അപ്പച്ചന്‍ കണ്ണന്‍ചിറ
ലണ്ടന്‍: തൃശ്ശൂര്‍ അതിരൂപതയുടെ ആദരണീയനായ അദ്ധ്യക്ഷന്‍ മാര്‍ ആന്‍ഡ്രൂസ് താഴത്ത് യു കെ സന്ദര്‍ശിക്കുന്നു. ജൂലൈ 16 നു ലണ്ടനില്‍ എത്തിച്ചേരുന്ന അഭിവന്ദ്യ ആന്‍ഡ്രൂസ് പിതാവിനെ ഹീത്രൂ വിമാനത്താവളത്തില്‍ വെച്ച് യു കെ സീറോ മലബാര്‍ കോര്‍ഡിനേട്ടര്‍ ഫാ.തോമസ് പാറയടിയില്‍, ഈസ്റ്റ് ആംഗ്ലിയാ സീറോ മലബാര്‍ ചാപ്ലിന്‍ ഫാ.ടെറിന്‍ മുള്ളക്കര എന്നിവരുടെ നേതൃത്വത്തില്‍ ഊഷ്മള വരവേല്‍പ്പാണ് ഒരുക്കിയിരിക്കുന്നത്.യുറോപ്പില്‍ അജപാലന രംഗത്ത് പ്രവര്‍ത്തിക്കുന്ന രൂപതാംഗങ്ങളായ വൈദികരെ സന്ദര്‍ശിക്കുവാന്‍ തയ്യാറാക്കിയിരിക്കുന്ന യാത്രാ പരിപാടികളില്‍ ഒരാഴ്ചത്തെ പര്യടനം ആണ് യു കെ യില്‍ പിതാവിനുള്ളത്.
തൃശ്ശൂര്‍ അതി രൂപതയുടെ അദ്ധ്യക്ഷ പദവിക്ക് പുറമേ സാമൂഹ്യസാംസ്‌കാരികസാഹിത്യ രംഗങ്ങളില്‍ തിളക്കമാര്‍ന്ന വ്യക്തിത്വം നില നിറുത്തുന്ന ആന്‍ഡ്രൂസ് പിതാവ് CBCI വൈസ് പ്രസിഡണ്ട്, KCBC വിദ്യാഭ്യാസ കമ്മീഷന്‍ ചെയര്‍മാന്‍, ആലുവാമംഗലപ്പുഴ സെമിനാരി കമ്മീഷന്‍ പ്രസിഡണ്ട് എന്നീ തലങ്ങളിലും പ്രവര്‍ത്തിക്കുന്നു. ഓറിയന്റല്‍ കാനോണ്‍ നിയമങ്ങളില്‍ ഇന്ത്യയില്‍ ഏറ്റവും പ്രഗത്ഭനായ താഴത്ത് പിതാവ് കാനോണ്‍ നിയമങ്ങളെ സംബന്ധിച്ചു സ്വന്തമായി നിരവധി ബുക്കുകള്‍ പ്രസിദ്ധീകരിച്ചിട്ടുണ്ട്. റോമില്‍ നടക്കുന്ന വേള്‍ഡ് കാത്തലിക്ക് ബിഷപ്പ്‌സ് സിനഡില്‍ പാലാ രൂപതയുടെ അദ്ധ്യക്ഷന്‍ മാര്‍ ജോസഫ് കല്ലരങ്ങാട്ടിനോടോപ്പം, KCBC മുന്‍ പ്രസിഡണ്ട് കൂടിയായിരുന്ന ആന്‍ഡ്രൂസ് താഴത്ത് പിതാവും സീറോ മലബാര്‍ സഭയെ പ്രതിനിധീകരിച്ചു പങ്കെടുക്കുന്നുണ്ട്.
ജൂലൈ 17 നു വെള്ളിയാഴ്ച താഴത്ത് പിതാവ് ലണ്ടനിലെ ഈസ്റ്റ്ഹാമില്‍ ദിവ്യബലി അര്‍പ്പിച്ചു സന്ദേശം നല്‍കുന്നതായിരിക്കും.
ജൂലൈ 18 നു ശനിയാഴ്ച ഈസ്റ്റ് ആംഗ്ലിയായിലെ നോര്‍വിച്ച് ഹോളി അപ്പൊസ്റ്റലസ് ദേവാലയത്തില്‍ വൈകുന്നേരം 5:00 മണിക്ക് നടത്തപ്പെടുന്ന വി.അല്‍ഫോന്‍സാമ്മയുടെ പെരുന്നാളില്‍ മുഖ്യ കാര്‍മ്മികത്വം വഹിച്ച് സന്ദേശം നല്‍കുന്നതാണ്.
ജൂലൈ 19 നു ഞായറാഴ്ച സീറോ മലബാര്‍ സഭയുടെ നേതൃത്വത്തില്‍ നടത്തപ്പെടുന്ന ഏറ്റവും വലിയ ആഘോഷമായ വാത്സിങ്ങം തീര്‍ത്താടനത്തിലെ തിരുക്കര്‍മ്മങ്ങളില്‍ പിതാവ് കാര്‍മ്മികത്വം വഹിക്കുന്നതാണ്.
ജൂലൈ 22 നു ഈസ്റ്റ് ആംഗ്ലിയായിലെ തന്നെ ഇപ്‌സ്‌വിച്ച് സെന്റ് മേരീസ് ദേവാലയത്തില്‍ ആന്‍ഡ്രൂസ് പിതാവ് വൈകുന്നേരം 6:00 മണിക്ക് വിശുദ്ധ കുര്‍ബ്ബാന അര്‍പ്പിക്കുന്നതായിരിക്കും.
ഏതാനും സ്വകാര്യ സന്ദര്‍ശനങ്ങളും,ഔദ്യൊഗിക മീറ്റിങ്ങുകളും താഴത്ത് പിതാവിന്റെ യു കെ പരിപാടികളില്‍ ഉള്‍ക്കൊള്ളിച്ചിട്ടുണ്ട്.
ആര്‍ച്ച് ബിഷപ്പ് മാര്‍ ആന്‍ഡ്രൂസ് താഴത്തിന്റെ യു കെ സന്ദര്‍ശനം പ്രവാസി സീറോ മലബാര്‍ വിശ്വാസികള്‍ക്ക് കൂടുതല്‍ ഊര്‍ജ്ജവും, കരുത്തും പ്രദാനം ചെയ്യുവാനും, പ്രവാസി സീറോ മലബാര്‍ സഭക്ക് ഉത്തേജനവും ഉണര്‍വ്വും പകര്‍ന്നു നല്‍കുവാനും ഉപകരിക്കും എന്ന് വിശ്വാസി സമൂഹം ഉറച്ചു പ്രതീക്ഷിക്കുന്നു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല