റെജി ജോര്‍ജ്ജ്‌
ജൂണ്‍ 30 ശനിയാഴ്ച റെഡിച്ച് മലയാളികളുടെ ചിരകാല സ്വപ്‌നമായ കേരള കള്‍ച്ചറല്‍ അസോസിയേഷന്‍ ഔദ്യോഗികമായി ഉദ്ഘാടനം ചെയ്തു. നിറഞ്ഞ സദസ്സിന്റെയും ക്ഷണിക്കപ്പെട്ട വിശിഷ്ടാതിഥികളുടെയും സാന്നിധ്യത്തില്‍ റെഡിച്ച് മേയര്‍ അലന്‍ മേസന്‍, റെഡിച്ച് എംപി കാരന്‍ ലംലി, റെഡിച്ച് ചീഫ് ഫേറ്റ് ഇന്‍ഡിഡന്റ് കെന്‍ ഹേസില്‍ട്ടന്‍, റെഡിച്ച് കമ്മ്യൂണിറ്റി ഫോറം ചെയര്‍ സൂയേങ്ങ്, കെസിഎ പ്രസിഡന്റ് പോള്‍ ജോസഫ് എന്നിവര്‍ ചേര്‍ന്ന് നിറദീപം കൊളുത്തി ഔദ്യോഗികമായി ഉദ്ഘാടനം ചെയ്തു. തുടര്‍ന്ന് നടന്ന പ്രൗഢഗംഭീരമായ ആഘോഷത്തില്‍ റെഡിച്ചിലെ യുവ കലാപ്രതിഭകളുടെ വിവിധ കലാപ്രകടനങ്ങള്‍ അരങ്ങേറി.ചിട്ടയുള്ളതും സമയക്ലിപ്തവുമായ ഓരോ പ്രകടനങ്ങളെയും വിശിഷ്ടാതിഥികളടക്കമുള്ള സദസ്സ് നിറഞ്ഞ കരഘോഷത്തോടെയാണ് ഏറ്റുവാങ്ങിയത്.കേരളത്തിന്റെ തനതു കലാരൂപങ്ങളായ മാര്‍ഗംകളി,തിരുവാതിര,ഒപ്പന, എന്നീ മൂന്നു കലാരൂപങ്ങളും ചേര്‍ത്തു നടത്തിയ ഫ്യൂഷന്‍ നൃത്തം ഏറെ പ്രശംസ പിടിച്ച് പറ്റി. സദസ്സില്‍ ഗാന്ധിജിയെ ദര്‍ശിച്ച പ്രേക്ഷകര്‍ ഒരു നിമിഷം ഇന്ത്യയുടെ ആത്മാവിലേക്ക് ഇറങ്ങിച്ചെന്നു.
കെസിഎയുടെ കുരുന്നു പ്രതിഭകള്‍ അവതരിപ്പിച്ച ഭരതനാട്യം വളരെ ആവേശത്തോടെയാണ് പ്രേക്ഷകര്‍ സ്വീകരിച്ചത്.അതേസമയം തനത് നാടന്‍ കലാരൂപമായ കോല്‍ക്കളി ഏറെ പ്രശംസിക്കപ്പെട്ടു.കെസിഎയിലെ ഭാവിവാഗ്ദാനങ്ങള്‍ അവതരിപ്പിച്ച മോഹിനിയാട്ടം,ഭരതനാട്യം,കഥകളി,കളരിപ്പയറ്റ്,എന്നീ നാലു കലാരൂപങ്ങള്‍ ചേര്‍ത്ത് അവതരിപ്പിച്ച നൃത്തം പ്രൗഢഗംഭീരമായിരുന്നു.
ഈ ഉദ്ഘാടന ചടങ്ങില്‍ വച്ച് റെഡിച്ച് എംപി , റെഡിച്ച് മേയര്‍ എന്നിവര്‍ സദസ്യരെ അഭിസംബോധന ചെയ്ത് സംസാരിച്ചു.കേരള കള്‍ച്ചറല്‍ അസോസിയേഷന്റെ ഔദ്യോഗിക വെബ്‌സൈറ്റായ www.kcaredditch.co.uk യുടെ സ്വിച്ച് ഓണ്‍ കര്‍മം കാരന്‍ ലംലി എംപി നിര്‍വഹിച്ചു.സേവ് അലക്‌സ് ക്യാംപയിന്‍ പെറ്റിഷന്‍സ് ചടങ്ങില്‍ വച്ച് എംപിക്ക് കൈമാറി.
ഇതിനിടെ സദസ്സിനിടയില്‍ നിന്ന് സ്റ്റേജിലേക്ക് കടന്നുവന്ന പുലികള്‍ സദസ്സിനെ രോമാഞ്ചം കൊള്ളിച്ചു.മന്ദം മന്ദം പുലികള്‍ ചുവട് വച്ച് നീങ്ങിയപ്പോള്‍ കേരളത്തിന്റെ തനത് കലാരൂപമായ പുലിക്കളി അതിന്റെ തനിമയോടെ ക്ഷണിക്കപ്പെട്ട വിശിഷ്ടാതിഥികളും സദസ്യരും ആസ്വദിച്ചു.
റെഡിച്ചിന്റെ ഭാവിവാഗ്ദാനങ്ങളായ ജിജോ പോള്‍, ലിയാ ടോം, എന്നിവര്‍ വളരെ സ്വാഭാവികതയോടെ കാണികളെ കയ്യിലെടുത്തും ചിരിപ്പിച്ചും ചിന്തിപ്പിച്ചും നടത്തിയ അവതരണശൈലി വളരെയേറെ പ്രശംസകള്‍ ഏറ്റുവാങ്ങി. ചടങ്ങില്‍ വച്ച് റെഡിച്ച് മേയര്‍ അലന്‍ മേസന്‍, യുക്മ നടത്തിയ റീജിയണല്‍ , നാഷണല്‍ കായികമേളകളില്‍ റെഡിച്ചില്‍ നിന്നും വിജയികളായവര്‍ക്ക് സമ്മാനദാനം നിര്‍വഹിച്ചു. ചടങ്ങില്‍ വച്ച് കേരള കള്‍ച്ചറല്‍ അസോസിയേഷന്റെ തീം സോംഗ് ജോബി മാത്യു അവതരിപ്പിച്ചു. ഷിബു കുന്നനാടിന്റെ കഠിന പ്രയത്‌നത്താല്‍ ഓരോ പരിപാടികളും തല്‍സമയം എഡിറ്റ് ചെയ്ത് സ്‌ക്രീനില്‍ ദര്‍ശിക്കാനായി. തുടര്‍ന്നു നടന്ന കേരളത്തനിമയുള്ള ഭക്ഷണം ഓരോ വിശിഷ്ടാതിഥികളും വളരെ രുചിയോടെ ആസ്വദിച്ചു. കെസിഎയുടെ മെമ്പര്‍ ആയ സിനോതോമസിന്റെ ഉടമസ്ഥതയിലുള്ള ശ്രുതി ഓര്‍ക്കസ്ട്ര അവതരിപ്പിച്ച ഗംഭീരമായ ഗാനമേളയോടുകൂടി പരിപാടികള്‍ അവസാനിച്ചു.
തുടര്‍ദിവസങ്ങളില്‍ വിശിഷ്ടാതിഥികളുടെ പ്രശംസകള്‍ ഭാരവാഹികള്‍ക്കും അംഗങ്ങള്‍ക്കും ലഭിച്ചു. അടുത്ത് നടക്കാന്‍ പോകുന്ന മോര്‍ട്ടന്‍ സ്റ്റാന്‍ലി ഫെസ്റ്റിവലിലും ചൈനീസ് കമ്മ്യൂണിറ്റി ഇവന്റിലും മേയേഴ്‌സിന്റെ കൗണ്ടി മീറ്റിംഗിലു കേരള കലാരൂപങ്ങള്‍ അവതരിപ്പിക്കാനുള്ള ഔദ്യോഗിക ക്ഷണം കേരള കള്‍ച്ചറല്‍ അസോസിയേനും ഇതിനകം ലഭിച്ചു കഴിഞ്ഞു. ഇത് കെസിഎയുടെ കുരുന്ന് യുവപ്രതിഭകള്‍ക്ക് കൗണ്‍സിലിന്റെയും കൗണ്‍സില്‍ മേധാവികളുടെയും ഔദ്യോഗിക അംഗീകാരമായി.ഇതോടെ തനതു കേരള കലാരൂപങ്ങള്‍ റെഡിച്ചിലെ വിവിധ വേദികളിലും കൗണ്‍സില്‍ പരിപാടികളിലും അരങ്ങേറും. ഇത് അസോസിയേഷനിലെ യുവകലാപ്രതിഭകളുടെ ആത്മവിശ്വാസം വര്‍ധിപ്പക്കാനുതകും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല