ലെസ്റ്റര്‍:മലയാളി കുടുംബങ്ങളുടെ ഉള്ളില്‍ തീകോരിയിട്ട് ലെസ്റ്ററില്‍ കൊള്ളസംഘം അഴിഞ്ഞാടുന്നു. യുകെയിലും കേരളത്തിലും ഏറെ പ്രശസ്തനായ ഗായകന്‍ ജോബി കൊരട്ടിയുടെ വീട്ടില്‍ കഴിഞ്ഞദിവസം കടന്നുകയറിയ കൊള്ളസംഘം ലക്ഷങ്ങള്‍ വിലമതിക്കന്ന സ്വര്‍ണാഭരണങ്ങളും ഐ പാഡുമാണ് കവര്‍ന്നത്. യുകെയില്‍ ഏറെ പ്രശസ്തമായ ട്യൂണ്‍സ് ഓഫ് ലസ്റ്റര്‍ എന്ന ഗാനമേളാട്രൂപ്പിന്റെ അമരക്കാരനും ഏഷ്യാനെറ്റ് ടാലന്റ് കോണ്‍ടസ്റ്റ് 2011 ലെ ജേതാവുമായ ജോബി മൂന്നു ദിവസമായി കാര്‍ഡിഫിലായിരുന്നു. ഫാ.ജോയി ചേറാടിയില്‍ നയിക്കുന്ന ധ്യാനത്തിനായി ഗാനശുശ്രൂഷയില്‍ പങ്കെടുക്കാനായാണ് ജോബിയും ഭാര്യ ആഷ്‌ലിയും മകന്‍ ആബേലുമടങ്ങുന്ന കുടുംബം കാര്‍ഡിഫിലെത്തിയത്. ഞായറാഴ്ച വെളുപ്പിന് രണ്ടരയോടെയാണ് കുടുംബം തിരികെ ലസ്റ്ററിലെത്തിയത്. പുലര്‍ച്ചെ വീടിനുസമീപം എത്തിയപ്പോള്‍ത്തന്നെ ഇവര്‍ക്ക് അപകടം ബോധ്യമായി. വീടിന്റെ ജനലും വാതിലുകളും തുറന്നിട്ടിരിക്കുന്നതിനുപുറമേ ലൈറ്റുകളെല്ലാം തെളിഞ്ഞുകിടക്കുകയായിരുന്നു.
ഉടന്‍തന്നെ സുഹൃത്തുക്കളെ വിളിച്ചുവരുത്തി. എല്ലാവരും ചേര്‍ന്ന് വീടിനുള്ളില്‍ പ്രവേശിച്ചപ്പോള്‍ ഹൃദയഭേധകമായ കാഴ്ചകളായിരുന്നു. അലമാരകളും മേശകളും തുറന്നുകിടക്കുകയായിരുന്നു. വസ്ത്രങ്ങള്‍ വീട്ടിനുള്ളില്‍ വാരിവിതറിയ നിലയിലായിരുന്നു. ആഷ്‌ലിയുടേയും ആബേലിന്റെയും ഉപയോഗത്തിനായി വാങ്ങിയിരുന്ന മുപ്പതുപവന്‍ സ്വര്‍ണം കൊള്ളക്കാര്‍ കൈക്കലാക്കിയിരിക്കുന്നു. ഇതിനുപുറമേ കഴിഞ്ഞ കുറെ വര്‍ഷങ്ങളുടെ പരിശ്രമത്തിലൂടെ ജോബി സമ്പാദിച്ച മലയാളഗാനങ്ങളുടെ ശേഖരവും നഷ്ടപ്പെട്ടു. ഏറെ പണിപ്പെട്ടാണ് അപൂര്‍ങ്ങളായ ഈ ഗാനങ്ങള്‍ ജോബി ശേഖരിച്ചത്. ഇവയെല്ലാം റിക്കോര്‍ഡ് ചെയ്തിരുന്ന ഐപാഡ് മോഷണസംഘം തട്ടിയെടുത്തതില്‍ ഉള്‍പ്പെടും.പോലീസില്‍ വിവരം നല്കിയതിനെത്തുടര്‍ന്ന് ക്രൈംസീന്‍ ഇന്‍വെസ്റ്റിഗേഷന്‍ സംഘവും ഫോറന്‍സിക് വിഭാഗവും സ്ഥലത്തെത്തി. തുടര്‍ന്ന് കമ്യുണിറ്റി പോലീസും സ്ഥലത്തെത്തി. അന്വേഷണം നടക്കുന്നു. സുഹൃത്തുക്കളും പരിചയക്കാരും ഇതിനിടെ കുടുംബത്തെ ആശ്വസിപ്പിച്ച് മടങ്ങി.
എട്ടുവര്‍ഷംമുമ്പാണ് ജോബിയും കുടുംബവും ലെസ്റ്ററില്‍ താമസമാക്കിയിട്ട്. ഇവിടെ മലയാളി കുടുംബങ്ങള്‍ മോഷ്ടാക്കളുടെ സ്ഥിരം ഇരകളാണ്. കഴിഞ്ഞ രണ്ടുവര്‍ഷത്തിനിടെ 12 ഓളം മലയാളികളുടെ കുടുംബങ്ങളാണ് കൊള്ളക്കാരുടെ ആക്രമണത്തിന് ഇരയായത്. കോടിക്കണക്കിനു രൂപയുടെ നഷ്ടമാണ് ഇതുവഴിയുണ്ടായത്. സ്വര്‍ണാഭരണങ്ങള്‍ ഉപയോഗിക്കുന്നവരെന്ന് മനസിലാക്കിയാകാം കൊള്ളക്കാര്‍ മലയാളികളെ നേരിടുന്നത്. പോലീസില്‍ പരാതി നല്കുന്നുണ്ടെങ്കിലും അന്വേഷണം എങ്ങുമെത്താതെ പോവുകയാണ്. പ്രശ്‌നത്തില്‍ ഇടപെട്ട് ശക്തമായ തുടര്‍നടപടികള്‍ക്ക് മലയാളി സമൂഹവും മലയാളി സംഘടനകളും തയ്യാറാകാത്തതാണ് കൊള്ളക്കാര്‍ക്ക് വളമാകുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല