സ്വന്തം ലേഖകൻ: ശൈത്യകാലത്തിന് തുടക്കമായതോടെ രാജ്യതലസ്ഥാനത്തെ വായുമലിനീകരണത്തോത് കുത്തനെ കൂടുന്നത് ഭീഷണിയാകുന്നു. ഞായറാഴ്ച 302 ആയിരുന്ന ശരാശരി വായുനിലവാര സൂചിക തിങ്കളാഴ്ച 309 ആയി ഉയർന്നു. ശനിയാഴ്ച 173 ആയിരുന്ന സ്ഥാനത്താണിത്.
വരുംദിവസങ്ങളിൽ 30 ശതമാനം വരെ ഉയരാനാണ് സാധ്യത. 400 നു മുകളിലേക്ക് പോയാൽ അത് അതിഗുരുതരാവസ്ഥയിലേക്ക് എത്തിക്കും. കാൻസറും ഹൃദയസംബന്ധമായ പ്രശ്നങ്ങളും ഉൾപ്പെടെയുള്ള മാരക രോഗങ്ങൾ വർധിക്കാൻ സാധ്യതയുണ്ടെന്ന് ആരോഗ്യവകുപ്പ് മുന്നറിയിപ്പു നൽകിയിട്ടുണ്ട്.
ഡൽഹി യൂണിവേഴ്സിറ്റി പരിസരത്തും ഇന്ദിരാഗാന്ധി അന്തർദേശീയ വിമാനത്താവള പരിസരത്തുമാണ് നിലവിൽ വായുനിലവാരം ഏറ്റവും കുറവ് രേഖപ്പെടുത്തിയത്. വായു മലിനീകരണം കുറയ്ക്കാൻ വരുംദിവസങ്ങളിൽ ശക്തമായ നിയന്ത്രണങ്ങൾ നടപ്പാക്കാനാണു സർക്കാർ നീക്കം. ഇതിന്‍റെ ഭാഗമായി നിർമാണ പ്രവർത്തനങ്ങൾ ഉൾപ്പെടെ നിയന്ത്രിച്ച് 11 ഇന കർമപദ്ധതി നടപ്പാക്കും.
ഇതിൽ ഏറ്റവും പ്രധാനപ്പെട്ടത് ഗതാഗതക്കുരുക്ക് ഒഴിവാക്കി നഗരത്തിൽ വായുമലിനീകരണം കുറയ്ക്കാനുള്ള നടപടിയാണ്. കഴിഞ്ഞ വർഷം ഡൽഹിയില്‌ ഒറ്റ ഇരട്ടയക്ക വാഹന നിയന്ത്രണം ഏർപ്പെടുത്തിയിരുന്നു.
വായുമലിനീകരരണം രൂക്ഷമാകുന്ന നിർമാണ സൈറ്റുകൾ പോലെയുള്ള മറ്റ് മേഖലകൾ കണ്ടെത്തി അവിടെ വലിയ യന്ത്രങ്ങൾ സ്ഥാപിച്ച് വെള്ളം തളിക്കുന്ന നടപടികൾ സ്വീകരിക്കും.
നിർമാണ മേഖലകളിൽ മലിനീകരണ മാപിനി സ്ഥാപിച്ച് മലിനീകരണത്തോത് കൃത്യമായി രേഖപ്പെടുത്തും. ആവശ്യമെങ്കിൽ സ്കൂളുകൾക്ക് അവധി നല്കാനും സാധ്യതയുണ്ട്. വായു മലിനീകരണം വർധിക്കുന്ന സാഹചര്യത്തിൽ ഹരിയാന, പഞ്ചാബ്, ഉത്തർപ്രദേശ് സംസ്ഥാനങ്ങളിലെ കൃഷിസ്ഥലങ്ങളിൽ വൈക്കോൽ കൂട്ടമായി കത്തിക്കുന്നതും സ്ഥിതിഗതികൾ രൂക്ഷമാക്കാറുണ്ട്.
ഇതു തടയുന്നത് പരിശോധിക്കാൻ റിട്ട. ജസ്റ്റീസ് മദൻ ബി. ലോക്കൂർ അധ്യക്ഷനായ സമിതിയെ സുപ്രീംകോടതി നിയോഗിച്ചിരുന്നു. അന്താരാഷ്‌ട്രതലത്തിൽ നടത്തിയ പഠനങ്ങളനുസരിച്ച് ഇന്ത്യ ലോകത്തെ ഏറ്റവും മലിനീകരണമുള്ള എട്ടാമത്തെ രാജ്യമാണ്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല