സ്വന്തം ലേഖകൻ: ത്യാഗസ്മരണയില്‍ ഗള്‍ഫ് രാജ്യങ്ങളില്‍ ഇന്ന് ബലിപെരുന്നാള്‍. ഇത്തവണ ഒമാന്‍ ഉള്‍പ്പടെ എല്ലാ ഗള്‍ഫ് രാജ്യങ്ങളിലും ഇന്നാണ് പെരുന്നാള്‍. ഇന്നു രാവിലെ തന്നെ ഈദ്ഗാഹുകളിലും പള്ളികളിലും പെരുന്നാള്‍ നമസ്‌കാരം നിര്‍വഹിച്ച സ്വദേശികളും പ്രവാസികളും ഉള്‍പ്പെടെയുള്ള വിശ്വാസികള്‍ ഉല്‍സവാന്തരീക്ഷം നിറഞ്ഞ അന്തരീക്ഷത്തിലേക്ക് നീങ്ങി. പരസ്പരം ആശ്ലേഷിച്ചും ചുംബനങ്ങള്‍ കൈമാറിയും വിശ്വാസികള്‍ പരസ്പരം ഈദ് ആശംസകള്‍ നേര്‍ന്നു. ബലി പെരുന്നാള്‍ ദിനത്തിലെ പ്രധാന ചടങ്ങായ ബലി കര്‍മം നിര്‍വഹിക്കാനുള്ള തിരക്കിലേക്കിലാണ് വിശ്വാസികള്‍.
എല്ലാ ഗള്‍ഫ് ഭരണാധികാരികളും രാജ്യത്തിലെ സ്വദേശികളും പ്രവാസികളും ഉള്‍പ്പെടെയുള്ള ജനങ്ങള്‍ക്ക് ബലി പെരുന്നാള്‍ ആശംസകള്‍ നേര്‍ന്നു. യുഎഇയിലെ ജനങ്ങള്‍ക്കും എല്ലാ അറബ്, ഇസ്ലാമിക രാജ്യങ്ങളിലെ ജനങ്ങള്‍ക്കും ഈദ് അല്‍ അദ്ഹ ആശംസകള്‍ നേരുന്നതായി യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂം ട്വിറ്റര്‍ സന്ദേശത്തില്‍ അറിയിച്ചു.
ഈദ് അല്‍ അദ്ഹയോടനുബന്ധിച്ച് ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍താനിയും പൗരന്മാര്‍ക്കും താമസക്കാര്‍ക്കും ആശംസകള്‍ നേര്‍ന്നു. ഖത്തറിലെ ജനങ്ങള്‍ക്കും താമസക്കാര്‍ക്കും ഈദ് അല്‍-അദ്ഹയുടെ വേളയില്‍ ഞാന്‍ ആശംസകള്‍ നേരുന്നു. അല്ലാഹു നിങ്ങള്‍ക്കും നമ്മുടെ അറബ്, ഇസ്ലാമിക രാജ്യങ്ങള്‍ക്കും ഇത് സന്തോഷകരമായ ഈദ് ആക്കട്ടെ. നിങ്ങള്‍ക്കെല്ലാവര്‍ക്കും ഇദ് മുബാറക്- തന്റെ ഔദ്യോഗിക ട്വിറ്റര്‍ അക്കൗണ്ടില്‍ ശെയ്ഖ് തമീം കുറിച്ചു.
കുവൈത്തിലെ പൗരന്മാര്‍ക്കും താമസക്കാര്‍ക്കും അമീര്‍ ഷെയ്ഖ് നവാഫ് അല്‍ അഹമ്മദ് അല്‍ ജാബര്‍ അല്‍ സബാഹും ഈദ് അല്‍ അദ്ഹ ആശംസകള്‍ അറിയിച്ചു. കുവൈത്തിനെയും അവിടുത്തെ ജനങ്ങളെയും എല്ലാ തിന്മകളില്‍ നിന്നും സംരക്ഷിക്കാനും രസര്‍വശക്തനായ അല്ലാഹുവിനോട് പ്രാര്‍ത്ഥിക്കുന്നതായി അമീര്‍ സന്ദേശത്തില്‍ പറഞ്ഞു. ഈദ് അല്‍ അദ്ഹയോടനുബന്ധിച്ച് ഒമാനിലെ പൗരന്മാര്‍ക്കും അവിടുത്തെ താമസക്കാര്‍ക്കും ആശംസകള്‍ നേര്‍ന്ന് സുല്‍ത്താന്‍ ഹൈതം ബിന്‍ താരിഖും സന്ദേശം പുറത്തിറക്കി.
ബലി പെരുന്നാള്‍ ആഘോഷത്തിന്റെ ഭാഗമായി വൈവിധ്യമാര്‍ന്ന പരിപാടികളാണ് ഗള്‍ഫ് രാജ്യങ്ങളിലെങ്ങും ഒരുക്കിയിരിക്കുന്നത്. മതപരമായ ചടങ്ങുകള്‍ക്കൊപ്പം സംഗീതവും വിനോദവും കലാകായിക പരിപാടികളും ഉള്‍പ്പെടെ നൂറുകണക്കിന് പരിപാടികള്‍ വരും ദിവസങ്ങളില്‍ അരങ്ങേറും. വിവിധ ഷോപ്പിംഗ്, ഡൈനിംഗ് ഫെസ്റ്റിവലുകളും ഇതിന്റെ ഭാഗമായി ഒരുക്കിയിട്ടുണ്ട്. വിനോദയാത്രക്കാര്‍ക്കായി വിവിധ യാത്രാ പാക്കേജുകള്‍ രാജ്യങ്ങളിലെ ടൂറിസം സ്ഥാപനങ്ങള്‍ അവതരിപ്പിച്ചിട്ടുണ്ട്.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല