സ്വന്തം ലേഖകൻ: യുഎഇയിലെ പ്രൊഫഷനല്‍ മേഖലകളില്‍ ജോലി ചെയ്യുന്ന ജീവനക്കാരില്‍ 65 ശതമാനം പേരും 2025ല്‍ പുതിയ സ്ഥാപനത്തിലേക്ക് തൊഴില്‍ മാറ്റത്തിന് ശ്രമിക്കുന്നതായി റിപ്പോര്‍ട്ട്. ആഗോള റിക്രൂട്ട്‌മെൻ്റ് കണ്‍സല്‍ട്ടന്‍സിയായ ഹെയ്സ് പുറത്തിറക്കിയ ജിസിസി സാലറി ഗൈഡ് 2025 പ്രകാരമാണിത്. യുഎഇ ജീവനക്കാരില്‍ പകുതിയോളം പേര്‍ക്ക് അഥവാ 48 ശതമാനം പേര്‍ക്ക് 2024 ല്‍ ശമ്പള വര്‍ദ്ധനവ് ലഭിച്ചതായും 2024 ല്‍ 74 ശതമാനം പേര്‍ ശമ്പള വര്‍ദ്ധനവ് പ്രതീക്ഷിക്കുന്നതായും ഹെയ്സ് നടത്തിയ സര്‍വേയില്‍ പറയുന്നു.
2024 ല്‍ യുഎഇയിലെ ജീവനക്കാര്‍ക്ക് പൊതുവില്‍ 2.5 ശതമാനം മുതല്‍ 5 ശതമാനം വരെ ഇന്‍ക്രിമെൻ്റുകള്‍ ലഭിച്ചതായും സര്‍വേ കണ്ടെത്തി. അതേസമയം ജീവനക്കാരെ പോലതന്നെ 75 ശതമാനം തൊഴിലുടമകളും 2025 ല്‍ തങ്ങളുടെ സ്ഥാപനത്തില്‍ ശമ്പള വര്‍ദ്ധനവ് പ്രതീക്ഷിക്കുന്നതായി ഹെയ്സ് പുറത്തിറക്കിയ ജിസിസി സാലറി ഗൈഡ് 2025ല്‍ പറയുന്നു. രാജ്യത്തെ സമ്പദ് വ്യവസ്ഥയുടെ ശക്തമായ അവസ്ഥ പരിഗണിച്ച് ഈ വര്‍ഷം സ്ഥിരം തസ്തികകളിലേക്ക് നിയമനം നടത്തുമെന്ന് യുഎഇ തൊഴിലുടമകളില്‍ 10ല്‍ എട്ടു പേരും അഥവാ 77 ശതമാനം പേര്‍ പറഞ്ഞു.
അതേസമം, യുഎഇയിലെ 65 ശതമാനം പ്രൊഫഷണലുകളും ഈ വര്‍ഷം പുതിയ കമ്പനിയിലേക്ക് ജോലി മാറാന്‍ പദ്ധതിയിടുന്നതായും സര്‍വേയില്‍ കണ്ടെത്തി. ശമ്പളം, ആനുകൂല്യ പാക്കേജ്, വികസന സംരംഭങ്ങള്‍ എന്നിവ ലക്ഷ്യം വച്ചാണ് ഇവര്‍ തൊഴില്‍ മാറ്റത്തിന് ആഗ്രഹിക്കുന്നത്. യുഎഇയില്‍ അടുത്തിടെയുണ്ടായ കെട്ടിട വാടകയിലെയും റിയല്‍ എസ്റ്റേറ്റ് മേഖലയിലെയും വില വര്‍ധനവാണ് ഇതിന് കാരണമായി ചൂണ്ടിക്കാണിക്കപ്പെടുന്നത്. നിത്യോപയോഗ സാധനങ്ങള്‍ ഉള്‍പ്പെടെയുണ്ടായ വിലവര്‍ധനവും ഇതിന് കാരണമായി ചൂണ്ടിക്കാണിക്കപ്പെടുന്നു.
യുഎഇയിലെ സ്ഥാപനങ്ങളില്‍ 49 ശതമാനവും 2025 ലെ സാമ്പത്തിക സ്ഥിതിയെക്കുറിച്ച് ശുഭാപ്തിവിശ്വാസം വച്ചുപുലര്‍ത്തുന്നവരാണ്. 65 ശതമാനം കമ്പനികളും ജോലിസ്ഥലത്ത് കൃത്രിമ ബുദ്ധി (ആര്‍ട്ടിഫിഷ്യല്‍ ഇൻ്റലിജന്‍സ്-എഐ) സാങ്കേതികവിദ്യകള്‍ ഉപയോഗിക്കാന്‍ ശുപാര്‍ശ ചെയ്യുന്നു. യുഎഇയിലെ 10 ല്‍ 8 അഥവാ 79 ശതമാനം തൊഴിലുടമകളും ഭാവിയില്‍ ജീവനക്കാര്‍ക്ക് എഐ ഉപകരണങ്ങള്‍ ഉപയോഗിക്കാന്‍ അനുവദിക്കുമെന്ന് പ്രതീക്ഷിക്കുന്നതായും സര്‍വേ ഫലം വ്യക്തമാക്കി.
ഗള്‍ഫ് മേഖലയിലുടനീളമുള്ള ഏകദേശം 2,000 തൊഴിലുടമകളെയും പ്രൊഫഷണലുകളെയും ഉള്‍പ്പെടുത്തിക്കൊണ്ടാണ് ഹെയ്സ് ജിസിസി ശമ്പള ഗൈഡ് 2025 തയ്യാറാക്കിയത്. യുഎഇ ഉള്‍പ്പെടെ ജിസിസി രാജ്യങ്ങളിലെ പ്രധാനപ്പെട്ട 400 തൊഴില്‍ മേഖലകളെ ഉള്‍ക്കൊള്ളിച്ചുള്ളതാണ് സര്‍വേ.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല