സൗദിയിൽ ഗാർഹിക തൊഴിലാളികൾക്കുള്ള മുന്നറിയിപ്പുകൾ പുതുക്കി മുസാനെദ്

സ്വന്തം ലേഖകൻ: സൗദിയിൽ 21 വയസ്സിന് താഴെയുള്ള വീട്ടുജോലിക്കാരെ ജോലിക്കെടുക്കരുതെന്ന മുന്നറിയിപ്പുകൾ പുതുക്കി രാജ്യത്തെ വീട്ടുജോലിക്കാരുടെ സേവനങ്ങളുടെ ഔദ്യോഗിക പ്ലാറ്റ്ഫോമായ മുസാനെദ്. ഇത് ലംഘിക്കുന്നവർ ശിക്ഷാനടപടികൾക്ക് വിധേയരാകുമെന്ന് പോർട്ടലിലൂടെ സൂചിപ്പിക്കുന്നു. പുണ്യമാസമായ റമസാൻ ആസന്നമായതോടെ വീട്ടുജോലിക്കാരുടെ ആവശ്യം വർധിച്ചതിനെ തുടർന്നാണ് മുസാനദിന്റെ മുന്നറിയിപ്പുകൾ വന്നത്.

വീട്ടുജോലിക്കാർക്ക് പൂർണ്ണ വേതനത്തോടെയുള്ള ആഴ്ചതോറുമുള്ള ഒരു ദിവസത്തിൽ കുറയാത്ത വിശ്രമദിന അവധിക്ക് അർഹതയുണ്ടെന്നും മുസാനദ് വ്യക്തമാക്കുന്നു. വിശ്രമദിന അവധിയിൽ ജോലി ചെയ്യുന്ന പക്ഷം പകരം ദിവസ അവധിയോ സാമ്പത്തിക അലവൻസിനോ തൊഴിലാളിക്ക് അവകാശമുണ്ടായിരിക്കും. രണ്ട് വർഷത്തെ കരാർ പൂർത്തിയാക്കി മടങ്ങുന്നവർക്ക് സ്വദേശത്തേക്കുളള വിമാനടിക്കറ്റിന് ലഭിക്കാനും അർഹതയുണ്ട്. രണ്ടുവർഷത്തിനു ശേഷം കരാർപുതുക്കി അവധിക്ക് നാട്ടിലേക്ക് പോയി മടങ്ങുന്നതിനുള്ള വിമാന ടിക്കറ്റ് തൊഴിലുടമ നൽകണമെന്നും നിയമത്തിലുണ്ട്.

ഗാർഹികജോലിക്കാർക്കും സമാനമായ തസ്തികകളിലുള്ളവർക്കും വേണ്ടിയുള്ള ചട്ടങ്ങളിൽ നിഷ്കർഷിച്ചിരിക്കുന്ന കാര്യങ്ങൾക്ക് അനുസൃതമായി, വീട്ടുജോലിക്കാർക്കുള്ള ട്രയൽ കാലയളവിനുള്ള വ്യവസ്ഥകൾ മുസാനെദ് പ്ലാറ്റ്‌ഫോം നിശ്ചയിച്ചിട്ടുണ്ട്. ആർട്ടിക്കിൾ ഒൻപത് പ്രകാരം വീട്ടുജോലിക്കാരുടെ പ്രൊബേഷൻ കാലയളവിനുള്ള വ്യവസ്ഥകൾ വ്യവസ്ഥ ചെയ്യുന്നുണ്ട്. 90 ദിവസത്തിൽ കൂടാത്ത കാലയളവിലേക്ക്, വീട്ടുജോലിക്കാരന്റെ പ്രഫഷനൽ കഴിവും അയാളുടെ വ്യക്തിപരമായ പെരുമാറ്റത്തിന്റെ സമഗ്രതയും വീട്ടുടമയായ തൊഴിൽദാതാവിന് പരിശോധിക്കാവുന്നതാണ്.

തൊഴിലാളിയുടെ അസുഖം 30 ദിവസത്തിലേറെയായാൽ തൊഴിൽ കരാർ അവസാനിപ്പിക്കാൻ തൊഴിലുടമക്ക് അവകാശം നൽകുന്നുണ്ട്. പ്രൊബേഷൻ കാലയളവിൽ വീട്ടുജോലിക്കാരന്റെ കരാർ ഏകപക്ഷീയമായി സ്വമനസ്സാൽ അവസാനിപ്പിക്കാൻ ഇരു കക്ഷികൾക്കും അവകാശമുണ്ടെന്നും വ്യവസ്ഥകളിൽ ഉൾപ്പെടുത്തിയിട്ടുണ്ട്. വീട്ടുജോലിക്കാരി തന്റെ ആദ്യ ജോലിയിൽ നിന്ന് വ്യത്യസ്തമായ മറ്റൊരു ജോലിയിൽ ജോലി ചെയ്യുമെന്ന് ബന്ധത്തിലെ രണ്ട് കക്ഷികളും സമ്മതിക്കുന്നില്ലെങ്കിൽ ഒരേ വീട്ടുജോലിക്കാരിയെ ഒന്നിലധികം തവണ പ്രൊബേഷനിൽ ആക്കുന്നതും അനുവദനീയമല്ല.

വീട്ടുജോലി കരാർ ഒരു പ്രത്യേക കാലയളവിലേക്കായിരിക്കണം, അതിൽ അതിന്റെ കാലാവധി വ്യക്തമാക്കിയിട്ടില്ലെങ്കിൽ, അത് അവസാനിച്ചതായി കണക്കാക്കുകയും ജോലി ആരംഭിച്ച തീയതി മുതൽ ഒരു വർഷത്തേക്ക് പുതുക്കാവുന്നതുമാണ് എന്നും മുസാനദ് പ്ലാറ്റ്ഫോം നിഷ്കർഷിച്ചിട്ടുണ്ട്. സൗദിയിൽ 800 മുതൽ 1500 റിയാൽ വരെ ശരാശരി ശമ്പളത്തിൽ 3.5 ദശലക്ഷം തൊഴിലാളികളാണ് ഈ മേഖലയിലുള്ളത്.