റെഞ്ചി വര്‍ക്കി
ഒ.ഐ.സി.സി യു.കെ ദേശീയ കമ്മറ്റി നിലവില്‍ വന്നതായി കാമ്പയിന്‍ കമ്മറ്റി അംഗവും മുതിര്‍ന്ന നേതാവുമായ മുന്‍ കെ.എസ്.യു സംസ്ഥാന ട്രഷറര്‍ തമ്പി ജോസ് അറിയിച്ചു. ദേശീയ കാമ്പയിന്‍ കമ്മറ്റി ചെയര്‍മാന്‍ ഫ്രാന്‍സിസ് വലിയപറമ്പിലാണ് പുതിയ കമ്മറ്റിയുടെ പ്രസിഡന്റ്. കഴിഞ്ഞ ഒരു വര്‍ഷമായി വിജയകരമായി നടന്നുവന്ന കാമ്പയിന്റെ ഭാഗമായി യു.കെയിലെ മലയാളികള്‍ സജീവമായുള്ള എല്ലാ കൗണ്‍സിലുകളിലും തന്നെ കമ്മറ്റികള്‍ രൂപീകരിച്ച് ശക്തമായ അടിത്തറയോടെയാണ് പുതിയ ദേശീയ കമ്മറ്റി നിലവില്‍ വരുന്നത്.
ഭാരവാഹികള്‍: ഫ്രാന്‍സിസ് വലിയപറമ്പില്‍ (പ്രസിഡന്റ്), എബി സെബാസ്റ്റ്യന്‍, ഗിരിജന്‍ മാധവന്‍ (ജനറല്‍ സെക്രട്ടറിമാര്‍), പോള്‍സണ്‍ തോട്ടപ്പിള്ളി (ട്രഷറര്‍), മാമ്മന്‍ ഫിലിപ്പ്, തോമസ് പുളിക്കല്‍ (വൈസ് പ്രസിഡന്റുമാര്‍), ഡോ. രാധാകൃഷ്ണ പിള്ളൈ, ജോണ്‍സണ്‍ കെ.എസ്, നിഹാസ് റാവുത്തര്‍, ബിനു കുര്യാക്കോസ് (ജോ.സെക്രട്ടറിമാര്‍), ജെയ്‌സണ്‍ ജോര്‍ജ് (കലാവിഭാഗം കണ്‍വീനര്‍).
ഇന്ത്യന്‍ നാഷണല്‍ കോണ്‍ഗ്രസിലും പോഷകസംഘടനകളിലും സജീവമായി പ്രവര്‍ത്തിച്ച്‌ നേതൃനിരയിലേയ്ക്ക് കടന്നു വന്ന പുതിയ കമ്മറ്റിയ്ക്ക് കൂടുതല്‍ സജീവമായി ബ്രിട്ടണിലെ മലയാളി സമൂഹത്തിനിടയില്‍ പ്രവര്‍ത്തിക്കാനാവുമെന്നും, പുതിയ കമ്മറ്റി കെ.പി.സി.സിയുടെ അംഗീകാരത്തിനായി സമര്‍പ്പിക്കുമെന്നും മുതിര്‍ന്ന നേതാവ് തമ്പി ജോസ് അറിയിച്ചു.
ദേശീയ പ്രസിഡന്റായി തെരഞ്ഞെടുക്കപ്പെട്ട ഫ്രാന്‍സിസ് വലിയപറമ്പില്‍ കെ.എസ്.യു പറവൂര്‍ താലൂക്ക് പ്രസിഡന്റ്, എറണാകുളം ജില്ലാ വൈസ് പ്രസിഡന്റ്, പ്രസിഡന്റ്, യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി എന്നീ സ്ഥാനങ്ങള്‍ വഹിച്ചിട്ടുണ്ട്. എറണാകുളം സെന്റ് ആല്‍ബര്‍ട്ട്‌സ് കോളേജ് യൂണിയന്‍ ജനറല്‍ സെക്രട്ടറി, യൂണിവേഴ്‌സിറ്റി യൂണിയന്‍ കൗണ്‍സിലര്‍ തുടങ്ങിയ സ്ഥാനങ്ങള്‍ വഹിച്ച ഫ്രാന്‍സിസ്, കെ.എസ്.യു മുന്നണിയുടെ എം.ജി യൂണിവേഴ്‌സിറ്റി യൂണിയന്‍ ജനറല്‍ സെകട്ടറി സ്ഥാനാര്‍ത്ഥിയായിരുന്നു. ചാത്തേടം കോ-ഓപ്പറേറ്റീവ് ബാങ്ക് പ്രസിഡന്റ് ആയിരുന്ന ഇദ്ദേഹം പുത്തന്‍വേലിക്കര ഡിവിഷനില്‍ നിന്നും ജില്ലാ പഞ്ചായത്ത് അംഗമായും തെരഞ്ഞെടുക്കപ്പെട്ടിട്ടുണ്ട്.
കെ.എസ്.യു കോട്ടയം ജില്ലാ സെക്രട്ടറിയായിരുന്ന എബി സെബാസ്റ്റ്യന്‍ കുറവിലങ്ങാട് ദേവമാതാ കോളേജ് യൂണിയന്‍ അംഗം, എറണാകുളം ഗവ. ലോ കോളേജില്‍ നിന്നും രണ്ട് വട്ടം യൂണിവേഴ്‌സിറ്റി യൂണിയന്‍ കൗണ്‍സിലര്‍, എം. ജി യൂണിവേഴ്‌സിറ്റി സെനറ്റ് അംഗം എന്നീ സ്ഥാനങ്ങള്‍ വഹിച്ചിട്ടുണ്ട്. 2000, 2002 വര്‍ഷങ്ങളില്‍ നടന്ന എം.ജി യൂണിവേഴ്‌സിറ്റി യൂണിയന്‍ തെരഞ്ഞെടുപ്പില്‍ കെ.എസ്.യു മുന്നണിയുടെ ചെയര്‍മാന്‍ സ്ഥാനാര്‍ത്ഥിയായിരുന്നു.
കെ.എസ്.യു തിരുവനന്തപുരം ജില്ലാ സെക്രട്ടറിയായിരുന്ന ഗിരിജന്‍ മാധവന്‍ നിലമേല്‍ എന്‍.എസ്.എസ് കോളേജ് യൂണിയന്‍ ചെയര്‍മാനായിരുന്നു.
യു.കെയിലെ ആദ്യകാല മലയാളി അസോസിയേഷനുകളില്‍ ഒന്നായ മാഞ്ചസ്റ്റര്‍ എം.എം.എയുടെ സ്ഥാപക പ്രസിഡന്റ് കൂടിയായ പോള്‍സണ്‍ തോട്ടപ്പിള്ളി യൂത്ത് കോണ്‍ഗ്രസ് വടക്കേക്കര ബ്ലോക്ക് ജനറല്‍ സെക്രട്ടറി, ചെങ്ങമനാട് മണ്ഡലം കോണ്‍ഗ്രസ് കമ്മറ്റി സെക്രട്ടറി എന്നീ സ്ഥാനങ്ങള്‍ വഹിച്ചിട്ടുമുണ്ട്.
കെ.എസ്.യു പത്തനംതിട്ട ജില്ലാ സെക്രട്ടറിയായിരുന്ന മാമ്മന്‍ ഫിലിപ്പ് യു.കെയിലെ മലയാളി അസോസിയേഷനുകളുടെ കൂട്ടായ്മയായ യുക്‌മയുടെ സ്ഥാപക ഓര്‍ഗനൈസിങ് സെക്രട്ടറിയാണ്. കോഴഞ്ചേരി സെന്റ് തോമസ് കോളേജില്‍ നിന്നും യൂണീവേഴ്‌സിറ്റി യൂണിയന്‍ കൗണ്‍സിലര്‍ ആയിരുന്ന മാമ്മന്‍ എം.ജി യൂണിവേഴ്‌സിറ്റി യൂണിയന്‍ എക്‌സിക്യൂട്ടീവ് കമ്മറ്റി അംഗമായിരുന്നു.
പിറവം മണ്ഡലം കോണ്‍ഗ്രസ് കമ്മറ്റി പ്രസിഡന്റായിരുന്ന തോമസ് പുളിക്കല്‍ കോലഞ്ചേരി സെന്റ് പീറ്റേഴ്‌സ് കോളേജ് യൂണിയന്‍ ചെയര്‍മാനുമായിരുന്നു.
കൊല്ലം ശൂരനാട് സ്വദേശിയായ ഡോ. രാധാകൃഷ്ണ പിള്ളൈ കേരളാ യൂണിവേഴ്‌സിറ്റി കാര്യവട്ടം കാമ്പസില്‍ നിന്നും യൂണിവേഴ്‌സിറ്റി യൂണിയന്‍ കൗണ്‍സിലറായി തെരഞ്ഞെടുക്കപ്പെട്ടിട്ടുണ്ട്. കാലിക്കറ്റ് യൂണിവേഴ്‌സിറ്റി കാമ്പസിലെ കോണ്‍ഗ്രസ് അനുകൂല അധ്യാപക സംഘടനയുടെ ജനറല്‍ സെക്രട്ടറിയായിരുന്ന ഇദ്ദേഹം ലണ്ടന്‍ ഇംപീരിയല്‍ കോളേജ് അധ്യാപകനായിരുന്നു.
കൂത്താട്ടുകുളം മണിമലക്കുന്ന് ഗവ. കോളേജില്‍ നിന്നും യൂണിവേഴ്‌സിറ്റി യൂണിയന്‍ കൗണ്‍സിലറായിരുന്ന ജോണ്‍സണ്‍ കെ.എസ്, എം ജി യൂണിവേഴ്‌സിറ്റി യൂണിയന്‍ എക്‌സിക്യൂട്ടീവ് കമ്മറ്റി അംഗമായിരുന്നു.
നിഹാസ് റാവുത്തര്‍ നിലമേല്‍ എന്‍.എസ്.എസ് കോളേജ് യൂണിയന്‍ ജനറല്‍ സെക്രട്ടറിയായിരുന്നു.
ഉഴവൂര്‍ സെന്റ് സ്റ്റീഫന്‍സ് കോളേജിലെ കെ.എസ്.യു പ്രവര്‍ത്തകനായിരുന്ന ബിനു കുര്യാക്കോസ്, വെയില്‍സ് റീജണിലെ യു.കെ.കെ.സി.എ സ്ഥാപക കോര്‍ഡിനേറ്ററാണ്. കാര്‍ഡിഫ് മലയാളി അസോസിയേഷന്റെ സ്ഥാപക ട്രഷറര്‍ കൂടിയായ ബിനു, സി.എം.എ ജനറല്‍ സെക്രട്ടറിയായും പ്രവര്‍ത്തിച്ചിട്ടുണ്ട്.
മികച്ച നാടകകൃത്തും അഭിനേതാവുമായ ജെയ്‌സണ്‍ ജോര്‍ജ് ലണ്ടന്‍ ഈസ്റ്റ് ഹാമിലെ കലാസാംസ്ക്കാരിക രംഗത്തെ നിറഞ്ഞ സാന്നിധ്യമാണ്. വൈക്കം സെന്റ് സേവ്യേഴ്‌സ് കോളേജിലെ കെ.എസ്.യു നേതാവായിരുന്ന ജെയ്‌സണ്‍, എറണാകുളം-അങ്കമാലി അതിരൂപതാ സി.എല്‍.സി നേതൃരംഗത്തും പ്രവര്‍ത്തിച്ചിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല