സ്വന്തം ലേഖകൻ: സംസ്ഥാനത്തെ ഉന്നതവിദ്യാഭ്യാസ സ്ഥാപനങ്ങളുടെ കാംപസുകൾ വിദേശത്ത് തുറക്കാൻ അവസരംതേടി സർക്കാർ. ഓവർസീസ് സെന്ററുകൾ തുടങ്ങാൻ യു.ജി.സി. അനുവദിച്ച സാഹചര്യത്തിലാണ് നീക്കം. ആദ്യലക്ഷ്യം ഗൾഫ് രാജ്യങ്ങളായിരിക്കും. ഉന്നതവിദ്യാഭ്യാസത്തിൽ വിദേശവിദ്യാർഥികളെ ആകർഷിക്കാനും ഇവിടെയുള്ളവരെ പിടിച്ചുനിർത്താനും ലക്ഷ്യമിട്ട് ‘സ്റ്റഡി ഇൻ കേരള’ പദ്ധതിയും പ്രഖ്യാപിച്ചു.
ബ്രാൻഡ് വാല്യു വർധിപ്പിക്കാനാവുന്നവിധം മറ്റുസംസ്ഥാനങ്ങളിലും രാജ്യങ്ങളിലും കേരളത്തിലെ വിദ്യാഭ്യാസസ്ഥാപനങ്ങളുടെ കാംപസുകൾ സ്ഥാപിക്കാൻ നടപടിയെടുക്കുമെന്ന് മന്ത്രി ആർ. ബിന്ദു പത്രസമ്മേളനത്തിൽ പറഞ്ഞു. ഇതിനുള്ള ആശയരൂപവത്കരണത്തിനായി ഉന്നതവിദ്യാഭ്യാസ കോൺക്ലേവ് സംഘടിപ്പിക്കും.
സ്റ്റഡി ഇൻ കേരള പദ്ധതിയുടെ ഭാഗമായി സ്വകാര്യമേഖലയുമായി സഹകരിച്ച് വിദേശവിദ്യാർഥികൾക്കായി മികച്ച പാർപ്പിടസൗകര്യമൊരുക്കും. അന്താരാഷ്ട്രസ്ഥാപനങ്ങളുമായി ഗവേഷണസഹകരണം കൂട്ടും. മൂന്നാംലോകരാജ്യങ്ങളിലെ വിദ്യാർഥികളെ ആകർഷിക്കാൻ പ്രത്യേകപദ്ധതി തയ്യാറാക്കും.
സ്വയംഭരണ പദവിയോടെ ഏഴ് മികവിന്റെ കേന്ദ്രങ്ങൾ സ്ഥാപിക്കുമെന്ന് മന്ത്രിയറിയിച്ചു. ഇതിനായി 11.4 കോടിയുടെ ഭരണാനുമതി നൽകി. ഉന്നതവിദ്യാഭ്യാസത്തിലെ അധ്യാപക-അനധ്യാപക-ഗവേഷക വിദ്യാർഥി പരിശീലനവും പാഠ്യപദ്ധതി രൂപകല്പനയും ലക്ഷ്യമിട്ടാണ് ഒരുകേന്ദ്രം.
ഇതിന് കാലിക്കറ്റ് സർവകലാശാലയാണ് പരിഗണനയിൽ. ശാസ്ത്രഗവേഷണം-കുസാറ്റ്, കേരളീയ സംസ്കാരം-മൂന്നാർ, സ്റ്റാർട്ടപ്പ്-കേരള സർവകലാശാല, തദ്ദേശീയ ജനതയുടെ വിദ്യാഭ്യാസം-വയനാട്, ലിംഗസമത്വ പഠനം-കണ്ണൂർ, ഭാഷാപഠനം-കാലടി, മലയാളം സർവകലാശാലകൾ എന്നിങ്ങനെയാണ് മറ്റുകേന്ദ്രങ്ങൾ തുടങ്ങാൻ ലക്ഷ്യമിടുന്നത്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല