സ്വന്തം ലേഖകൻ: രാജ്യത്ത് ട്രാഫിക് നിയമങ്ങൾ ലംഘിച്ച് വാഹനമോടിക്കുന്നവർക്കെതിരെ നടപടികൾ കർശനമാക്കാനുള്ള തീരുമാനവുമായി ബഹ്‌റൈൻ ട്രാഫിക് വിഭാഗം. രാജ്യത്ത് ഗതാഗത നിയമലംഘനം നടത്തി പിടിയിലാകുന്ന പ്രവാസികളായ ഡ്രൈവർമാർ നാടുകടത്തൽ അടക്കമുള്ള നിയമ നടപടികൾ നേരിടേണ്ടി വരുമെന്ന് ട്രാഫിക് വിഭാഗം അഡ്വ. ജനറൽ അറിയിച്ചു.
നിയമലംഘനത്തിന്റെ പേരിൽ പിടിക്കപ്പെടുന്ന ഡ്രൈവർമാരെ പിഴ അടച്ച് രക്ഷപ്പെടാൻ അനുവദിക്കുന്നതിന് പകരം അവർക്കെതിരെ കേസ് ചാർജ് ചെയ്ത് വിചാരണക്കായി കോടതിയിൽ ഹാജരാക്കുമെന്നും അദ്ദേഹം വ്യക്തമാക്കി. രാജ്യത്ത് ഗതാഗത നിയമ ലംഘനങ്ങളും തുടർന്നുണ്ടാവുന്ന റോഡ് അപകടങ്ങളും വലിയ തോതിൽ വർധിച്ചുവരുന്ന സാഹചര്യത്തിലാണ് ട്രാഫിക് നിയമ ലംഘനങ്ങളെ കർശനമായി നേരിടാൻ അധികൃതർ തീരുമാനം എടുത്തിരിക്കുന്നത്.
അടുത്ത കാലത്തായി രാജ്യത്ത് റിപ്പോർട്ട് ചെയ്യപ്പെട്ട ട്രാഫിക് നിയമലംഘനങ്ങളുടെയും അപകടങ്ങളുടെയും നിരക്കിലെ വർധനവ് അതീവ ഗൗരവതരമായ സ്ഥിതി വിശേഷമാണ് ഉണ്ടാക്കിയിരിക്കുന്നതെന്ന വിലയിരുത്തിയതിന്റെ അടിസ്ഥാനത്തിലാണ് തീരുമാനമെന്നും അദ്ദേഹം വ്യക്തമാക്കി.
നിയമലംഘനങ്ങളുടെ തോത് സമീപ കാലത്തായി വർധിച്ചത് ജനങ്ങളുടെ ജീവനും സുരക്ഷിതത്വത്തിനും ഭീഷണി സൃഷ്ടിച്ചിരിക്കുകയാണെന്നും അദ്ദേഹം വിലയിരുത്തി. അമിത വേഗത, അപകടകരമായ ഓവർടേക്കിങ്, റോഡിലെ തെറ്റായ രീതിയിലുള്ള വാഹനങ്ങളുടെ ട്രാക്ക് മാറ്റം തുടങ്ങിയ ഗതാഗത നിയമലംഘനങ്ങൾ വലിയ അപകടങ്ങൾക്ക് വഴിവെക്കുന്നുണ്ട്.
നിയമലംഘനങ്ങൾക്കെതിരെയുള്ള നടപടികൾ കർശനമാക്കുന്നതിന്റെ ഭാഗമായി കഴിഞ്ഞ ദിവസങ്ങളിൽ നിരവധി നിയമലംഘകരെ പോലീസ് പിടികൂടിയിരുന്നു. ഇതുമായി ബന്ധപ്പെട്ട് സമൂഹമാധ്യമങ്ങളിൽ പ്രചരിക്കുന്ന വിഡിയോകളുടെ അടിസ്ഥാനത്തിലും നടപടികൾ സ്വീകരിച്ചിരുന്നു. വരുംദിവസങ്ങളിൽ ഇത്തരം നിയമലംഘനങ്ങൾക്കെതിരെ കർശനനടപടികളുമായി മുന്നോട്ടുപോകുമെന്നും ജനറൽ ട്രാഫിക് ഡിപ്പാർട്ട്മെന്റ് മുന്നറിയിപ്പ് നൽകി.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല