സ്വന്തം ലേഖകൻ: ജീവനക്കാരുടെ പെൻഷൻ തുക ആറു ശതമാനം വർധിപ്പിക്കാനുള്ള നിർദേശത്തിന് ശൂറ കൗൺസിൽ അംഗീകാരം നൽകി. കഴിഞ്ഞ വർഷം ജനുവരി മുതൽ മുൻകാല പ്രാബല്യത്തോടെയാണ് പെൻഷൻ വർധിപ്പിക്കുന്നത്. 95,000ലധികം ബഹ്‌റൈനികളുടെ പെൻഷൻ കുടിശ്ശിക അവരുടെ അക്കൗണ്ടുകളിലേക്ക് ഉടൻ ലഭിക്കുമെന്ന് ശൂറ കൗൺസിൽ ചെയർമാൻ അലി സാലിഹ് അസ്സാലിഹ് പറഞ്ഞു.
1976ലെ സോഷ്യൽ ഇൻഷുറൻസ് നിയമത്തിലും 1975ലെ സിവിൽ സർവിസ് വേജസ് ആൻഡ് പെൻഷൻ നിയമത്തിലും വരുത്തിയ ഭേദഗതികളാണ് കഴിഞ്ഞ ദിവസം ചേർന്ന ശൂറ കൗൺസിലിന്റെ അസാധാരണ സമ്മേളനത്തിൽ ഏകകണ്ഠമായി അംഗീകരിച്ചത്. പാർലമെന്‍റിന്റെ അംഗീകാരത്തെത്തുടർന്ന് ഭേദഗതി നിർദേശങ്ങൾ അംഗീകാരത്തിനായി ഹമദ് രാജാവിന് സമർപ്പിച്ചു. പൊതുമേഖലയിലും സ്വകാര്യ മേഖലയിലുമുള്ള പെൻഷൻകാർക്ക് തീരുമാനത്തിന്റെ പ്രയോജനം ലഭിക്കും. 2021 ജനുവരി മുതൽ മുൻകാല പ്രാബല്യമുണ്ടെങ്കിലും പരമാവധി വർധന 60 ദിനാറായി പരിമിതപ്പെടുത്തും.
പെൻഷൻ മിച്ചം വരുമ്പോഴെല്ലാം വാർഷിക വർധന നൽകണമെന്ന നിർദേശത്തിനും കൗൺസിൽ അംഗങ്ങൾ അനുകൂലമായി വോട്ട് ചെയ്തു. പ്രതിമാസ പെൻഷൻ വിഹിതം ശമ്പളത്തിന്റെ 27 ശതമാനം വരെ ക്രമേണ വർധിപ്പിക്കുന്നതിനെയും അനുകൂലിച്ചു. അതേസമയം, വ്യക്തിഗത വിഹിതം ഒരു ശതമാനത്തിൽ കൂടരുതെന്നും നിർദേശിച്ചു. പ്രവാസി തൊഴിലാളികളെ പെൻഷൻ സംവിധാനത്തിൽ ഉൾപ്പെടുത്തുകയും അവരുടെ സേവനാനന്തര ആനുകൂല്യങ്ങൾ സോഷ്യൽ ഇൻഷുറൻസ് ഓർഗനൈസേഷൻ (എസ്.ഐ.ഒ) നൽകുകയും ചെയ്യുമെന്നതാണ് ഭേദഗതിയിലെ മറ്റൊരു പ്രധാന നിർദേശം.
വിരമിക്കൽ പ്രായം ഔദ്യോഗികമായി 60 ആയി തുടരും. അതേസമയം, ആളുകൾക്ക് 65 വയസ്സ് വരെ ജോലി തിരഞ്ഞെടുക്കാം. അവരുടെ പരമാവധി പെൻഷൻ നിലവിലെ 80 ശതമാനത്തിന് പകരം ശമ്പളത്തിന്റെ 90 ശതമാനമായി പരിമിതപ്പെടുത്തും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല