ഗൾഫ് രാജ്യങ്ങളിൽ അമിതവ ണ്ണക്കാരുടെ എണ്ണം കൂടുന്നു; ഏറ്റവും കുറവ് ഒമാനില്‍; കൂടുതൽ കുവൈത്തില്‍

സ്വന്തം ലേഖകൻ: അമിത വണ്ണത്തിന്റെ കാര്യത്തില്‍ മിഡിലീസ്റ്റ് രാജ്യങ്ങളില്‍ ഏറ്റും കുറവ് ഒമാനിലും ഏറ്റവും കൂടുതല്‍ കുവൈത്തിലും. ഗ്ലോബല്‍ ഒബിസിറ്റി ഒബ്‌സര്‍വേറ്ററിയുടെ ഏറ്റവും പുതിയ റിപ്പോര്‍ട്ട് അനുസരിച്ചാണിത്. ഗ്ലോബല്‍ ഒബിസിറ്റി ഒബ്‌സര്‍വേറ്ററിയുടെ കണക്കുകള്‍ പ്രകാരം, അറബ് രാജ്യങ്ങളിലെ പുരുഷന്മാരുടെ പൊണ്ണത്തടി നിരക്കില്‍ കുവൈത്ത് ഒന്നാം സ്ഥാനത്താണ്. 34.28 ശതമാനമാണ് ഇവിടത്തെ പൊണ്ണത്തടി നിരക്ക്. മുതിര്‍ന്ന പുരുഷന്മാരില്‍ ആഗോളതലത്തില്‍ 15-ാം സ്ഥാനത്തുമാണ് കുവൈത്ത്.

ഒരു വ്യക്തിയുടെ ഭാരം കിലോഗ്രാമില്‍ അവരുടെ ഉയരം മീറ്ററില്‍ ഹരിച്ചാണ് കണക്കാക്കുന്നത്. ലോകാരോഗ്യ സംഘടനയുടെ മാര്‍ഗ്ഗനിര്‍ദ്ദേശങ്ങള്‍ക്ക് അനുസൃതമായി, ബിഎംഐ സ്‌കോര്‍ 25-ല്‍ കൂടുതലാണെങ്കില്‍ അമിതഭാരവും 30-ല്‍ കൂടുതല്‍ പൊണ്ണത്തടിയുമാണ്. 2020 ല്‍, 2.6 ബില്യണ്‍ ആളുകള്‍ ഈ വിഭാഗങ്ങളില്‍ പെടുന്നു. അഥവാ ലോക ജനസംഖ്യയുടെ 38 ശതമാനം. വരും വര്‍ഷങ്ങളില്‍ പൊണ്ണത്തടിയില്‍ ഏറ്റവും വലിയ വര്‍ദ്ധനവ് പ്രതീക്ഷിക്കുന്ന മിക്കവാറും എല്ലാ രാജ്യങ്ങളും ഏഷ്യയിലെയും ആഫ്രിക്കയിലെയും താഴ്ന്ന അല്ലെങ്കില്‍ ഇടത്തരം വരുമാനമുള്ള രാജ്യങ്ങളാണെന്നും റിപ്പോര്‍ട്ട് കണ്ടെത്തി.

33.46 ശതമാനം പൊണ്ണത്തടി നിരക്കുമായി ആഗോളതലത്തില്‍ 16-ാം സ്ഥാനത്തും മിഡിലീസ്റ്റില്‍ രണ്ടാം സ്ഥാനത്തും ഖത്തറാണുള്ളത്. സൗദി അറേബ്യയാണ് തൊട്ടു പിറകില്‍. ആഗോളതലത്തില്‍ 17-ാം സ്ഥാനത്തും മിഡിലീസ്റ്റിലല്‍ മൂന്നാമതുമാണ് രാജ്യം. 31.73 ശതമാനമാണ് സൗദി അറേബ്യയിലെ പൊണ്ണത്തടി നിരക്ക്. സൗദി കഴിഞ്ഞാല്‍ മിഡിലീസ്റ്റില്‍ ഏറ്റവും കൂടുതല്‍ പൊണ്ണത്തടി നിരക്കുള്ള രാജ്യം യുഎഇയാണ്.

മിഡിലീസ്റ്റില്‍ നാലാം സ്ഥാനത്തുള്ള യുഎഇ ആഗോള തലത്തില്‍ ഇക്കാര്യത്തില്‍ 26-ാം സ്ഥാനത്താണ്. 28.44 ശതമാനമാണ് യുഎഇയിലെ പൊണ്ണത്തടി നിരക്ക്. അതേസമയം, മിഡിലീസ്റ്റ് രാജ്യങ്ങളില്‍ പൊണ്ണത്തടി നിരക്ക് ഏറ്റവും കുറഞ്ഞത് ഒമാനിലാണെന്നും ഗ്ലോബല്‍ ഒബിസിറ്റി ഒബ്‌സര്‍വേറ്ററിയുടെ റിപ്പോര്‍ട്ടില്‍ പറയുന്നു. മിഡിലീസ്റ്റില്‍ ആറാമത്തെയും ആഗോള തലത്തില്‍ അറുപാതമത്തെ സ്ഥാനത്താണ് ഒമാന്‍. 22.77 ശതമാനമാണ് ഇവിടത്തെ പൊണ്ണത്തടി നിരക്ക്.

അറബ് രാജ്യങ്ങളിലെ സ്ത്രീകളുടെ പൊണ്ണത്തടിയുടെ കാര്യത്തില്‍, കുവൈറ്റാണ് മിഡിലീസ്റ്റില്‍ ഒന്നാം സ്ഥാനത്തും ആഗോളതലത്തില്‍ 14-ാം സ്ഥാനത്തും. ഖത്തര്‍ ആഗോള തലത്തില്‍ 15-ാം സ്ഥാനത്തും സൗദി അറേബ്യ 17-ാം സ്ഥാനത്തുമാണ്. സ്ത്രീകളുടെ പൊണ്ണത്തടി നിരക്കില്‍ 20-ാം സ്ഥാനത്താണ് യുഎഇ. 29-ാണ് ബഹ്‌റൈന്റെ സ്ഥാനം. സ്ഥാനത്തുമാണ്. ഇക്കാര്യത്തില്‍ മിഡിലീസ്റ്റില്‍ ഒമാന്‍ തന്നെ മികച്ചത്.

ആഗോള റാങ്കിംഗിലല്‍ 38ാമതാണ് ഒമാന്‍. ആഗോളതലത്തില്‍, പുരുഷന്മാരുടെ പൊണ്ണത്തടിയുടെ കാര്യത്തില്‍ നൗറു ദ്വീപ് ഒന്നാം സ്ഥാനത്തെത്തി. 59.85 ശതമാനമാണ് ഇവിടത്തെ പൊണ്ണത്തടി നിരക്ക്. അമേരിക്കന്‍ സമോവ സ്ത്രീകളുടെ പൊണ്ണത്തടി നിരക്കില്‍ ഒന്നാമതെത്തി. ലോകമെമ്പാടുമുള്ള ഏറ്റവും സാധാരണമായ ആരോഗ്യപ്രശ്‌നങ്ങളില്‍ ഒന്നാണ് പൊണ്ണത്തടി. ഇത് പലപ്പോഴും വലിയ പ്രത്യാഘാതങ്ങള്‍ക്ക് ഇടവരുത്തുന്നതായാണ് വൈദ്യശാസ്ത്ര റിപ്പോര്‍ട്ട്.

25-ന് മുകളിലുള്ള ബോഡി മാസ് ഇന്‍ഡക്‌സ് (ബിഎംഐ) അമിതഭാരത്തെയും 30-ല്‍ കൂടുതല്‍ അമിതവണ്ണത്തെയും സൂചിപ്പിക്കുന്നു. 2017 ലെ സ്ഥിതിവിവരക്കണക്കുകള്‍ പ്രകാരം, അമിതഭാരമോ അമിതവണ്ണമോ കാരണം ഓരോ വര്‍ഷവും 40 ലക്ഷത്തിലധികം ആളുകള്‍ മരിക്കുന്നതിനാല്‍ പ്രശ്‌നം പകര്‍ച്ചവ്യാധിയുടെ നിലവാരത്തിലേക്ക് വളര്‍ന്നതായും വിലയിരുത്തപ്പെടുന്നു.

ലോകത്തിലെ മുതിര്‍ന്നവരില്‍ 15 ശതമാനം പേരും പൊണ്ണത്തടി അനുഭവിക്കുന്നുണ്ടെന്ന് ലോകാരോഗ്യ സംഘടന സൂചിപ്പിക്കുന്നു. പൊണ്ണത്തടി നിലവില്‍ ലോകം നേരിടുന്ന ഏറ്റവും പ്രധാനപ്പെട്ട വെല്ലുവിളിയായി കണക്കാക്കപ്പെടുന്നു. ലോകത്തിലെ മിക്ക രാജ്യങ്ങളിലും ഇത് പൊതുജനാരോഗ്യത്തിന് ഭീഷണിയാണ്. പ്രത്യേകിച്ച് അറബ് ഗള്‍ഫ് മേഖലയില്‍ പൊണ്ണത്തടി വലിയ തോതില്‍ വര്‍ധിച്ചുവരികയാണെന്നാണ് റിപ്പോര്‍ട്ട്.

പൊണ്ണത്തടി വ്യക്തിക്കും സമൂഹത്തിനും ഗുരുതരമായ ആരോഗ്യ, മാനസിക, സാമ്പത്തിക, സാമൂഹിക നാശത്തിലേക്ക് നയിക്കുന്നതായാണ് വിലയിരുത്തപ്പെടുന്നത്. ഹൃദയ സംബന്ധമായ അസുഖങ്ങളും പ്രമേഹവും ഉള്‍പ്പെടെയുള്ള മറ്റ് പല വിട്ടുമാറാത്ത രോഗങ്ങളുടെ സാധ്യത വര്‍ദ്ധിപ്പിക്കുന്നതിനൊപ്പം അമിതഭാരം കാരണം രോഗിയുടെ ദൈനംദിന കഷ്ടപ്പാടുകള്‍ വര്‍ദ്ധിക്കുന്നതായും കണക്കാക്കപ്പെടുന്നുണ്ട്.

കഴിഞ്ഞ വര്‍ഷം, ഒമാനിലെ ആരോഗ്യ മന്ത്രാലയം, നോവോ നോര്‍ഡിസ്‌കിന്റെ സഹകരണത്തോടെ ഫാര്‍മ ഗള്‍ഫ് കമ്പനിയും ഡാനിഷ് എംബസിയും ചേര്‍ന്ന് ഒമാനില്‍ പൊണ്ണത്തടി വ്യാപിക്കുന്നത് തടയാന്‍ രണ്ട് പൈലറ്റ് പദ്ധതികള്‍ ആരംഭിച്ചിരുന്നു. ഒമാനിലെ പൊണ്ണത്തടിയുടെ കാരണങ്ങളെക്കുറിച്ചും അതിലേക്ക് നയിക്കുന്ന കാരണങ്ങള്‍ എങ്ങനെ നിയന്ത്രിക്കാമെന്നതിനെക്കുറിച്ചും വിപുലമായ പഠനം തയ്യാറാക്കുന്നതാണ് ഒരു പദ്ധഥതി. പൊണ്ണത്തടി കേസുകള്‍ കുറയ്ക്കാനും തടയാനും ഉദ്ദേശിച്ചുള്ളതാണ് മറ്റൊന്ന്.

2035ഓടെ ലോകജനസംഖ്യയുടെ പകുതിയിലധികവും അമിതഭാരമുള്ളവരോ പൊണ്ണത്തടിയുള്ളവരോ ആകുമെന്നാണ് ഇതുമായി ബന്ധപ്പെട്ട പഠനം വ്യക്തമാക്കുന്നത്. വേള്‍ഡ് ഒബിസിറ്റി ഫെഡറേഷന്റെ 2023 അറ്റ്ലസ് പ്രവചിക്കുന്നത്, അടുത്ത 12 വര്‍ഷത്തിനുള്ളില്‍ ലോകത്തിലെ 51 ശതമാനം അഥവാ 4 ബില്ല്യണിലധികം ആളുകള്‍ പൊണ്ണത്തടിയുള്ളവരോ അമിതഭാരമുള്ളവരോ ആയിരിക്കും എന്നാണ്.

കുട്ടികളിലും താഴ്ന്ന വരുമാനമുള്ള രാജ്യങ്ങളിലും അമിതവണ്ണത്തിന്റെ നിരക്ക് വളരെ വേഗത്തില്‍ വര്‍ദ്ധിച്ചുകൊണ്ടിരിക്കുകയാണെന്ന് റിപ്പോര്‍ട്ട് കണ്ടെത്തി. ഇത് ഗുരുതരമായ മുന്നറിയിപ്പാണ് ലോകത്തിന് നല്‍കുന്നതെന്ന് വേള്‍ഡ് ഒബിസിറ്റി ഫെഡറേഷന്‍ പ്രസിഡന്റ് ലൂയിസ് ബൗര്‍ പറഞ്ഞു. സ്ഥിതിഗതികള്‍ വഷളാകുന്നത് തടയാന്‍ നയരൂപകര്‍ത്താക്കള്‍ ഉണര്‍ന്നു പ്രവര്‍ത്തിക്കേണ്ടതുണ്ടെന്നും അദ്ദേഹം പറഞ്ഞു.

കുട്ടികളിലും കൗമാരക്കാരിലും പൊണ്ണത്തടി നിരക്ക് അതിവേഗം ഉയരുന്നത് പ്രത്യേകിച്ചും ആശങ്കാജനകമാണെന്നും അദ്ദേഹം കൂട്ടിച്ചേര്‍ത്തു. കുട്ടിക്കാലത്തെ പൊണ്ണത്തടി 2020-ല്‍ നിന്ന് ഇരട്ടിയിലധികമായി 2035-ഓടെ മാറും. അഥവാ 208 ദശലക്ഷം ആണ്‍കുട്ടികളും 175 ദശലക്ഷം പെണ്‍കുട്ടികളും പൊണ്ണത്തടി ഉള്ളവരായി മാറുമെന്ന് റിപ്പോര്‍ട്ട് കണ്ടെത്തി.