സ്വന്തം ലേഖകൻ: യുഎഇയുടെ ആദ്യത്തെ നിയന്ത്രിത ലോട്ടറി ഔദ്യോഗികമായി ആരംഭിച്ചു. 100 ദശലക്ഷം ദിര്‍ഹത്തിന്റെ ‘ലക്കി ഡേ’ ഗ്രാന്‍ഡ് പ്രൈസ് ആണ് ദ് യുഎഇ ലോട്ടറിയുടെ വലിയ സമ്മാനം. ഔദ്യോഗികമായി പ്രഖ്യാപിച്ച് ഏകദേശം നാല് മാസങ്ങള്‍ക്ക് ശേഷമാണ് ലോട്ടറി ആരംഭിക്കുന്നത്. ഉദ്ഘാടന തത്സമയ നറുക്കെടുപ്പ് ഡിസംബര്‍ 14ന് നടക്കും.
ജനറല്‍ കൊമേഴ്സ്യല്‍ ഗെയിമിങ് റെഗുലേറ്ററി അതോറിറ്റിയുടെ (ജിസിജിആര്‍എ) ലൈസന്‍സുള്ള അബുദാബി ആസ്ഥാനമായി പ്രവര്‍ത്തിക്കുന്ന ഗെയിം എല്‍എല്‍സി എന്ന കമ്പനിയാണ് യുഎഇ ലോട്ടറി നിയന്ത്രിക്കുന്നത്. 18 വയസ്സും അതില്‍ കൂടുതലും പ്രായമുള്ള യുഎഇ നിവാസികള്‍ക്ക് ലോട്ടറിയില്‍ പങ്കെടുക്കാം. theuaelottery.ae എന്ന വെബ് സൈറ്റിലൂടെ ലോട്ടറി എടുക്കാം.
‘ലക്കി ഡേ’ ഗെയിമിന്റെ ഭാഗമായ 10 കോടി ദിര്‍ഹമാണ് ഏറ്റവും വലിയ സമ്മാനം. 50 ദിര്‍ഹമാണ് ഒരു ടിക്കറ്റിനുള്ള നിരക്ക്. ജാക്ക്പോട്ടിന് പുറമേ, ഏഴ് ‘ലക്കി ചാന്‍സ് ഐഡികളും’ ഒരു ലക്ഷം ദിര്‍ഹം വീതം ഉറപ്പായ സമ്മാനം നേടും. പങ്കെടുക്കുന്നവര്‍ക്ക് 10 കോടി ദിര്‍ഹം, 10 ലക്ഷം ദിര്‍ഹം, ഒരു ലക്ഷം ദിര്‍ഹം, 1000 ദിര്‍ഹം, 100 ദിര്‍ഹം എന്നിങ്ങനെയും സമ്മാനങ്ങള്‍ നേടാം.
നിലവില്‍ ലോട്ടറി രണ്ട് ഗെയിമുകളാണ് വാഗ്ദാനം ചെയ്യുന്നത്. ലക്കി ഡേയും സ്‌ക്രാച്ച് കാര്‍ഡുകളും. കൂടുതല്‍ ഗെയിമുകള്‍ ഉടന്‍ ചേര്‍ക്കാന്‍ സാധ്യതയുണ്ടെന്ന് അധികൃതര്‍ അറിയിച്ചു. ‘ലക്കി ഡേ’ വിഭാഗത്തില്‍ പങ്കെടുക്കുന്നവര്‍ ‘ദിവസങ്ങള്‍’ വിഭാഗത്തില്‍ നിന്ന് ആറ് നമ്പറുകളും ‘മാസങ്ങളില്‍’ നിന്ന് ഒരെണ്ണവും തെരഞ്ഞെടുക്കും. നറുക്കെടുപ്പ് ഫലവുമായി എല്ലാ ഏഴ് നമ്പറുകളും ഒത്തുവന്നാല്‍ അവര്‍ ജാക്ക്പോട്ട് അടിക്കും. ‘ഡേയ്സ്’ എന്നതില്‍ നിന്നുള്ള ആറ് അക്കങ്ങളും പൊരുത്തപ്പെടുന്നവര്‍ക്കാണ് രണ്ടാം സമ്മാനം.
‘ഡേയ്സ്’ വിഭാഗത്തില്‍ നിന്നുള്ള അഞ്ച് അക്കങ്ങളും ‘മാസം’ എന്നതില്‍ നിന്ന് ഒരെണ്ണവും പൊരുത്തപ്പെടുകയാണെങ്കില്‍, അവര്‍ക്ക് മൂന്നാം സമ്മാനം ലഭിക്കും. ‘ഡേയ്സ്’ എന്നതില്‍ നിന്നുള്ള അഞ്ച് അക്കങ്ങളോ ‘ഡേയ്സ്’ എന്നതില്‍ നിന്ന് നാല് അക്കങ്ങളും ‘മാസങ്ങളില്‍’ ഒരു അക്കവുമോ യോജിക്കുന്നുവെങ്കില്‍ അവര്‍ക്ക് നാലാം സമ്മാനം അവകാശപ്പെടാം. ‘ദിവസങ്ങള്‍’ വിഭാഗത്തില്‍ നിന്ന് മൂന്ന് അക്കങ്ങളും ‘മാസങ്ങളില്‍’ നിന്ന് ഒരു അക്കവും, അല്ലെങ്കില്‍ ‘ദിവസങ്ങളില്‍’ നിന്ന് രണ്ടെണ്ണവും ‘മാസങ്ങളില്‍’ നിന്ന് ഒരെണ്ണവും, അല്ലെങ്കില്‍ ‘ദിവസങ്ങളില്‍’ നിന്ന് ഒന്നും ‘മാസങ്ങളില്‍’ നിന്ന് ഒന്നും, അല്ലെങ്കില്‍ മാസങ്ങളില്‍ നിന്ന് ഒന്ന് ഒത്തുവന്നാല്‍ അവര്‍ക്ക് അഞ്ചാം സമ്മാനം ലഭിക്കും.
ലോട്ടറി പ്രകാരം വിജയിക്കാനുള്ള സാധ്യതയും അധികൃതര്‍ വ്യക്തമാക്കിയിട്ടുണ്ട്. ഇതുപ്രകാരം, ജാക്ക്പോട്ട് (10 കോടി ദിര്‍ഹം) 8,835,372 ല്‍ ഒന്ന്, രണ്ടാം സമ്മാനം (1 ദശലക്ഷം ദിര്‍ഹം) 803,216 ല്‍ ഒന്ന്, മൂന്നാം സമ്മാനം (100,000 ദിര്‍ഹം) 58,902 ല്‍ ഒന്ന്, നാലാം സമ്മാനം (ദിര്‍ഹം1,000) 1,437ല്‍ ഒന്ന്, അഞ്ചാം സമ്മാനം (100 ദിര്‍ഹം) ഒന്നില്‍ 12.1 എന്നിങ്ങനെയാണ് വിജയിക്കാനുള്ള സാധ്യത. ഡിസംബര്‍ 14-ന് നടക്കുന്ന ഉദ്ഘാടന നറുക്കെടുപ്പിന് ഏഴ് ‘ലക്കി ചാന്‍സ് ഐഡികള്‍’ 100,000 ദിര്‍ഹം വീതം നേടുമെന്ന് ഉറപ്പാണ്. ഒന്നില്‍ കൂടുതല്‍ ജാക്ക്പോട്ട് വിജയികള്‍ ഉണ്ടെങ്കില്‍ വിജയിക്കുന്ന ടിക്കറ്റ് ഉടമകള്‍ക്ക് 10 കോടി ദിര്‍ഹം തുല്യമായി വിഭജിക്കും.
10 ലക്ഷം ദിര്‍ഹം വരെ സമ്മാനങ്ങള്‍ നേടിത്തരുന്ന സ്‌ക്രാച്ച് കാര്‍ഡുകള്‍ വാങ്ങാനുള്ള അവസരവുമുണ്ട്. ഈ കാര്‍ഡുകളുടെ നിരക്കുകള്‍ 5 ദിര്‍ഹം മുതല്‍ ആരംഭിക്കുന്നു. ഇത് 50,000 ദിര്‍ഹം വരെ വിജയിക്കാനുള്ള അവസരം നല്‍കുന്നു. നറുക്കെടുപ്പിന്റെ 10 ദിര്‍ഹം കാര്‍ഡുകള്‍ക്ക് ഉയര്‍ന്ന സമ്മാനം 100,000 ദിര്‍ഹമാണ്. 20 ദിര്‍ഹത്തിന് 300,000 ദിര്‍ഹമുണ്ട്. 50 ദിര്‍ഹം വിലയുള്ള കാര്‍ഡുകള്‍ ഉപയോഗിച്ച് കളിക്കാര്‍ക്ക് 10 ലക്ഷം ദിര്‍ഹം നേടാം. എല്ലാ ഇടവിട്ട ശനിയാഴ്ചകളിലും രാത്രി 8.30ന് ലോട്ടറിയുടെ തത്സമയ നറുക്കെടുപ്പ് നടക്കും.
‘ഡയര്‍ ടു ഇമാജിന്‍’ എന്ന ഞങ്ങളുടെ മുദ്രാവാക്യവുമായി യോജിച്ച് വലിയ സ്വപ്നങ്ങള്‍ കാണാന്‍ ആളുകളെ പ്രചോദിപ്പിക്കുക എന്നതാണ് യുഎഇ ലോട്ടറിയുടെ ലക്ഷ്യമെന്ന് ഗെയിം എല്‍എല്‍സിയുടെ ലോട്ടറി ഓപ്പറേഷന്‍സ് ഡയറക്ടര്‍ ബിഷപ്പ് വൂസ്ലി പറഞ്ഞു. ഉത്തരവാദിത്തമുള്ള ഗെയിം പ്രോത്സാഹിപ്പിക്കുന്നതിലൂടെ ആവേശകരമായ അനുഭവങ്ങള്‍ സൃഷ്ടിക്കുകയാണ് ഞങ്ങള്‍ ലക്ഷ്യമിടുന്നത്. എല്ലാ പ്രവര്‍ത്തനങ്ങളും ആഗോള മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കാന്‍ ഞങ്ങളുടെ ടീം പ്രതിജ്ഞാബദ്ധമാണ്, നറുക്കെടുപ്പ് പ്രക്രിയ മുതല്‍ വിജയികളെ തെരഞ്ഞെടുക്കുന്നത് വരെ ന്യായവും സുതാര്യതയും ഉറപ്പുനല്‍കുന്നുവെന്നും അദ്ദേഹം അറിയിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല