സ്വന്തം ലേഖകൻ: ദുബായ് റോഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) നടപ്പിലാക്കുന്ന പുതിയ സാലിക് ടോള്‍ നിരക്ക് നാളെ ജനുവരി 31 മുതല്‍ പ്രാബല്യത്തില്‍ വരും. ഇതോടെ ദുബായിലെ റോഡ് യാത്രകള്‍ക്ക് ചെലവേറും. തിങ്കള്‍ മുതല്‍ ശനി വരെയുള്ള പ്രവൃത്തി ദിവസങ്ങളിലെ തിരക്കേറിയ സമയങ്ങളില്‍ അഥവാ രാവിലെ 6 മുതല്‍ 10 വരെയും വൈകുന്നേരം 4 മുതല്‍ രാത്രി 8 വരെയുമുള്ള സമയങ്ങളില്‍ സാലിക്കില്‍ 6 ദിര്‍ഹമായിരിക്കും ടോള്‍.
തിരക്കു കുറഞ്ഞ സമയം അഥവാ 4 ദിര്‍ഹം രാവിലെ 10 മുതല്‍ വൈകിട്ട് 4 വരെയും രാത്രി 8 മുതല്‍ പുലര്‍ച്ചെ ഒന്നു വരെയും സാലിക് ഗേറ്റ് കടന്നാല്‍ 4 ദിര്‍ഹം വീതം ഈടാക്കും. പുലര്‍ച്ചെ ഒരു മണി മുതല്‍ രാവിലെ ആറു മണി വരെ ടോള്‍ ഈടാക്കില്ലെന്നും അധികൃതര്‍ അറിയിച്ചു. അതേസമയം ഞായറാഴ്ചകളില്‍ (പൊതു അവധി ദിവസങ്ങളും പ്രത്യേക പരിപാടികളുള്ള ദിവസങ്ങളും ഒഴികെ) രാവിലെ ആറു മുതല്‍ പുലര്‍ച്ചെ ഒരു മണി വരെയുള്ള സമയങ്ങളിലെല്ലാം 4 ദിര്‍ഹമാണ് ഈടാക്കുക.
റമദാനില്‍ വ്യത്യസ്തമായ നിരക്കായിരിക്കും ഈടാക്കുക. രാവിലെ 9 മുതല്‍ വൈകുന്നേരം 5 വരെ ആഴ്ചയിലെ തിരക്കേറിയ സമയങ്ങളില്‍ 6 ദിര്‍ഹമും വൈകിട്ട് 5 മുതല്‍ പിറ്റേന്ന് രാവിലെ 2 മണിവരെയും രാവിലെ 7 മുതല്‍ രാവിലെ 9 വരെയുള്ള തിരക്ക് കുറഞ്ഞ സമയങ്ങളില്‍ നാല് ദിര്‍ഹം വീതവുമായിരിക്കും റമദാനിലെ ടോള്‍ നിരക്ക്.
റമദാനില്‍ തിങ്കള്‍ മുതല്‍ ശനി വരെ പുലര്‍ച്ചെ 2 മുതല്‍ രാവിലെ 7 വരെ ടോള്‍ ഗേറ്റ് വഴിയുള്ള യാത്ര സൗജന്യമായിരിക്കും. അതേസമയം, ഞായറാഴ്ചകളില്‍ (പൊതു അവധി ദിവസങ്ങളും പ്രത്യേക പരിപാടികളുള്ള ദിവസങ്ങളും ഒഴികെ) മറ്റു മാസങ്ങളിലെ പോലെ രാവിലെ ആറു മുതല്‍ പുലര്‍ച്ചെ ഒരു മണി വരെയുള്ള സമയങ്ങളിലെല്ലാം 4 ദിര്‍ഹമാണ് ഈടാക്കുക.
നിലവില്‍, നഗരത്തിലുടനീളമുള്ള 10 ടോള്‍ ഗേറ്റുകളില്‍ ഏതെങ്കിലും ഒരു വാഹനം കടന്നുപോകുമ്പോള്‍ ഓരോ തവണയും സാലിക് 4 ദിര്‍ഹം വീതം നിശ്ചിത ഫീസാണ് ഈടാക്കുക. എന്നാല്‍ നാളെ മുതല്‍ സമയം മാറുന്നതിന് അനുസരിച്ച് ഫീസ് വര്‍ധിക്കും. ഇതുപ്രകാരം തിരക്കേറിയ സമയങ്ങളില്‍ ഒരു തവണ ഒരു ദിശയില്‍ സാലിക് ഗേറ്റുകളെല്ലാം കടക്കേണ്ടിവരുന്ന വാഹനം 60 ദിര്‍ഹമും ഇരു ദിശകളിലേക്കും കടക്കേണ്ടിവരുന്ന വാഹനം 120 ദിര്‍ഹമും നല്‍കേണ്ടിവരും. നിലവില്‍ യഥാക്രമം 40, 80 ദിര്‍ഹമാണ് സാലിക്ക് ടോള്‍.
ഇതിനു പുറമെ വേരിയബിള്‍ പാര്‍ക്കിങ് താരിഫ് നയം 2025 മാര്‍ച്ച് അവസാനത്തോടെ നടപ്പിലാക്കാന്‍ തീരുമാനിച്ചതായും ആര്‍ടിഎ അറിയിച്ചു. രാവിലെ തിരക്കേറിയ സമയങ്ങളിലും (രാവിലെ 8 മുതല്‍ 10 വരെ) വൈകുന്നേരത്തെ തിരക്കേറിയ സമയങ്ങളിലും (വൈകുന്നേരം 4 മുതല്‍ രാത്രി 8 വരെ) പ്രീമിയം പാര്‍ക്കിംഗ് സ്ഥലങ്ങള്‍ക്ക് മണിക്കൂറിന് 6 ദിര്‍ഹവും മറ്റ് പൊതു പെയ്ഡ് പാര്‍ക്കിങ് സ്ഥലങ്ങള്‍ക്ക് മണിക്കൂറിന് 4 ദിര്‍ഹവുമാണ് നല്‍കേണ്ടിവരിക.
തിരക്കില്ലാത്ത സമയങ്ങളില്‍ അഥവാ രാവിലെ 10 മുതല്‍ വൈകുന്നേരം 4 വരെയും, രാത്രി 8 മുതല്‍ രാത്രി 10 വരെയും താരിഫുകളില്‍ മാറ്റമില്ല. രാത്രി 10 മുതല്‍ രാവിലെ 8 വരെയും ഞായറാഴ്ചകളില്‍ പകല്‍ ഉള്‍പ്പെടെയുള്ള സമയത്തും പാര്‍ക്കിങ് സൗജന്യമായിരിക്കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല