സ്വന്തം ലേഖകൻ: പ്രവാസി ക്ഷേമബോര്‍ഡിന് സ്വന്തമായി വരുമാനം കണ്ടെത്താന്‍ പ്രവാസി ലോട്ടറി പോലുള്ളവ പരിഗണനയിലെന്ന് കേരള പ്രവാസി ക്ഷേമ ബോര്‍ഡ് ചെയര്‍മാനും മുന്‍ എംഎല്‍എയുമായ കെവി അബ്ദുല്‍ ഖാദര്‍. സര്‍ക്കാര്‍ അനുവദിക്കുന്ന ബജറ്റ് വിഹിതം മാത്രമാണ് ഇപ്പോള്‍ വരുമാനം. ഇത് വര്‍ധിപ്പിക്കാന്‍ പ്രവാസി ലോട്ടറി പോലുള്ള പദ്ധതികള്‍ സര്‍ക്കാരിന്റെ മുന്നില്‍ വച്ചിട്ടുണ്ടെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.
പ്രവാസി ക്ഷേമ പദ്ധതികള്‍ വിപുലപ്പെടുത്താന്‍ കേന്ദ്രസര്‍ക്കാര്‍ ധനസഹായം നല്‍കണം. രാജ്യത്തിന്റെ സാമ്പത്തിക മേഖലയ്ക്ക് ഗണ്യമായ സംഭാവന നല്‍കുന്ന പ്രവാസികള്‍ക്ക് കേന്ദ്ര സര്‍ക്കാര്‍ അര്‍ഹമായ പരിഗണന നല്‍കണമെന്നും അദ്ദേഹം ആവശ്യപ്പെട്ടു. ഇന്ത്യയില്‍ കേരളത്തില്‍ മാത്രമാണ് പ്രവാസികള്‍ക്കായി ക്ഷേമ ബോര്‍ഡുള്ളത്. എട്ടര ലക്ഷത്തോളം പ്രവാസികള്‍ ക്ഷേമനിധിയില്‍ അംഗങ്ങളാണ്. നാല്‍പ്പതിനായിത്തോളം പേര്‍ക്ക് പെന്‍ഷന്‍ നല്‍കിവരുന്നു. പെന്‍ഷന്‍ 3000 മുതല്‍ 3500 വരെയായി ഉയര്‍ത്തിയിട്ടുണ്ട്. ചികില്‍സ, മക്കളുടെ വിദ്യാഭ്യാസ വായ്പ എന്നിവയ്ക്കും സാമ്പത്തിക സഹായം നല്‍കിവരുന്നു. ആനുകൂല്യങ്ങള്‍ വര്‍ധിപ്പിക്കുന്ന കാര്യം ചര്‍ച്ചചെയ്ത് തീരുമാനിക്കും.
പ്രവാസി പെന്‍ഷന്‍ വാങ്ങുന്നര്‍ എല്ലാ വര്‍ഷവും സമര്‍പ്പിക്കേണ്ട ലൈഫ് സര്‍ട്ടിഫിക്കറ്റ് സാക്ഷ്യപ്പെടുത്താനുള്ള അധികാരം പ്രവാസി ക്ഷേമ ബോര്‍ഡ് ഡയറക്ടര്‍മാര്‍ക്ക് കൂടി നല്‍കുമെന്നും അദ്ദേഹം പറഞ്ഞു. പെന്‍ഷന്‍ വാങ്ങുന്നവര്‍ ജീവിച്ചിരിക്കുന്നുണ്ടെന്ന് ഉറപ്പാക്കാന്‍ എല്ലാ മാര്‍ച്ച് മാസത്തിലും ലൈഫ് സര്‍ട്ടിഫിക്കറ്റ് അറ്റസ്റ്റ് ചെയ്ത് നല്‍കേണ്ടതുണ്ട്.
കേരളത്തിലെ ഗസറ്റഡ് ഉദ്യോഗസ്ഥരില്‍ നിന്നാണ് അറ്റസ്റ്റ് ചെയ്ത് വാങ്ങേണ്ടത്. പ്രവാസ ലോകത്ത് കഴിയുന്നവര്‍ എംബസികള്‍ വഴി സാക്ഷ്യപ്പെടുത്തുമ്പോള്‍ ഫീസും മറ്റു ചെലവുകളും നല്‍കേണ്ടിവരുന്നത് ഒഴിവാക്കാന്‍ സാക്ഷ്യപ്പെടുത്താനുള്ള അധികാരം പ്രവാസി ക്ഷേമബോര്‍ഡ് അംഗങ്ങള്‍ക്ക് കൂടി നല്‍കുന്നതിലൂടെ സാധിക്കും.
പ്രവാസി ക്ഷേമപദ്ധതികളെ കുറിച്ച് പ്രവാസി സംഘടനകളെ ഉള്‍പ്പെടുത്തി പ്രവാസ ലോകത്ത് വിപുലമായ പ്രചാരണം നടത്താന്‍ ആലോചിക്കുന്നതായും ചെയര്‍മാന്‍ പറഞ്ഞു. പ്രവാസി ക്ഷേമനിധി ബോര്‍ഡിലെ തട്ടിപ്പ്പുറത്തുവന്നപ്പോള്‍ തന്നെ നടപടി സ്വീകരിച്ചിട്ടുണ്ട്. ഇത് ഒരു വ്യക്തി മാത്രം നടത്തിയ തട്ടിപ്പാണെന്നും പ്രവാസികള്‍ ആശങ്കപ്പെടേണ്ട കാര്യമില്ലെന്നും ബോര്‍ഡിന്റെ ശ്രദ്ധയില്‍പെട്ട ഉടന്‍ കര്‍ശന നടപടി സ്വീകരിച്ചുവെന്നും അദ്ദേഹം വിശദീകരിച്ചു.
നിങ്ങളുടെ അഭിപ്രായങ്ങള്‍ ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള്‍ എന്‍ ആര്‍ ഐ മലയാളിയുടെ അഭിപ്രായമാവണമെന്നില്ല