സ്വന്തം ലേഖകൻ: രാജ്യത്തെ നിയമങ്ങള്‍ ലംഘിച്ച് അനധികൃതമായി കുവൈത്തില്‍ കഴിയുന്ന പ്രവാസികള്‍ക്കായി കഴിഞ്ഞ മാര്‍ച്ച് 17ന് പ്രഖ്യാപിച്ച മൂന്നു മാസത്തെ പൊതുമാപ്പ് കാലാവധി അവസാനിക്കാന്‍ ഇനി ദിവസങ്ങള്‍ മാത്രം ബാക്കിയിരിക്കെ, ഈ ആനുകൂല്യത്തില്‍ നിന്ന് പ്രയോജനം നേടാത്ത 68 പ്രവാസികളെ രാജ്യത്തിന്റെ വിവിധ ഭാഗങ്ങളില്‍ നിന്നായി സുരക്ഷാ ഏജന്‍സികള്‍ അറസ്റ്റ് ചെയ്തു.
റസിഡന്‍സി, ലേബര്‍ നിയമങ്ങള്‍ ലംഘിച്ച് രാജ്യത്ത് തമാസിക്കുന്നവരെയാണ് അറസ്റ്റ് ചെയ്തത്.
ആഭ്യന്തര മന്ത്രാലയത്തിന്റെ കണക്കനുസരിച്ച്, ഫര്‍വാനിയയിലും ഷുവൈഖ് ഇന്‍ഡസ്ട്രിയല്‍ ഏരിയയിലും നടത്തിയ പരിശോധനയില്‍ 43 നിയമ ലംഘകരായ പ്രവാസികളാണ് പിടിയിലായത്. അല്‍ അഹമ്മദി, മുബാറക് അല്‍ കബീര്‍ ഗവര്‍ണറേറ്റുകളില്‍ വിവിധ മന്ത്രാലയങ്ങളില്‍ നിന്നുള്ള ഉദ്യോഗസ്ഥരടങ്ങിയ സംയുക്ത സമിതി നടത്തിയ പരിശോധനയില്‍ വിവിധ രാജ്യക്കാരായ 25 നിയമ ലംഘകരെയും അറസ്റ്റ് ചെയ്തതായി അധികൃതര്‍ അറിയിച്ചു.
അതിനിടെ, താമസ, തൊഴില്‍ നിയമങ്ങള്‍ ലംഘിച്ച് രാജ്യത്ത് താമസിക്കുന്നവര്‍ പൊതുമാപ്പ് കാലയളവ് പ്രയോജനപ്പെടുത്തി തങ്ങളുടെ പദവിയില്‍ മാറ്റം വരുത്തുകയോ കരിമ്പട്ടികയില്‍ പെടാതെ രാജ്യം വിടുകയോ ചെയ്യണമെന്ന് ആഭ്യന്തര മന്ത്രാലയം ആവശ്യപ്പെട്ടു. ഇന്ത്യക്കാര്‍ ഉള്‍പ്പെടെ പതിനായിരക്കണക്കിന് പ്രവാസികള്‍ക്ക് ആശ്വാസം നല്‍കിക്കൊണ്ട് 2024 മാര്‍ച്ച് 17 ന് പ്രഖ്യാപിച്ച പൊതുമാപ്പ് കാലാവധി 2024 ജൂണ്‍ 17ന് അവസാനിക്കും.
ഉപപ്രധാനമന്ത്രിയും പ്രതിരോധ മന്ത്രിയും ആക്ടിംഗ് ആഭ്യന്തര മന്ത്രിയുമായ ശെയ്ഖ് ഫഹദ് യൂസഫ് അല്‍ സബാഹിന്റെ നിര്‍ദ്ദേശ പ്രകാരമാണ് കഴിഞ്ഞ റമദാന്‍ മാസത്തോട് അനുബന്ധിച്ച് പൊതുമാപ്പ് പ്രഖ്യാപിച്ചത്. അനധികൃത താമസക്കാര്‍ക്ക് നിശ്ചിത സംഖ്യ പിഴ അടച്ച് അവരുടെ പദവി ശരിയാക്കി രാജ്യത്ത് തുടരാനോ പിഴ അടക്കാതെ കുവൈത്ത് വിടാനോ പൊതുമാപ്പ് കാലയളവില്‍ അനുവാദമുണ്ട്.
അതേസമയം, ഭരണപരമോ നിയമപരമോ ആയ കേസുകള്‍ നിലവിലുള്ളവര്‍ നിയമപരമായി സാധ്യമായ പരിഹാരങ്ങള്‍ ആരായുന്നതിനായി ഡയറക്ടറേറ്റ് ജനറല്‍ ഓഫ് റെസിഡന്‍സി അഫയേഴ്‌സുമായി ബന്ധപ്പെടണമെന്നാണ് നിര്‍ദ്ദേശം. പൊതുമാപ്പ് കാലാവധിക്ക് ശേഷം, ഈ നിബന്ധനകള്‍ പാലിച്ച് പിഴ അയക്കുകയോ രാജ്യം വിടുകയോ ചെയ്യാത്തവര്‍ക്കെതിരേ നാടുകടത്തലും കരിമ്പട്ടികയില്‍ ഉള്‍പ്പെടുത്തലും ഉള്‍പ്പെടെ കര്‍ശനമായ നടപടികള്‍ സ്വീകരിക്കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല