ജോഷി ജോര്‍ജ്ജ്
പോര്ട്സ്മൗത്ത്: മലയാളി അസ്സോസിയേഷന്‍ ഓഫ് പോര്‍ട്‌സ്മൗത്തിന്റെ നേതൃത്വത്തില്‍ ചെസിംഗ് ടോണിലേക്ക് സംഘടിപ്പിച്ച വിനോദയാത്ര പങ്കെടുത്തവര്‍ക്ക് നവ്യാനുഭവമായി. ചെസിംഗ് ടോണ്‍ പാര്‍ക്കിലെ മൃഗശാലയില്‍ ചെലവഴിച്ച നിമിഷം എല്ലാവരും വളരെയധികം ആസ്വദിച്ചു.ഏറെ വൈവിദ്ധ്യമേറിയ മറ്റു വിനോദ ഉപാധികളിലും പ്രായഭേദമന്യേ കുട്ടികളും മുതിര്‍ന്നവരും ആഹ്ലാദാരവങ്ങളോടെ പങ്കെടുക്കുകയും ആസ്വദിക്കുകയും ചെയ്തു.
തിരക്കുകള്‍ നിറഞ്ഞ യുകെ ജീവിതത്തില്‍ അപൂര്‍വ്വമായി കിട്ടുന്ന ഒഴിവ് ദിനങ്ങള്‍ പരസ്പരമുള്ള സഹകരണത്തോടും സഹവര്‍ത്തിത്തത്തോടും കൂടി അര്‍ത്ഥ സമ്പുഷ്ടമാക്കി ജീവിതത്തെ സന്തോഷകരമായ ഒരനുഭവമാക്കുക എന്ന അസോസിയേഷന്റെ പ്രഖ്യാപിത നയങ്ങള്‍ക്കനുസൃതമായാണ് അസോസിയേഷന്റെ സര്‍ഗാത്മകവും വൈവിദ്ധ്യവുമാര്‍ന്ന ഒരോ പ്രവര്‍ത്തനങ്ങളും എന്നു ഭാരവാഹികള്‍ പറയന്നു.
അസോസിയേഷന്റെ ആഭിമുഖ്യത്തില്‍ പ്രസിദ്ധീകരിച്ചു കൊണ്ടിരിക്കുന്ന മാഗസിന്‍ ജ്യോതി ആകര്‍ഷകമായ വിഭവങ്ങളോടെ തിരുവോണ ദിനം ഓണപ്പതിപ്പായി പ്രസിദ്ധീകരിക്കുന്നതാണ്. ‘ജ്യോതി യുടെ ഓണപ്പതിപ്പ് വിഭവ സമൃദ്ധമാക്കുവാന്‍ യുകെ മലയാളികളില്‍ നിന്ന് രചനകള്‍ ക്ഷണിക്കുന്നതായി ഭാരവാഹികള്‍ അറിയിച്ചു.
രചനകള്‍ അയയ്‌ക്കേണ്ട വിലാസം contact@portsmouthmalayali.org
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല