യു കെ മലയാളികള്‍ക്ക് ക്രിസ്തുമസ് സമ്മാനമായി ഒട്ടേറെ പുതുമകള്‍ ഉള്‍ക്കൊള്ളുന്ന എന്‍ ആര്‍ ഐ മലയാളിയുടെ 2012-ലെ കലണ്ടര്‍ പ്രിന്‍റിംഗ് പൂര്‍ത്തിയായി വിതരണത്തിന് സജ്ജമായി.യു കെയിലെ വിവിധ മലയാളി സംഘടനകള്‍ വഴിയാണ് കലണ്ടര്‍ വിതരണം ചെയ്യുന്നത്.അസോസിയേഷനുകളും മലയാളി സ്ഥാപനങ്ങളും വഴി കലണ്ടര്‍ വിതരണം ചെയ്യുന്ന രീതിക്ക് കഴിഞ്ഞ വര്‍ഷമാണ് എന്‍ ആര്‍ ഐ മലയാളി തുടക്കമിട്ടത്.ഇത്തവണ ഒരുപടികൂടി കടന്ന് ഓരോ പ്രാദേശിക മലയാളി സംഘടനയുടെയും തലക്കെട്ട്‌ കൂടി ഉള്‍ക്കൊള്ളിച്ച് കലണ്ടര്‍ കൂടുതല്‍ ജനകീയമാവുകയാണ്.കലണ്ടറിന്റെ ഔദ്യോകിക വിതരണം ഇന്നലെ ആരംഭിച്ചു.യു കെയിലെ മലയാളി അസോസിയേഷനുകളില്‍ ആദ്യം ക്രിസ്തുമസ് ആഘോഷം നടന്ന മാഞ്ചസ്റ്റര്‍ മലയാളി കള്‍ച്ചറല്‍ അസ്സോസ്സിയേഷനില്‍ ആണ് ആദ്യം കലണ്ടര്‍ നല്‍കിയത്.
യു കെ മലയാളിയുടെ ദൈനംദിന ജീവിതത്തെ മനസ്സില്‍ കണ്ടുകൊണ്ട് തയ്യാറാക്കിയിരിക്കുന്ന കലണ്ടര്‍ ഒരേസമയം കലണ്ടര്‍ ആയും ഡയറി ആയും പ്ലാനര്‍ ആയും ഉപയോഗിക്കാന്‍ സാധിക്കും.ഇംഗ്ലീഷ്/മലയാള തീയതികള്‍, ഓരോ ദിവസത്തെയും ഭര്‍ത്താവിന്‍റെയും ഭാര്യയുടെയും ഡ്യൂട്ടി എഴുതാന്‍ പ്രത്യേക കോളം,യുകെയിലെയും ഇന്ത്യയിലെയും പ്രധാന വിശേഷ ദിവസങ്ങള്‍,ബാങ്ക് അവധി ദിവസങ്ങള്‍,സ്കൂള്‍ അവധി ദിവസങ്ങള്‍,സമ്മര്‍ ടൈം മാറുന്ന ദിവസങ്ങള്‍,മറ്റു കുറിപ്പുകള്‍ എഴുതാന്‍ പ്രത്യേക കോളം എന്നിങ്ങനെ നിരവധി സവിശേതകള്‍ നിറഞ്ഞ ഈ കലണ്ടര്‍ ഓരോ മലയാളി കുടുംബങ്ങള്‍ക്കും വര്‍ഷം മുഴുവനും മുതല്‍ക്കൂട്ടാകും എന്ന കാര്യത്തില്‍ സംശയമില്ല.
അസോസിയേഷനുകളുടെ തലക്കെട്ടില്‍ കലണ്ടര്‍ വിതരണം ചെയ്യാനുള്ള എന്‍ ആര്‍ ഐ മലയാളിയുടെ പദ്ധതി കഴിഞ്ഞ ജൂലൈ മാസത്തില്‍ നടന്ന യുക്മ തിരഞ്ഞെടുപ്പിലാണ് പ്രഖ്യാപിച്ചത്.തുടര്‍ന്ന് ഞങ്ങളെ ബന്ധപ്പെട്ട യുക്മയില്‍ അംഗത്വമുള്ളതും അല്ലാത്തതുമായ 62 മലയാളി കൂട്ടായ്മകളില്‍ ഇത്തവണ എന്‍ ആര്‍ ഐ മലയാളി കലണ്ടര്‍ എത്തും.സാങ്കേതിക പ്രശ്നങ്ങള്‍ കൊണ്ട് സ്വന്തം പേരില്‍ കലണ്ടര്‍ ആവശ്യപ്പെടാന്‍ കഴിയാത്ത സംഘടനകള്‍ക്ക് എന്‍ ആര്‍ ഐ മലയാളിയുടെ തലക്കെട്ടുള്ള കലണ്ടര്‍ ലഭിക്കും.മലയാളി കൂട്ടായ്മകള്‍ ഇല്ലാത്ത സ്ഥലങ്ങളില്‍ മലയാളി ബിസിനസ് സ്ഥാപനങ്ങള്‍ വഴിയായിരിക്കും കലണ്ടര്‍ നല്‍കുക.ഇവയൊന്നും ഇല്ലാത്ത സ്ഥലങ്ങളില്‍ ഉള്ളവര്‍ contact@nrimalayalee.co.uk എന്ന വിലാസത്തില്‍ ബന്ധപ്പെട്ടാല്‍ കലണ്ടര്‍ തപാലില്‍ അയച്ചു തരും.സംഘടനകളുടെ പേരില്‍ പേരില്‍ 8000 കലണ്ടറും എന്‍ ആര്‍ ഐ മലയാളിയുടെ പേരില്‍ 8000 കലണ്ടറുമാണ് തികച്ചും സൌജന്യമായി നല്‍കാനായി അച്ചടി പൂര്‍ത്തിയായിരിക്കുന്നത്.
യു കെ മലയാളിയുടെ നിത്യജീവിതത്തില്‍ മുതല്‍ക്കൂട്ടാവുന്ന ഈ കലണ്ടര്‍ ഡിസൈന്‍ ചെയ്തിരിക്കുന്നത് എന്‍ ആര്‍ ഐ മലയാളിയുടെ എഡിറ്റോറിയല്‍ ബോര്‍ഡ്‌ അംഗമായ ബിനു ജോസാണ്.അച്ചടിക്കുള്ള സാങ്കേതിക സഹായങ്ങള്‍ ചെയ്തു തന്നത് പോര്‍ട്സ്മൗത്തിലെ മലയാളി പ്രിന്‍റിംഗ് സ്ഥാപനമായ മാതാ ക്രിയേഷന്‍സ്‌ ആണ്.യു കെയിലെ മുന്‍നിര ബിസിനസ് സ്ഥാപനങ്ങളും ഈ കലണ്ടര്‍ യാഥാര്‍ത്യമാക്കുന്നതില്‍ ഞങ്ങളോട് സഹകരിച്ചിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല