മീറ്റര്‍ പാലങ്ങളും ഉള്‍പ്പെടുന്നതാണ് പദ്ധതി. ഇത് മണിക്കൂറില്‍ ഏകദേശം 64,400 വാഹനങ്ങള്‍ക്ക് അധിക ശേഷി നല്‍കുകയും ഏകദേശം 600,000 താമസക്കാര്‍ക്ക് പ്രയോജനം ചെയ്യുകയും ചെയ്യും.
ശെയ്ഖ് സായിദ് റോഡ് മുതല്‍ അല്‍ വാസല്‍ റോഡ് വരെ നീളുന്ന അല്‍ സഫ സ്ട്രീറ്റ് വികസന പദ്ധതിയും ശെയ്ഖ് ഹംദാന്‍ അവലോകനം ചെയ്തു. അല്‍ സഫ സ്ട്രീറ്റില്‍ നിന്ന് സിറ്റി വാക്ക് പദ്ധതിയിലേക്ക് നേരിട്ട് പ്രവേശനം നല്‍കുന്ന രണ്ട് വരി തുരങ്കവും 650 മീറ്റര്‍ പാലങ്ങളും ഉള്‍പ്പെടെ 2,100 മീറ്റര്‍ തുരങ്കങ്ങളുടെ നിര്‍മ്മാണവും പദ്ധതിയില്‍ ഉള്‍പ്പെടുന്നു. ഈ നവീകരണങ്ങള്‍ തെരുവിന്റെ ശേഷി മണിക്കൂറില്‍ 6,800-ല്‍ നിന്ന് 9,400 വാഹനങ്ങളായി വര്‍ദ്ധിപ്പിക്കുകയും യാത്രാ സമയം 20 മിനിറ്റില്‍ നിന്ന് രണ്ട് മിനിറ്റായി കുറയ്ക്കുകയും ചെയ്യും. ഇത് ഏകദേശം 358,000 താമസക്കാര്‍ക്ക് പ്രയോജനം ചെയ്യുമെന്നാണ് വിലയിരുത്തപ്പെടുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല