സ്വന്തം ലേഖകൻ: പുതിയ അധ്യയന വര്‍ഷത്തെ വരവേല്‍ക്കാന്‍ സമ്മാനപ്പെരുമഴയുമായി ഷാര്‍ജ കോപറേറ്റീവ് സൊസൈറ്റി അഥവാ ഷാര്‍ജ കോപ്പിന്റെ ബാക്ക് ടു സ്‌കൂള്‍ കാമ്പയിൻ. പൊതുജനങ്ങള്‍ക്കുള്ള സമ്മാനങ്ങള്‍ക്കു പുറമെ, കോപ്പിന്റെ ഗോള്‍ഡ് കാര്‍ഡ് ഉടമകള്‍ക്കും ഓഹരി ഉടമകള്‍ക്കും പ്രത്യേക ഓഫറുകളും ഇവിടെ ഒരുക്കിയിട്ടുണ്ട്. ഓഫറുകള്‍ സെപ്റ്റംബര്‍ എട്ട് വരെ തുടരുമെന്ന് അധികൃതര്‍ അറിയിച്ചു. ഓഗസ്റ്റ് 26നാണ് യുഎഇയില്‍ വേനലവധിക്കു ശേഷം സ്‌കൂളുകള്‍ തുറക്കുന്നത്.
ഉപഭോക്താക്കള്‍ക്ക് ഷാര്‍ജ കോപ് ഓഫര്‍ ചെയ്യുന്ന 20 സ്‌കോളര്‍ഷിപ്പുകളിലൊന്ന് കരസ്ഥമാക്കാനുള്ള അവസരമാണ് ഇത്തവണത്തെ കാമ്പയിന്റെ പ്രധാന ഹൈലൈറ്റ്. അതിനു പുറമെ, കംപ്യൂട്ടറുകള്‍, ഐപാഡുകള്‍, മറ്റ് വിലയേറിയ സമ്മാനങ്ങള്‍ എന്നിവ സ്വന്തമാക്കാനും അവസരമുണ്ട്. പുതിയ അധ്യയന വര്‍ഷം തുടങ്ങുമ്പോള്‍ മാതാപിതാക്കള്‍ നേരിടുന്ന സാമ്പത്തിക വെല്ലുവിളികള്‍ തിരിച്ചറിഞ്ഞാണ് ഷാര്‍ജ കോപ് അവര്‍ക്ക് ആവശ്യമായതെല്ലാം കുറഞ്ഞ വിലയില്‍ നല്‍കുന്നതെന്ന് അധികൃതര്‍ അറിയിച്ചു.
വിജയകരമായ അധ്യയന വര്‍ഷത്തിനായി കുട്ടികളെ ഒരുക്കുന്നതിന് ആവശ്യമായ സ്റ്റേഷനറികളും സ്‌കൂള്‍ ബാഗുകളും മുതല്‍ വിദ്യാര്‍ഥികള്‍ക്ക് ദിവസേന ആവശ്യമായ ആരോഗ്യകരമായ ഭക്ഷണ സാധനങ്ങള്‍ വരെ ക്യാംപയിന്റെ ഭാഗമായി ഇവിടെ ഒരുക്കിയിട്ടുണ്ട്. ഉയര്‍ന്ന നിലവാരമുള്ള വിവിധ ഉല്‍പ്പന്നങ്ങള്‍ കുറഞ്ഞ വിലയ്ക്കാണ് കോപ് വാഗ്ദാനം ചെയ്യുന്നതെന്ന് സി.ഇ.ഒ മാജിദ് അല്‍ ജുനൈദ് പറഞ്ഞു.
കാംപയിന്‍ കാലയളവില്‍ ഷാര്‍ജ കോപ് 1,000ത്തിലധികം വ്യത്യസ്ത സ്റ്റേഷനറി ഇനങ്ങളും സ്‌കൂള്‍ ബാഗുകളും ഉള്‍പ്പെടെയുള്ള ഉല്‍പ്പന്നങ്ങള്‍ ഇവിടെ വില്‍പ്പനയ്ക്കായി ലഭ്യമാക്കും. കൂടാതെ ജ്യൂസുകള്‍, പഴങ്ങള്‍, ആരോഗ്യകരമായ ലഘു ഭക്ഷണങ്ങള്‍ എന്നിവയുള്‍പ്പെടെ വിദ്യാര്‍ഥികള്‍ക്കുള്ള ആരോഗ്യകരമായ ഭക്ഷണ ഉല്‍പന്നങ്ങളും ഓഫറുകളില്‍ ഉള്‍പ്പെടുന്നു. യൂനിവേഴ്‌സിറ്റി ഓഫ് ഷാര്‍ജ, അമേരിക്കന്‍ യൂണിവേഴ്‌സിറ്റി ഓഫ് ഷാര്‍ജ പോലുള്ള സര്‍വകലാശാലകളിലും ഷാര്‍ജ കോപ്പിന് ബ്രാഞ്ചുകളുണ്ട്.
അതിനിടെ, 80 ശതമാനത്തോളം ഡിസ്‌കൗണ്ടുമായി ഷാര്‍ജ ചേംബര്‍ ഓഫ് കൊമേഴ്സ് ആന്‍ഡ് ഇന്‍ഡസ്ട്രിയുടെ നേതൃത്വത്തില്‍ ഷാര്‍ജ സമ്മര്‍ പ്രമോഷന്റെ ഭാഗമായി ബാക്ക് ടു സ്‌കൂള്‍ ക്യാംപയിന്‍ സംഘടിപ്പിക്കുന്നുണ്ട്. വസ്ത്രങ്ങള്‍, ഇലക്ട്രോണിക് ഉപകരണങ്ങള്‍, സ്‌കൂള്‍ ബാഗുകള്‍ എന്നിവയില്‍ എമിറേറ്റിലെ ഷോപ്പിംഗ് മാളുകളിലും ലൈബ്രറികളിലും സ്റ്റേഷനറി സ്റ്റോറുകളിലും ഈ ഡീലുകള്‍ ലഭ്യമാണ്. സെപ്റ്റംബര്‍ ഒന്ന് വരെ ക്യാംപയിന്‍ നീണ്ടുനില്‍ക്കും. ഓഗസ്റ്റ് 23 മുതല്‍ 25 വരെ 06 മാളില്‍ വിദ്യാര്‍ത്ഥികള്‍ക്കും രക്ഷിതാക്കള്‍ക്കും കുടുംബങ്ങള്‍ക്കും 100 സ്‌കൂള്‍ ബാഗുകളും 100 വൗച്ചറുകളും നല്‍കും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല