സ്വന്തം ലേഖകൻ: യുഎഇ പൊതുമാപ്പ് പരിപാടി രണ്ട് മാസത്തേക്കു കൂടി നീട്ടിയിരിക്കുകയാണ്. കാലാവധി നീട്ടില്ലെന്നാണ് നേരത്തെ അധികാരികൾ പറഞ്ഞിരുന്നത്. എന്നാൽ യുഎഇയുടെ 53-ാമത് യൂണിയന്‍ ദിനാഘോഷം പ്രമാണിച്ച് പൊതുമാപ്പ് സമയപരിധി നീട്ടാൻ തീരുമാനമെടുത്തതായി ഐസിപി ഡയറക്ടര്‍ ജനറല്‍ മേജര്‍ ജനറല്‍ സുഹൈല്‍ സയീദ് അല്‍ ഖൈലി അറിയിച്ചു.
പൊതുമാപ്പ് കാലാവധിയായ ഒക്ടോബർ 1ന് വലിയ തിരക്കാണ് വിവിധ പൊതുമാപ്പ് കേന്ദ്രങ്ങളിൽ അനുഭവപ്പെട്ടത്. ഇനിയും ധാരാളമാളുകൾ പൊതുമാപ്പ് സാധ്യത തേടും എന്നതിന്റെ സൂചനയായിരുന്നു അത്. ഏതായാലും പുതുവർഷത്തലേന്നു വരെ തീരുമാനമെടുക്കാനുള്ള സമയം നൽകിയിരിക്കുകയാണ്. ശ്രദ്ധിക്കേണ്ട കാര്യങ്ങൾ ഇവയാണ്:
പുതുക്കിയ തീയതി പ്രകാരം 2024 ഡിസംബര്‍ 31-നാണ് പൊതുമാപ്പ് സമയപരിധി അവസാനിക്കുക. പൊതുമാപ്പ് പ്രയോജനപ്പെടുത്തുന്നവര്‍ക്കായി വിപുലമായ സംവിധാനങ്ങള്‍ ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ്, പോര്‍ട്ട് സെക്യൂരിറ്റി (ഐസിപി)യും, ദുബായിലെ ജനറല്‍ ഡയറക്ടറേറ്റ് ഓഫ് റെസിഡന്‍സി ആന്‍ഡ് ഫോറിനേഴ്സ് അഫയേഴ്സും (ജിഡിആര്‍എഫ്എ) ചേര്‍ന്ന് ഒരുക്കും. നിലവിലുള്ള സംവിധാനങ്ങൾ തുടരുമെന്നാണ് മനസ്സിലാക്കുന്നത്.
പുതുക്കിയ കാലയളവിനുള്ളിൽ വീസ നിയമങ്ങൾ ലംഘിച്ച് രാജ്യത്ത് കഴിയുന്നവർക്ക് രാജ്യം വിടാനുള്ള തീരുമാനമെടുക്കുകയോ, വീസ രേഖകൾ ക്രമപ്പെടുത്തി രാജ്യത്ത് തുടരുകയോ, പുതിയ ജോലി കണ്ടെത്തുകയോ ഒക്കെയാവാം. ഇതിന് ഈ കാലയളവിൽ പിഴയോ മറ്റ് ശിക്ഷകളോ നേരിടേണ്ടി വരില്ല.
ഇത് അവസാന ചാൻസ് ആണെന്നാണ് ഐസിപി ഡയറക്ടര്‍ ജനറല്‍ മേജര്‍ ജനറല്‍ സുഹൈല്‍ സയീദ് അല്‍ ഖൈലി പറയുന്നത്. ഈ അവസരം എല്ലാവരും ഉപയോഗപ്പെടുത്തണമെന്നും, നിയമലംഘനത്തിന് പിടിയിലായി പ്രശ്നങ്ങളിൽ അകപ്പെടരുതെന്നും അധികാരികൾ ഓർമ്മിപ്പിക്കുന്നു.
നിയമലംഘകർക്കെതിരായ പിഴകളും ശിക്ഷാ നടപടികളും 2025 ജനുവരി 1ന് വീണ്ടും പ്രാബല്യത്തില്‍ വരും. ഇവരെ കണ്ടെത്തുന്നതിനായുള്ള പരിശോധനകള്‍ ഡിസംബര്‍ 31 നുശേഷം ആരംഭിക്കും. പൊതുമാപ്പ് കാലാവധി അവസാനിച്ച ശേഷം അനധികൃത താമസക്കാരെ നിയമിക്കുന്ന തൊഴിലുടമകള്‍ക്ക് 10 ലക്ഷം ദിര്‍ഹം വരെ പിഴ ചുമത്തുമെന്ന് അധികൃതര്‍ കഴിഞ്ഞ ദിവസം അറിയിച്ചിരുന്നു. അടുത്തിടെ ഭേദഗതി ചെയ്ത യുഎഇ തൊഴില്‍ നിയമം-2021-ലെ 33-ാം നമ്പര്‍ നിയമപ്രകാരമുള്ള പിഴകള്‍ ഇന്നു മുതല്‍ ബാധകമാവും.
വീസ കാലാവധി കഴിഞ്ഞ ശേഷമുള്ള താമസത്തിന് ഓരോ ദിവസവും 50 ദിർഹം വെച്ച് പിഴ വീഴും. മുൻകാലങ്ങളിൽ വിവിധ വീസകൾക്ക് പല പിഴത്തുകകളായിരുന്നു. ഇപ്പോൾ ഇത് ഏകീകരിച്ചിരിക്കുകയാണ്. താമസ വീസയ്ക്കും, വീസിറ്റ് വീസയ്ക്കും, ടൂറിസ്റ്റ് വീസയ്ക്കുമെല്ലാം ഓവർസ്റ്റേയ്ക്ക് ഒരേ തുകയാണ് പിഴയായി ഈടാക്കുന്നത്.
നാട്ടിലേക്കുള്ള എക്സിറ്റ് വീസ അധികൃതരിൽ നിന്ന് ലഭിച്ചു കഴിഞ്ഞാൽ 14 ദിവസം കൂടി രാജ്യത്ത് തങ്ങാൻ കഴിയും. ഈ എക്സിറ്റ് പെർമിറ്റ് പൊതുമാപ്പ് കാലാവധിക്കുള്ളിലാണ് തീരുന്നതെങ്കിൽ ഡിസംബർ 31 വരെ യാത്രാനുമതി ലഭിക്കും. എന്നാൽ ഡിസംബർ 31 പിന്നിട്ടാൽ ഈ ആനുകൂല്യം ഇല്ലാതാകും. പിഴ ഒടുക്കേണ്ടതായി വരും.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല