പ്രവാസി ഉദ്യോഗാര്‍ഥികളുടെ ഒഴുക്ക്; യുഎഇയില്‍ ഈ തൊഴില്‍ മേഖലകളില്‍ ശമ്പളം കുറയുന്നു

സ്വന്തം ലേഖകൻ: യുഎഇയിലേക്കുള്ള പ്രവാസി പ്രൊഫഷണലുകളുടെ കുത്തൊഴുക്ക് കാരണം രാജ്യത്ത് പ്രവാസി ജീവനക്കാരുടെ ശമ്പളത്തില്‍ വലിയ തോതിലുള്ള കുറവുണ്ടായതായി പുതിയ പഠനം വെളിപ്പെടുത്തി. പ്രവാസികളുടെ ഈ കുത്തൊഴുക്ക് യുഎഇയെ തൊഴിലുടമയുടെ വിപണിയാക്കി മാറ്റിയതായും നൈപുണ്യങ്ങളുടെ വലിയ തോതിലുള്ള മിച്ചം ഇതുണ്ടാക്കിയതായും അധികൃതര്‍ അറിയിച്ചു.

റിക്രൂട്ട്മെന്‍റ് കണ്‍സള്‍ട്ടന്‍സി സ്ഥാപനമായ റോബര്‍ട്ട് ഹാഫിന്‍റെ പഠനം പറയുന്നതനുസരിച്ച്, രാജ്യത്തെ പ്രൊഫഷണല്‍ സേവനങ്ങളുമായി ബന്ധപ്പെട്ട ജോലികളുടെ ശരാശരി ആരംഭ ശമ്പളം വര്‍ഷം തോറും 0.7 ശതമാനം കുറഞ്ഞുവരികയാണ്. ഇതുകാരണം രാജ്യത്തെ പകുതിയിലധികം ജീവനക്കാരും അടുത്ത വര്‍ഷം പുതിയ ജോലി തേടിപ്പോവാന്‍ പദ്ധതിയിടുന്നതായും കമ്പനിയുടെ 2025-ലെ ശമ്പള ഗൈഡ് പറയുന്നു.

ഫിനാന്‍സ്, അക്കൗണ്ടിംഗ്, ഹ്യൂമന്‍ റിസോഴ്സ് മേഖലകളിലാണ് പ്രതിഭകളുടെ കുത്തൊഴുക്ക് കാരണം യുഎഇയിലെ ശരാശരി ശമ്പളത്തെ ഏറ്റവും കൂടുതല്‍ ബാധിച്ചതെന്ന് റോബര്‍ട്ട് ഹാഫിലെ മിഡില്‍ ഈസ്റ്റിന്‍റെ ഡയറക്ടര്‍ ഗാരെത് എല്‍ മെറ്റൂറി പറഞ്ഞു.

നിലവിലെ സാഹചര്യത്തില്‍ ഒരു കമ്പനി ഒരു ഒഴിവിലേക്ക് പരസ്യം ചെയ്താല്‍ 2,000 ത്തിലധികം അപേക്ഷകര്‍ ജോലിക്കായി അപേക്ഷിക്കുന്നത് അസാധാരണമായ കാര്യമല്ല. നിയമത്തിലും സാങ്കേതികവിദ്യയിലും കൂടുതല്‍ സവിശേഷമായ റോളുകളിലേക്ക് സാധാരണയായി കുറച്ച് അപേക്ഷകള്‍ മാത്രമേ ലഭിക്കുന്നുള്ളൂ എന്നും അദ്ദേഹം പറഞ്ഞു.

ഫിനാന്‍സ്, അക്കൗണ്ടിങ് റോളുകള്‍ക്കുള്ള പ്രാരംഭ ശമ്പളം ശരാശരി 2.1 ശതമാനവും ചില കോര്‍പ്പറേറ്റ് അക്കൗണ്ടിങ് റോളുകള്‍ക്ക് 23 ശതമാനവും കുറഞ്ഞു. അക്കൗണ്ടിങ് വൈദഗ്ധ്യമുള്ളവര്‍ക്ക് ഇപ്പോഴും ആവശ്യക്കാരുണ്ടെങ്കിലും കൃത്യമായ സ്‌പെഷ്യലൈസേഷനില്ലാത്തവര്‍ക്ക് ജോലി കിട്ടുക പ്രയാസമാണ്.

ഒരു തസ്തികയിലേക്ക് ആളുകളെ റിക്രൂട്ട് ചെയ്യാന്‍ ഉദ്ദേശിക്കുന്ന സ്ഥാപനത്തിന് എത്ര വേണമെങ്കിലും ഉദ്യോഗാര്‍ഥികളെ എളുപ്പത്തില്‍ ലഭിക്കുമെന്നുള്ളത് അവരുടെ വിപണി മൂല്യം കുറയ്ക്കുന്നുവെന്നും റോബര്‍ട്ട് ഹാഫ് പറഞ്ഞു.

അടുത്ത കാലത്തായി യുഎഇയിലെ ജനസംഖ്യയില്‍ വളരെ വലിയ വര്‍ധനവാണ് രേഖപ്പെടുത്തിയിട്ടുള്ളത്. പ്രത്യേകിച്ച് അബുദാബിയലും ദുബായിലും. രാജ്യത്തേക്കുള്ള നിക്ഷേപകരുടെയും പ്രൊഫഷണലുകളുടെയും കടന്നുകയറ്റം കാരണം രാജ്യത്തെ ജനസംഖ്യ എക്കാലത്തെയും ഉയര്‍ന്ന നിരക്കിലെത്തി. 2024 നവംബര്‍ നാലിന് ദുബായിലെ ജനസംഖ്യ 3.798 ദശലക്ഷമായി ഉയര്‍ന്നു.

2024 ലെ ആദ്യ 11 മാസങ്ങളില്‍ 140,000 പേരുടെ വര്‍ധനവാണ് രേഖപ്പെടുത്തിയിരിക്കുന്നത്. 2023 ല്‍ ദുബായിലെ ജനസംഖ്യ ഒരു ലക്ഷത്തിലധികം വര്‍ദ്ധിച്ചിരുന്നു. അബുദാബിയിലെ ജനസംഖ്യ 2023-ല്‍ 3.789 ദശലക്ഷത്തിലെത്തി. 2011-നെ അപേക്ഷിച്ച് 83 ശതമാനം വര്‍ധനവാണ് രേഖപ്പെടുത്തിയിരിക്കുന്നത്.