സ്വന്തം ലേഖകൻ: ഗൾഫ് വിമാന ടിക്കറ്റ് നിരക്ക് വർധനയിൽ ഇടപെടാൻ കഴിയില്ലെന്ന് കേന്ദ്ര സർക്കാർ. കേരളത്തിൽ നിന്നും ഗൾഫിലേക്കുള്ള ടിക്കറ്റ് നിരക്ക് വലിയ രീതിയിൽ വർധിച്ചത് ശ്രദ്ധയിൽപ്പെട്ടപ്പോൾ അടൂർ പ്രകാശ് എംപി നൽകിയ കത്തിന് വ്യോമയാനമന്ത്രി ജ്യോതിരാദിത്യ സിന്ധ്യ നൽകിയ മറുപടിയിൽ ആണ് ഇക്കാര്യം പറയുന്നത്. വിമാന ഇന്ധന വിലയിലെ വർധനയാണ് ഉയർന്ന നിരക്കിന് കാരണമായി കേന്ദ്ര സർക്കാർ ചൂണ്ടിക്കാട്ടുന്നത്.
അടിയന്തര ഇടപെടൽ ആവശ്യപ്പെട്ട് മുഖ്യമന്ത്രി പിണറായി വിജയൻ കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യയ്ക്കു കത്തയച്ചിരുന്നു. അവധിക്കാലത്തെ യാത്രാതിരക്ക് അവസാനിച്ചിട്ടില്ല. ഓണം വരാനിരിക്കുകയാണ് പ്രവാസികൾ ധാരാളമായി കേരളത്തിലേക്ക് വരുന്ന സമയമാണ് വരുന്നത്. ഈ സാഹചര്യത്തിൽ വിമാന നിരക്കുകൾ കുതിച്ചുയരുന്നത് തടയണം എന്നാണ് കേന്ദ്രത്തോട് കേരളം ആവശ്യപ്പെട്ടത്.
കേരളത്തിലേക്ക് ടിക്കറ്റ് നിരക്ക് ഉയർന്ന സാഹചര്യത്തിൽ നാട്ടിലേക്ക് വരുന്ന പല പ്രവാസികളും മറ്റ് സംസ്ഥാനങ്ങളിൽ എത്തിയാണ് കേരളത്തിലേക്ക് വരുന്നത്. ഇങ്ങനെ വരുമ്പോൾ വലിയ സാമ്പത്തിക ലാഭം ആണ് ഉണ്ടാകുന്നത്. വിമാന നിരക്ക് കാരണം പലരും കേരളത്തിലേക്കുള്ള യാത്രകൾ മാറ്റിവെക്കുന്നു. ഈ വിഷയത്തിൽ അടിയന്തരമായി ഇടപെടണമെന്നും മുഖ്യമന്ത്രി കത്തിലൂടെ കേന്ദ്രത്തോട് ആവശ്യപ്പെട്ടിരുന്നു. ഓഗസ്റ്റ് 15 മുതൽ സെപ്റ്റംബർ 15 വരെയുള്ള ഒരു മാസം യുഎഇയിൽനിന്നു പ്രത്യേക ചാർട്ടേഡ് വിമാനം ഏർപ്പെടുത്തണമെന്നും മുഖ്യമന്ത്രി കത്തിലൂടെ കേന്ദ്രത്തോട് ആവശ്യപ്പെട്ടു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല